معروف اداکار و کامیڈین جاوید کوڈوطویل علالت کے بعد انتقال کر گئے

پاکستانی اسٹیج، ٹیلی ویژن اور فلم انڈسٹری کے لیجنڈ اداکار و کامیڈین جاوید کوڈو طویل علالت کے بعد انتقال کر گئے۔جاوید کوڈوکی عمر 63 برس تھی وہ کافی عرصہ سے لاہور کے جنرل اسپتال میں زیر علاج تھے،جاوید کوڈو نے اپنے کیرئیر میں متعدد اسٹیج ڈراموں، فلموں اور ٹی وی شوز میں اپنی شاندار اداکاری اور منفرد کامیڈی سے لاکھوں دلوں پر راج کیا۔ وہ اپنے برجستہ جملوں اور فطری انداز کی بدولت ناظرین کے چہروں پر ہنسی بکھیرنے میں ماہر تھے۔جاوید کوڈو نے 1980 کی دہائی میں اپنے فنی سفر کا آغاز کیا اور اپنی منفرد اداکاری، مزاحیہ انداز اور چھوٹے قد کی وجہ سے جلد ہی عوام میں مقبولیت حاصل کر لی۔انہوں نے 150 سے زائد اردو و پنجابی فلموں، سینکڑوں اسٹیج ڈراموں اور ٹی وی شوز میں اپنی صلاحیتوں کا مظاہرہ کیا۔ان کی صحت کے مسائل کئی برسوں پر محیط رہے۔ 2016 میں انہیں دماغ کی شریان میں خرابی کے باعث گنگا رام اسپتال منتقل کیا گیا تھا، جب کہ بعد ازاں ایک ٹریفک حادثے میں زخمی ہونے کے بعد ان کا کولہے کی ہڈی کا آپریشن بھی کیا گیا۔اہل خانہ کے مطابق جاوید کوڈو شوگر، بلڈ پریشر اور دیگر پیچیدہ امراض میں مبتلا تھے۔جاوید کوڈو تین بیٹوں اور بیوہ کو سوگوار چھوڑ گئے ہیں۔ دوسری جانب وزیر اعظم شہباز شریف نے نامور فنکار اور کامیڈین جاوید کوڈو کی رحلت پر اظہار افسوس کیا اور مرحوم کی بلندی درجات اور اہل خانہ کیلئے صبر کی دعا کی۔انہوں نے کہا کہ جاوید کوڈو جو کہ اپنے چھوٹے قد اور قدآوراداکاری کی وجہ سے مشہور تھے، ان کی وفات سے میڈیا انڈسٹری میں ایسا خلاء پیدا ہوگیا ہے جو شاید کبھی پر نہ ہو، مشکل کی اس گھڑی میں ہماری تمام تر ہمدردیاں مرحوم کے اہل خانہ کے ساتھ ہیں۔وزیر اعلیٰ پنجاب مریم نواز شریف نے بھی منفرد اداکار جاوید کوڈو کے انتقال پر اظہار افسوس کرتے ہوئے سوگوار خاندان سے دلی ہمدردی و اظہار تعزیت کیا ہے۔علاوہ ازیں جاوید کوڈو کے انتقال پر فلم، ٹی وی اور اسٹیج سے وابستہ فنکاروں نے گہرے رنج و غم کا اظہار کیا ہے اور ان کی فنی خدمات کو خراج تحسین پیش کیا ہے۔