Sports News

Entertainment

اسرائیل کی جانب سے لبنان میں حزب اللہ کے خلاف حملوں میں جدید ٹیکنالوجی کا استعمال کیا گیا ہے، اور وائرلیس سسٹم پر سائبر حملے کے نتیجے میں 8 افراد شہید اور اڑھائی ہزار سے زیادہ زخمی ہوگئے ہیں۔عرب میڈیا کے مطابق لبنان کے مختلف علاقوں میں حزب اللہ ارکان کے پیجرز میں ایک ساتھ دھماکے ہوئے، رابطوں کے لیےاستعمال ہونے والی پیجر ڈیوائسز میں دھماکوں سےحزب اللہ کے تقریبا اڑھائی ہزار اہلکار زخمی ہوئے۔غیرملکی میڈیا رپورٹس کے مطابق حزب اللہ کے اہلکاروں کے ہاتھ میں پکڑے ہوئے وائرلیس سیٹ اچانک دھماکے سے پھٹ گئے،میڈیا رپورٹس میں کہا گیا ہے کہ لبنان میں ایران کے سفیر مجتبیٰ امانی بھی زخمی ہونے والوں میں شامل ہیں۔اس حوالے سے لبنان کے وزیر صحت فراس ابیاد نے ہنگامی نیوز کانفرنس میں بتایا کہ پورے ملک میں پیجرز پھٹنے سے آٹھ افراد جاں بحق اور2ہزارسات سوپچاس زخمی ہوئے ہیں، حکومت نے اسپتالوں میں ایمرجنسی نافذ کرکے شہریوں سے خون کے عطیات دینے کی اپیل کی ہے۔غیرملکی میڈیا کے مطابق لبنان بھر میں سکیورٹی اہلکاروں کی بات چیت کے لیے استعمال ہونے والے پیجرز میں سہ پہر 3بج کر45منٹ پرشروع ہونے والی دھماکوں کی لہرتقریباً ایک گھنٹہ تک جاری رہی۔فوری طور پر یہ واضح نہیں ہوسکا کہ آلات کو کس طرح سے دھماکا کیا گیا تاہم کہا جارہا ہے کہ اسرائیل نے مبینہ طور پر حزب اللہ کے زیر استعمال مواصلاتی آلات کو ہیک کیا۔پیجرز پھٹنے سے حزب اللہ کے جنگجوؤں اور طبی عملے سمیت سیکڑوں افراد زخمی ہوئے،  دھماکوں کے بعد ملک بھر کے اسپتالوں میں ہائی الرٹ کردیا گیا، اسپتال زخمیوں سے بھر گئے۔زخمیوں میں ایرانی سفیر مجتبیٰ امانی بھی شامل ہیں تاہم ایرانی میڈیا کے مطابق مجتبیٰ امانی کی حالت خطرے سے باہر ہے۔عرب میڈیا کی جانب سے چلائی جانے والی ویڈیوز میں دیکھا جاسکتا ہے پیچرز میں دھماکوں کے بعد اسپتال زخمیوں سے بھر گئے ہیں۔غیرملکی خبررساں ایجنسی کے مطابق زخمیوں میں سے اکثر کو ہاتھوں، پیروں، چہروں اور آنکھوں پر زخم آئے ہیں۔حزب اللہ کے ایک عہدے دار نے نام ظاہر نہ کرنے کی شرط پر غیر ملکی خبررساں ادارے سے بات کرتے ہوئے کہا کہ پیجرز میں دھماکا ہونا موجودہ جنگ کے دوران سکیورٹی کی سب سے بڑی ناکامی ہے۔

اسرائیل کا حزب اللہ کے وائر لیس سسٹم پر سائبر حملہ، 8 افراد شہید، 2ہزارسات سوسے زائد زخمی

حزب اللہ اراکین پیجرز کو بات چیت کیلئے استعمال کرتے تھے، ایرانی سفیر بھی زخمیوں میں شامل ہیں

سابق صدر مملکت ڈاکٹر عارف علوی نے جمیعت علماء اسلام (ف) کے سربراہ مولانا فضل الرحمان سے ملاقات کی ہے، جس میں مجوزہ آئینی ترامیم پر گفتگو کی گئی دونوں رہنماؤں کی جانب سے آئینی ترامیم کے حوالے سے مجوزہ تجاویز کا جائزہ لیا اور سیاسی امور پر تبادلہ خیال کیا گیا۔تفصیلات کے مطابق مولانا فضل الرحمان کی رہائش گاہ سیاسی سرگرمیوں کا مرکز بنی ہوئی ہے،سابق صدرعارف علوی کی مولانا فضل الرحمان سے ملاقات کے دوران  سیکرٹری جنرل پاکستان تحریک انصاف سلمان اکرم راجہ بھی عارف علوی کے ساتھ موجود تھے۔دوران گفتگوسابق صدر مملکت عارف علوی نے مجوزہ آئینی ترامیم کے حوالے سے بہترین موقف پیش کرنے پر سربراہ جے یو آئی (ف) مولانا فضل الرحمان کومبارکباددی۔عارف علوی کا کہنا تھا کہ کہ آئین میں قومی اسمبلی میں بحث کیے بغیر ترامیم ممکن نہیں ہے، حکومت کی طرف سے آئینی ترامیم خاموشی سے اور رات کے اندھیرے میں کرانے کی کوشش کی گئی، جس پر دونوں رہنماؤں نے کسی بھی غیرآئینی اقدامات کی بھرپور مخالفت پر اتفاق رائے کیا۔میڈیارپورٹس کے مطابق بانی پی ٹی آئی عمران خان نے عارف علوی کے ذریعے مولانا فضل الرحمان کو پیغام پہنچایا کہ حکومت عدلیہ پر شب خون مارنا چاہتی تھی جسے اپوزیشن نے مل کر ناکام بنایا، ہم آپ کے کردار کو سراہتے ہیں۔ عمران خان نے مولانا فضل الرحمان کو عوامی جمہوری معاملات پر ایک ساتھ کھڑے ہونے کا پیغام دیا، ملاقات میں ڈاکٹر عارف علوی نے مولانا فضل الرحمان اور ان کی پارٹی کا شکریہ ادا کیا۔ خیال رہے عدالتی اصلاحات سے متعلق آئینی ترامیم کے لیے حکومت جہاں سرتوڑ کوشش کررہی ہے تو وہیں پاکستان تحریک انصاف نے حکمران اتحاد کو ناکام بنانے کے لیے کمر کس لی ہے، اور اس ساری صورتحال میں مولانا فضل الرحمان اہمیت اختیار کرگئے ہیں۔یاد رہے کہ حکومت نے اتوار کی رات نمبر پورے نہ ہونے پر آئینی ترامیم کا مسودہ مئوخر کرتے ہوئے قومی اسمبلی اور سینیٹ کے اجلاس ملتوی کردیے تھے، جس کے بعد مولانا فضل الرحمان سے حکمران اتحاد کے رہنماؤں کی ملاقاتیں بھی ہوئیں۔

سابق صدرعارف علوی کی مولانا فضل الرحمان سے اہم ملاقات،سیاسی امور پر تبادلہ خیال

عارف علوی نے آئینی ترامیم سے متعلق مؤقف پیش کرنے پر مولانا فضل الرحمان کو مبارک باد بھی دی

پاکستان میں افغان قونصلیٹ کے عہدیداروں کی جانب سے بد تہذیبی اور سفارتی اصولوں کی سنگین خلاف ورزی سامنے آئی ہے، جس پر دفتر خارجہ نے احتجاج کا فیصلہ کیا ہے۔تفصیلات کے مطابق افغان قونصلیٹ کے عہدیداروں کی بدتہذیبی انتہا کو پہنچ گئی، سفارتی اصولوں کی سنگین خلاف ورزی کرتے ہوئے پاکستانی قومی ترانے کے دوران بیٹھے رہے۔وزیراعلیٰ خیبرپختونخواہ علی امین گنڈاپور نے افغان قونصلیٹ کے عہدیداروں کو آج رحمت العالمین کانفرنس پر پشاور میں مدعو کیا۔افغان کونسل جنرل محب اللہ شاکر پاکستان کے قومی ترانے کے دوران سفارتی پروٹوکول کی دھجیاں اڑاتےہوئےبے شرمی کے ساتھ اپنی سیٹ پر بیٹھے رہے۔قومی ترانے کا احترام نہ کر کے افغان قونصل جنرل محب اللہ شاکر نے اعلان کیا ہے کہ اسکو پاکستان اور پاکستانی قوم کا کوئی احترام نہیں یہ غیر معمولی واقع ہے اور سفارتی آداب کے بالکل برخلاف ہے کسی مہذب معاشرے میں ایسی حرکت خلاف تہذیب ہوتی ہے۔ماہرین کا کہنا ہے کہ اس شخص کو ناپسندیدہ شخص قرار دے کر پاکستان سے بھیجا جائے اس کے علاوہ دعوت دینے والی خیبرپختونخوا حکومت پر بھی سوال اٹھتا ہے کہ کیا انہیں پاکستان کی عزت اور سفارتی آداب  کا کوئی خیال نہیں ہے۔ماہرین کا کہنا ہے کہ محکمہ خارجہ کو اس واقع کا نوٹس لینا چاہیے اور سفارت کاری اصولوں کی خلاف ورزی پر ڈیمارش دینا چاہیے۔دوسری جانب نجی ٹی وی کے مطابق دفتر خارجہ نے پشاور میں ایک تقریب کے دوران افغانستان کے قائم مقام قونصل جنرل کی جانب سے قومی ترانے کی بے حرمتی پر شدید ردعمل جاری کردیا۔دفتر خارجہ کی ترجمان ممتاز زہرہ بلوچ نے پشاور میں ایک تقریب کے دوران افغانستان کے قائم مقام قونصل جنرل کی جانب سے پاکستانی قومی ترانے کی بے حرمتی کے حوالے سے میڈیا کے سوالات کے جواب میں کہا کہ میزبان ملک کے قومی ترانے کی بے حرمتی سفارتی آداب کے خلاف ہے۔انہوں نے کہا کہ افغانستان کے قائم مقام قونصل جنرل کا یہ اقدام قابل مذمت ہے، ہم اس معاملے پر اپنا شدید احتجاج اسلام آباد اور کابل میں افغان حکام تک پہنچا رہے ہیں۔

سفارتی آداب کی خلاف ورزی، افغان قونصل جنرل پاکستانی قومی ترانے کے دوران بیٹھے رہے

افغان قونصل جنرل کی قومی ترانے کی بے حرمتی پر پاکستان کی شدید مذمت

ڈونلڈ ٹرمپ نے اپنے اوپر ہونے والے حملوں کا الزام امریکی صدر جو بائیڈن اور کملا ہیرس پر عائد کر دیا ہے۔تفصیلات کے مطابق ڈونلڈ ٹرمپ نے انتخابی حریف کاملا ہیرس اور امریکی صدر جو بائیڈن پر الزام عائد کیا ہے کہ ان کی ’بیان بازی‘ جس میں انہیں جمہوریت کے لیے خطرہ قرار دیا گیا اس کی وجہ سے ان پر دوسری مرتبہ قاتلانہ حملہ کی کوشش کی گئی، انہوں نے کہا کہ ڈیموکریٹس لیڈرز کے بیانات کی وجہ سے مجھ پر دوسری بار قاتلانہ حملہ ہوا،امریکی ٹی وی کو انٹرویو میں ڈونلڈ ٹرمپ نے الزام لگایا کہ ڈیموکریٹس کی بیان بازی ہی ان پر گولیاں چلوا رہی ہے، وہ ملک کو بچانا چاہتے ہیں اور یہ بائیڈن اور کملا ہیں جو ملک کو اندرونی اور بیرونی طور پر تباہ کر رہے ہیں۔ٹرمپ نے موجودہ صدر اور ان کے نائب صدر کے بیانات کی طرف اشارہ کرتے ہوئے متنبہ کیا کہ وہ جمہوریت کے لیے خطرہ ہیں۔ ان کے مخالفین انتہائی اشتعال انگیز زبان استعمال کر رہے ہیں۔ میں بھی ان کی طرح بلکہ ان سے زیادہ سخت زبان استعمال کرسکتا ہوں لیکن میں ایسا نہیں کروں گا۔ٹرمپ نے مزید کہا کہ ملک کو بچاؤں گا، بائیڈن اور ہیرس اسے اندر اور باہر سے تباہ کر رہے ہیں۔واضح رہے کہ گزشتہ روز فلوریڈا میں ویسٹ پام بیچ میں واقع ٹرمپ کے گالف کلب کے قریب فائرنگ کا واقعہ پیش آیا تھا، تاہم واقعے میں سابق صدر مکمل طور پر محفوظ رہے۔لیکن ان کی سیکیورٹی پر سوالیہ نشانات اٹھ رہے ہیں کہ کیسے ایک مسلح شخص ان کے اتنے قریب پہنچ گیا 13 جولائی کو پنسلوانیا میں بھی سابق امریکی صدر پر قاتلانہ حملہ ہو چکا ہے۔

کملاہیرس اوربائیڈن کے بیان سے متاثرہوکرمشتبہ شخص نے قاتلانہ حملے کی کوشش کی،ٹرمپ

یہ بائیڈن اور کملا ہیں جو ملک کو اندرونی اور بیرونی طور پر تباہ کر رہے ہیں،سابق امریکی صدر

بھارت نے چین کو شکست دیکر پانچویں بار ایشین ہاکی چیمپئنز ٹرافی کا ٹائٹل جیت لیا۔بھارتی ہاکی ٹیم نے میزبان چین کو ایشین ہاکی چیمپئنز ٹرافی کے فائنل میں ایک صفر سے ہراکر گولڈ میڈل جیت لیا۔بھارت 2011، 2016 اور 2023 میں بھی ایشین چیمپئنز ٹرافی کا ٹائٹل جیت چکا ہے جبکہ 2018 میں پاکستان اور بھارت مشترکہ فاتح تھے۔دوسری جانب پاکستان نے جنوبی کوریا کو تیسری پوزیشن کے میچ میں شکست دے کر 8سال بعد ایشین ہاکی چیمپیئنز ٹرافی میں کانسی کا تمغہ حاصل کرلیا۔قومی ٹیم نے میچ میں جنوبی کوریا کو پانچ دو سے شکست دی، پاکستان کی جناب سے سفیان خان اور حنان شاند نے دو دو گول کیے جبکہ رومان خان نے ایک گول داغا، پاکستان کے سفیان خان کو دو گول کرنے پر پلیئر آف دی میچ قرار دیا گیا۔واضح رہے کہ ایونٹ کے سیمی فائنل میچ میں پاکستان کو میزبان چین کے ہاتھوں شکست کا سامنا کرنا پڑا تھا۔ چین نے پنالٹی شوٹس پر پاکستان کو دو صفر سے شکست دی تھی۔

بھارت نےچین کوہرا کرپانچویں بار ایشین ہاکی چیمپئنز ٹرافی کا ٹائٹل اپنے نام کرلیا

پاکستان نے جنوبی کوریا کو تیسری پوزیشن کے میچ میں شکست دیکر 8سال بعد ایشین ہاکی چیمپیئنز ٹرافی میں کانسی کا تمغہ حاصل کیا

وزیراعلیٰ خیبرپختونخوا علی امین گنڈاپور نے آئینی ترامیم کی کھل کر مخالفت کردی۔علی امین گنڈاپور کا کہناتھاکہ آئینی ترمیمی بل بل لانا تو دُور کی بات، اِنہوں نے سوچا کیسے جب تک ہم ہیں ایسا بل پیش کر سکیں؟۔تفصیلات کے مطابق خیبر پخونخوا میں ربیع الاول کے دوران پہلی باررحمت اللعالمین کانفرنسز کا سرکاری سطح پر انعقاد کیا گیا۔ اسی سلسلے میں جشن میلاد النبیؐ کی مناسبت سے پشاور میں قومی رحمت اللعالمین کانفرنس منعقد کی گئی، جس میں وزیراعلیٰ خیبر پختونخوا علی امین گنڈاپور نے بطور مہمان خصوصی شرکت کی۔کانفرنس میں منتخب عوامی نمائندے، سرکاری حکام، سیاسی و سماجی شخصیات اور تمام مکاتب فکر کے علما کی بڑی تعداد نے شرکت کی۔ یہ کانفرنس عشرہ رحمت اللعالمین منانے کے سلسلے میں صوبائی حکومت کی مختلف تقاریب کا حصہ ہے۔تقریب سے خطاب کرتے ہوئے وزیراعلیٰ پختونخوا علی امین گنڈاپور نے کہا کہ حضرت محمد صلی اللہ علیہ وسلم کی ولادت پوری کائنات کے لیے باعث رحمت ہے۔ آپؐ نے کردار اور عمل سے لوگوں کو اچھائی کی طرف راغب کیا۔ آپؐ نے انصاف کی بات کی، آپ کی تعلیمات ہی میں کامیابی ہے۔انہوں نے کہا کہ اپنے نبی سے محبت ہمارے ایمان کا حصہ ہے۔ ہمارے پیغمبر نے زندگی کا ہر راستہ دکھایا۔ آپؐ نے عملاً لوگوں کو دعوتِ اسلام دی۔ انصاف اور حقوق کی بات کی۔ ہم اپنے نبیؐ کی زندگی کے مطابق چلیں گے۔رحمت اللعالمین کانفرنس سے خطاب کے بعد میڈیا سے گفتگو کرتے ہوئے علی امین گنڈاپور نے کہا کہ آئینی ترامیم لانے والوں کو شرم آنی چاہیے۔ ہم انہیں ہم کامیاب نہیں ہونے دیں گے۔ انہوں نے کہا کہ یہ جمہوریت پر ایک حملہ ہے اور یہ حملہ ہم کبھی کامیاب نہیں ہونے دیں گے۔علی امین گنڈاپور نے کہا کہ ہم عدلیہ کے ساتھ کھڑے ہیں، اس طرح کا بل پاس ہونا دور کی بات، کسی کی پیش کرنےکی بھی جرات نہیں ہوگی۔علی امین گنڈاپور کا کہنا تھا کہ یہ جو اپنے آپ کو جمہوری پارٹیاں کہتے ہیں انہیں شرم آنی چاہیے ، اس طرح کے بل کو لانا تو دُور کی بات ہے، انہوں نے سوچا کیسے کہ پاکستانی قوم یا پاکستان میں جب تک ہم ہیں اور جمہوریت ہے ، اس طرح کا بل اور اس طرح کی شرائط لاکر یہ کامیاب ہوں گے۔انہوں نے کہا کہ پہلے ہم ان کو پارلیمنٹ میں شکست دیں گے، اس کے بعد عدلیہ کے ذریعے بھی۔ ہم اپنے جائز حق کے لیے تمام آئینی حق استعمال کرتے ہوئے اس طرح کا بل پاس ہونا تو دُور کی بات ہے، کسی کی جرأت بھی نہیں ہوگی کہ پیش کر سکیں۔واضح رہے کہ گزشتہ روز آئین میں 26ویں ترمیم کے حوالے سے اتفاق رائے نہ ہونے اور حکومت کو درکار دو تہائی اکثریت حاصل نہ ہونے پر قومی اسمبلی کا اجلاس غیرمعینہ مدت تک ملتوی کردیا گیا جہاں کئی دن کی کوششوں کے باوجود بھی آئینی پیکج پر اپوزیشن بالخصوص مولانا فضل الرحمٰن کو منانے میں ناکامی کے بعد ترمیم کی منظوری غیر معینہ مدت تک مؤخر کر دی گئی۔

آئینی ترامیم جمہوریت پرحملہ ہے، کسی صورت کامیاب نہیں ہونے دینگے، وزیراعلیٰ خیبرپختونخوا

ہم عدلیہ کیساتھ کھڑے ہیں، اس طرح کا بل پاس ہونا دور کی بات، کسی کی پیش کرنےکی بھی جرات نہیں ہوگی،علی امین گنڈاپور

سعودی عدالت نے پبلک سکیورٹی کے سابق ڈائریکٹر لیفٹیننٹ جنرل خالد بن قرار کو کرپشن اور رشوت کے الزم میں 20 سال قید کی سزا اور 10 لاکھ ریال جرمانہ کی سزا سنادی۔ العربیہ کی رپورٹ کے مطابق سعودی عدالت نے پبلک سکیورٹی کے سابق ڈائریکٹر کو اختیارات کے غلط استعمال کے ذریعے عوامی فنڈز میں ہیرا پھیری کی، جعلسازی اور رشوت لینے پر مجموعی طور پر 20 سال قید کی سزا کے علاوہ 10 لاکھ ریال جرمانہ کی سزا سنائی ہے۔عدالت نے لیفٹیننٹ جنرل خالد بن قرار الحربی کو جعلسازی اور رشوت پر 10 سال قید کی سزا سنائی جب کہ اختیارات کے غلط استعمال کی بنیاد پر مزید 10 سال قید کی سزا سنائی گئی۔ اس کے علاوہ عدالت کی جانب سے عائد کردہ 10 لاکھ جرمانے کی رقم حکومتی خزانے میں جمع کرائی جائے گی۔فیصلے کے مطابق خالد الحربی سے وہ سب کچھ ضبط کر لیا جائے گا جو انہوں نے غیر قانونی طور پر حاصل کیا ہے جب کہ دوران ملازمت حاصل کیے گئے تحائف نما رشوتی اشیا بھی ضبط کرلیے جائیں گے، ان میں زرعی اراضی بھی شامل ہے۔عدالت کی جانب سے یہ سزا فوجداری قانون کے تحت سنائی گئی، لیفٹیننٹ جنرل خالد الحربی کی ملازمت سے اسے برطرف کر دیا گیا ہے اور ان کے خلاف تحقیقاتی عمل شروع کیا گیا۔واضح رہے کہ لیفٹیننٹ جنرل خالد الحربی پر الزام تھا کہ انہوں نے حکومتی ٹھیکوں کے اجرا میں اپنے اختیارات کا غلط استعمال کیا، ذاتی فوائد حاصل کیے۔

سعودی لیفٹیننٹ جنرل کرپشن کے الزام پر ملازمت سے فارغ، 20 سال قید کی سزا، رقوم وپلاٹ ضبط

لیفٹیننٹ جنرل کی رشوت سے کمائی گئی رقوم اور اراضی ضبط کرلی جائے گی اور وصول جرمانے کی رقم قومی خزانے میں جمع ہوگی

بھارتی وزیراعظم نریندر مودی نے عیدمیلادالنبی ﷺ کے پر مسرت موقع پر مسلمانوں کو مبارکباد پیش کی ہے۔بھارتی وزیر اعظم نریندر مودی نے ٹوئٹر پر اپنے پیغام میں لکھا کہ “پیغمبر اکرم صلی اللہ علیہ وسلم کے یوم ولادت کے پُرمسرت موقع پر، میں اپنے تمام ہم وطنوں بالخصوص اپنے مسلمان بھائیوں اور بہنوں کو دلی مبارک باد اور نیک خواہشات پیش کرتا ہوں۔وزیراعظم مودی نے کہا کہ پیغمبر اسلام ﷺ نے مساوات پر مبنی انسانی معاشرے کا عملی نمونہ پیش کیا اور صبر کے ساتھ سچائی کے راستے پر چلنے کا درس دیا، اس موقع پر آئیے ہم سب ان تعلیمات کو اپنانے اور ملک کی ترقی کے لیے مسلسل کام کرنے کا عہد کریں،بھارتی وزیراعظم نریندر مودی نے اپنی ٹوئٹ کے آخر میں لکھا کہ عید میلاد النبی کے موقع پر ہم آہنگی اور اتحاد ہمیشہ قائم رہے،چاروں طرف خوشیاں اور خوشحالی ہو، سب کو عید میلاد النبی ﷺ مبارک۔

پیغمبر اسلام ﷺ نے صبر کیساتھ سچائی کے راستے پر چلنے کا درس دیا، نریندر مودی

اپنے پیغام میں بھارتی وزیراعظم نریندرمودی نے ہم آہنگی، اتحاد اور خوشحالی کی دعا بھی کی

ملک بھر میںرحمت اللعالمین، خاتم النبیین رسول کریم صلی الله علیہ وسلم کی ولادت با سعادت کا جشن مذہبی عقیدت و احترام سے منایا جارہا ہے۔ وفاقی اور صوبائی حکومتوں نے یوم ولادت النبیؐ کے حوالے سے آج عام تعطیل ہے۔عید میلادالنبیﷺ کے موقع پر دن کے آغاز کے موقع پروفاقی دارالحکومت میں اکتیس جبکہ تمام صوبائی دارالحکومتوں میں اکیس ،اکیس توپوں کی سلامی پیش کی گئی۔ ملک بھر میں درودوسلام کی محافل کاانعقاد اور نذرانہ عقیدت پیش کرنےکا سلسلہ بھی جاری ہے۔ اور اس سلسلے میں نکالنے جانے والے جلوسوں کے حوالے سے سخت سیکیورٹی انتظامات کیے گئے ہیں۔جشن میلاد النبیﷺ کے سلسلے میں کراچی سمیت ملک بھر کی گلیوں، محلوں اور بازاروں کو خوبصورت روشنیوں، برقی قمقموں اورسبز جھنڈیوں سے سجا دیا گیا ہے جبکہ سرکاری و نجی عمارتوں پر بھی چراغاں کیا گیا ہے۔ اس کے ساتھ کئی بازاروں اور شاہراہوں پر محرابیں اور آرائشی دروازے بھی لگائے گئے ہیں۔اس کے علاوہ مساجد کو بھی برقی قمقموں سے سجایا گیا ہے جبکہ درود و سلام اور نعت خوانی کی محافل کا انعقاد کیا جارہا ہے جبکہ فضائیں درود و سلام سے معطر ہیں۔جشن میلاد النبیﷺ کی مناسبت سے شہر کے مختلف علاقوں میں نیاز تقسیم کرنے کا بھی اہتمام کیا گیا ہے۔ پولیس سمیت دیگر قانون نافذ کرنے والے اداروں کی جانب سے 12 ربیع الاول کو فول پروف سکیورٹی انتظامات کیے گئے ہیں۔علاوہ ازیں ملک میں آقائے دوجہاں نبی کریمﷺ کی ولادت با سعادت کا ہر طرف جشن منایا جارہا،ملک کے تمام چھوٹے بڑے شہروں اور دیہات میں دن بھر جلوس بھی نکالے جائیں گے۔عید میلادالنبیﷺ کی تیاریوں کے بعد عاشقان رسولﷺ نے گلی گلی، قریہ قریہ سجا دیا، شاہراہیں، چھوٹی بڑی عمارتیں، گھر رنگ برنگی روشنیوں سے منور ہوگئے، مساجد میں خصوصی محافل اور چراغاں کیا گیا۔رحمت دوعالم، فخر کائناتﷺ کے حضور عقیدت کے پھول نچھاور کئے جا رہے۔سیکیورٹی خدشات کے پیش نظر روالپنڈی میں موبائل سروس جزوی طور پر جبکہ کوئٹہ میں سروس مکمل طور پر معطل ہے۔راولپنڈی میں موبائل فون سروس مرکزی جلوس اور ملحقہ علاقو ں میں معطل کی گئی۔دوسری جانب صدرمملکت آصف زرداری اور وزیراعظم نے عید میلاد النبیﷺ کےموقع پرقوم کو مبارک باد دیتے ہوئے خصوصی پیغام بھی جاری کیا۔ صدر مملکت نے کہا کہ اللہ تعالیٰ ہمیں آپﷺکی سیرت پرعمل کرنےکی توفیق عطافرمائے، اللہ نےاس مہینےمیں آپﷺکی ولادت کی عظیم نعمت عطافرمائی۔

ملک بھر میں جشن عید میلاد النبیﷺ مذہبی عقیدت واحترام سے منایا جا رہا ہے

دن کے آغاز پروفاقی دارالحکومت میں اکتیس جبکہ تمام صوبائی دارالحکومتوں میں اکیس ،اکیس توپوں کی سلامی پیش کی گئی

کراچی میں ٹریفک پولیس نے 12 ربیع الاوّل کے مرکزی جلوس کا ٹریفک پلان جاری کردیا۔تفصیلات کے مطابق ملک بھر میں عید میلادالنبیؐ  کل مذہبی عقیدت و احترام سے منائی جائے گی، اس موقع پر کراچی میں ایم اے جناح روڈ سمیت اہم سڑکیں بند ہوں گی۔عید میلادالنبیؐ کے موقع پر حکومت کی جانب سے ملک بھر میں عام تعطیل کا اعلان کیا گیا ہے ، اس دن کی مناسبت سے سیرت النبی ؐ کے موضوع پر سیمینارز، کانفرنسز اور محافل نعت کا اہتمام کیا جائے گا، ملک بھر میں جلوس نکالے جائیں گے، لنگر تقسیم اور کیک کاٹے جائیں گے، ملک بھر میں گلی محلوں اور بازاروں کو سبز جھنڈیوں اور برقی قمقموں سے سجا دیا گیا جبک سرکاری و نجی عمارتوں پر بھی چراغاں کیا گیا ہے۔کراچی میں 12 ربیع الاول کے جلوسوں کے باعث ایم اے جناح روڈ اور اطراف کی سڑکیں اور گلیاں بند ہوں گی،اس حوالے سے ٹریفک پولیس نے 12 ربیع الاوّل کے مرکزی جلوس کا ٹریفک پلان جاری کردیا۔ترجمان کراچی پولیس کے مطابق مرکزی جلوس کے راستوں اور گزرگاہوں سمیت جلوس کی نگرانی و سیکیورٹی کیلئے پولیس کے 4 ہزار 332 پولیس افسران و اہلکاروں کو تعینات کیا گیا ہے۔جلوس کی سیکیورٹی کے لیے 87 سینئر افسران سمیت 706 اے ایس آئیز و ایس آئیز ، 3 ہزار 374 ہیڈ کانسٹیبلز و کانسٹیبلز کو تعینات کیا گیا ہے۔ سیکیورٹی ڈویژن کے اہلکاروں سمیت اسپیشل سیکیورٹی یونٹ کے کمانڈوز اور ماہر نشانہ باز بھی ڈیوٹی سرانجام دیں گے۔ٹریفک پولیس کا کہنا ہے کہ جلوس کے راستے اور اس سے منسلک گلیاں ٹریفک کیلئے بند رہیں گی، ٹریفک کو ایم اے جناح روڈ کی جانب جانے کی اجازت نہیں ہوگی۔کیماڑی سے جناح برج ٹاور کی جانب ٹریفک کو جانے کی اجازت نہیں ہوگی جبکہ یونیورسٹی روڈ سے نیو ایم اے جناح روڈ آنےکیلئے جیل فلائی اوورکے نیچے سے آگے آنے کی اجازت نہیں ہوگی۔لسبیلہ بزنس ریکارڈر روڈ سے آنے والے ٹریفک کو جہانگیر روڈ، جمشید روڈ، بنوری لائٹ سگنل سے نیو ایم اے جناح یا جیل کی جانب موڑ دیا جائے گا، تمام گلیاں، بہادر یار جنگ، گرو مندر مکمل طور پر تمام ٹریفک کےلئے بند رہیں گی۔شارع قائدین سے آنے والی ٹریفک کوسوسائی سگنل سے آگے آنے کی اجازت نہیں ہوگی، ایم آرکیانی چوک سے ٹریفک کو کورٹ روڈ چورنگی کی جانب جانے کی اجازت نہیں ہوگی، ٹریفک کو پریس کلب سےعبداللہ ہارون روڈ کی جانب بھیجا جائے گا۔نشترروڈ، رنچھوڑ لائن سے کھارادر آنے والی ٹریفک کو لی مارکیٹ سے آگے جانے کی اجازت نہیں ہوگی، ٹریفک کو موسیٰ لین، کھڈہ مارکیٹ کی جانب بھیجا جائے گا۔

کراچی میں 12 ربیع الاول کے مرکزی جلوس کا ٹریفک پلان جاری کردیاگیا

ٹریفک کو ایم اے جناح روڈ کی جانب جانے کی اجازت نہیں ہوگی، سیکیورٹی کیلئے پولیس کے 4 ہزارسے زائد اہلکار تعینات

سونا خریدنا خواب بن گیا،پاکستان میں عالمی مارکیٹ کے زیراثر سونے کی قیمت میں ایک بار پھر بڑا اضافہ دیکھنے میں آرہا ہے۔تفصیلات کے مطابق پاکستان میں سونے کی قیمت تاریخ کی بلند ترین سطح پر پہنچ گئی عالمی مارکیٹ میں سونے کی قیمتوں میں اضافے کے باعث پاکستان میں بھی سونے کے نرخ تاریخ کی بلند ترین سطح پرپہنچ گئے۔آل پاکستان جیمز اینڈ جیولرز ایسوسی ایشن کے مطابق ملک میں آج ایک تولہ سونا 1700 روپے مہنگا ہوا ہے۔1700 روپے اضافے کے بعد ایک تولہ سونا 2 لاکھ 68  ہزار   روپےکا ہوگیا ہے۔دس گرام سونا 1458 روپے اضافے سے 2 لاکھ 29 ہزار 767 روپےکا ہے۔ایسوسی ایشن کے مطابق عالمی بازار میں سونےکا بھاؤ 10 ڈالر اضافے سے2587 ڈالر فی اونس ہے۔دوسری جانب انٹربینک میں آج روپے کے مقابلے میں امریکی کرنسی کی قیمت میں کمی ریکارڈ کی گئی۔کاروباری ہفتے کے پہلے روز انٹربینک میں امریکی کرنسی کی قیمت میں 3 پیسے کی کمی ریکارڈ کی گئی جس کے باعث انٹربینک میں ڈالر 278 روپے 13 پیسے پر بند ہوا۔

ملک میں سونے کی فی تولہ قیمت تاریخ کی بلند ترین سطح پر پہنچ گئی

فی تولہ سونا 1700 روپے اضافے کے بعد 2 لاکھ 68 ہزار روپے کی بلند ترین سطح پر پہنچ گیا

پاکستان تحریک انصاف (پی ٹی آئی) کے رہنما شاہ محمود قریشی نے کہا ہے کہ مولانا فضل الرحمان کو دباؤ میں نہ آنے پر خراج تحسین پیش کرتا ہوں، بلاول اپنے نانا کے بنائے آئین کو دفن کررہے ہیں۔عدالت پیشی کے موقع پر میڈیا سے غیر رسمی گفتگو کرتے ہوئے شاہ محمود قریشی نے کہا کہ مولانا فضل الرحمن نے بہت سمجھ بوجھ سے کام لیا ہے، وہ جانتے ہیں کہ ترمیم عجلت میں نہیں کی جاتی۔ وہ کسی کے دباؤ میں نہیں آئے، میں انہیں خراج تحسین پیش کرتا ہوں۔شاہ محمود قریشی کا کہنا تھا کہ میں تمام سیاسی جماعتوں کو کہنا چاہتا ہوں کہ یہ مسودہ تسلی سے پڑھیں اور اس پر بحث مباحثہ ہو۔ آئینی ترمیم حساس اور سنجیدہ مسئلہ ہے، عجلت میں ترمیم کرنا نامناسب ہے۔ آئینی مسودہ کو سیاسی جماعتوں سے چھپا کر رکھا گیا ہے، اس نے اسمبلی میں آنا ہے، پتا چل جائے گا۔ بہتر ہے س کو سب کے سامنے پیش کیا جائے اور بحث کروائی جائے۔انہوں نے کہا کہ50 سے زائد ترامیم ہیں، عجلت کیوں دکھا رہے ہیں؟۔ وکلا کمیونٹی نے بھی اس کی محالفت کر دی ہے، یہ ترمیم آئین کا جنازہ نکالنے کا مترداف ہے۔ بلاول کو پیغام دیتا ہوں کہ آپ کے نانانے 1973 کا آئین اتفاق رائے سے بنایا تھا، آپ اپنے نانا کے آئین کو دفن کررہے ہیں۔شاہ محمود قریشی نے کہا کہ یہ ترمیم عدلیہ کی آزادی پر حملہ ہے۔ پاکستان کے وکلا نے آئین کے لیے لمبی تحریک چلائی۔ یہ ایسی ترمیم ہے جو آئین کی ساکھ کو تبدیل کردے گی۔ آئین کی ساکھ کو تبدیل کرنے والی ترمیم غیر آئینی ہے۔انہوں نے کہا کہ فلور کراسنگ کی اجازت دی گئی تو پارلیمنٹ بکرا منڈی بن جائیگی، پارلیمنٹ نامکمل ہے پی ٹی آئی کو ابھی مخصوص نشستیں نہیں ملیں، نامکمل پارلیمنٹ یہ ترمیم نہیں کر سکتی۔انہوں نے مزید کہا کہ آبادی کے اضافے پر اسمبلی کی سیٹیں بڑھی جاتی ہیں، بلوچستان کی سیٹوں پر کیوں اضافہ کر رہے ہیں، اگر ایسا ہوا تو سندھ اور سرائیکی بیلٹ سے بھی سیٹوں میں اضافے کا مطالبہ آئیگا، حکومت کو عدلیہ کی تعیناتی اور تبادلوں کا اختیار نہیں ہونا چاہیے، یہ 73ء کے آئین کی شکل بگاڑ رہے ہیں۔

بلاول بھٹوزرداری اپنے نانا کے بنائے آئین کو دفن کررہے ہیں، شاہ محمود قریشی

مولانا فضل الرحمان کو دباؤ میں نہ آنے پر خراج تحسین پیش کرتا ہوں، میڈیا سے غیر رسمی گفتگو

سابق وزیراعظم اور بانی چیئرمین پاکستان تحریک انصاف عمران خان کا کہنا ہے کہ آئینی ترمیم کا مقصد صرف مجھے جیل میں رکھنا ہے۔ یہ قاضی فائز عیسیٰ کو دوبارہ لا کر عدلیہ کو تباہ کرنا چاہتے ہیں۔انہوں نے کہا کہ رول آف لاء کی دھجیاں اڑائی جا رہی ہیں، اس سے بڑا ظلم ملک پر نہیں ہو سکتا، یہ ملک سے قانون کی حکمرانی ختم اور جمہوریت کا بیڑہ غرق کر رہے ہیں۔ راولپنڈی کی اڈیالہ جیل میں صحافیوں سے غیر رسمی گفتگو کرتے ہوئے انہوں نے کہا کہ آئینی عدالت کا قیام اس لیے عمل میں لایا جا رہا ہے کیوں کہ یہ سپریم کورٹ سے ڈرے ہوئے، نئی ترامیم سے ملک کا مستقبل تباہ ہو جائے گا، آئینی ترمیم کا مقصد صرف مجھے جیل میں رکھنا ہے، ان کو پتا ہے قاضی فائز عیسیٰ گیا تو انسانی حقوق کی پٹیشنز سُنی جائیں گی اسی ڈر سی یہ ملک تباہ کر رہے ہیں، عوام کو اپنے حقوق اور عدلیہ کو بچانے کے لیے کھڑا ہونا پڑے گا، میں ججز اور صحافیوں کے ساتھ کھڑا ہوں، لاہور میں پرامن جلسہ و تاریخی احتجاج کریں گے کیوں کہ یہ ہمارے مُلک کے مستقبل کا مسئلہ ہے۔عمران خان کا صحافیوں سے غیر رسمی گفتگو کرتے ہوئے کہناتھا کہ آئینی عدالت کا قیام اس لیے عمل میں لایا جا رہا ہے کیونکہ یہ سپریم کورٹ سے ڈرے ہوئے ہیں کہ اگر الیکشن کھل گیا تو سب کچھ ریورس ہو جائے گا۔ الیکشن فراڈ چھپانے کے لیے یہ سب کچھ کیا جارہا ہے۔عمران خان نے کہا کہ ججز کو دھمکیاں،لوگوں کو اغوا کرنا، رول آف لاء کی دھجیاں اڑائی جارہی ہیں اس سے بڑا ظلم ملک پر نہیں ہو سکتا، نیب ترامیم میں انہوں نے اپنے اربوں روپے معاف کروا کر اپنی چوری کو تحفظ دیا، یہ سب کچھ ملکی مفاد کے خلاف ہو رہا ہے، ایک سیاسی جماعت کو ختم کرنے سے سیاسی عدم استحکام بڑھے گا۔عمران خان کا کہنا تھا کہ ترمیم لانے والوں کے پیسے باہر پڑے ہوئے ہیں، حکومت میں بیٹھے لوگ عدلیہ کو آزاد نہیں دیکھنا چاہتے، اشرافیہ کا مفاد اور ملکی مفاد آپس میں متضاد ہیں، 6 ماہ میں 4 ہزار پاکستانی کمپنیاں دبئی میں رجسٹرڈ ہوئیں، ان کو تو فرق نہیں پڑنا ان کا پیسہ اور جائیدادیں باہر ہیں، محسن نقوی کی اہلیہ کی 500 ملین ڈالر کی پراپرٹی دبئی لیکس میں سامنے آئی اب ہم قرضے لیکر ملک چلارہے ہیں اسی لئے مہنگائی قابو میں نہیں آرہی۔انہوں نے مزید کہا کہ عوام کو اپنے حقوق اور عدلیہ کو بچانے کے لئے کھڑا ہونا پڑے گا، میں ججز، عدلیہ اور صحافیوں کے ساتھ کھڑا ہوں، یہ قاضی فائز کو دوبارہ لا کر عدلیہ کو تباہ کرنا چاہتے ہیں، یہ سمجھتے ہیں ہم اسکے خلاف خاموش رہیں گے، ہم اسکے خلاف بھرپوراحتجاج کریں گے، لاہور میں 21 تاریخ کو پرامن جلسہ ہوگا۔

یہ ملک تباہ کررہے ہیں،آئینی ترمیم کا مقصد مجھے جیل میں رکھنا ہے، عمران خان

ان کو پتا ہے اگر جسٹس قاضی فائز عیسیٰ گئے تو انسانی حقوق کی پٹیشنز سنی جائیں گی،جیل میں صحافیوں سے گفتگو

سپریم کورٹ میں مجوزہ آئینی ترمیم کو کالعدم قرار دینے کی درخواست دائر کردی گئی۔سپریم کورٹ میں درخواست عابد زبیری، شفقت محمود، شہاب سرکی، اشتیاق احمد خان، منیر کاکڑ و دیگر کی جانب سے دائر کی گئی جس میں وفاق، چاروں صوبوں، قومی اسمبلی، سینیٹ و دیگر کو فریق بنایا گیا ہے۔دائر درخواست میں استدعا کی گئی ہے کہ مجوزہ آئینی ترمیم کو غیر آئینی قرار دیا جائے۔درخواست میں کہا گیا ہے کہ مجوزہ آئینی ترمیم کو اختیارات کی تقسیم اور عدلیہ کی آزادی کے خلاف قرار دیا جائے، وفاقی حکومت کو آئینی ترمیم سے روکا جائے، مجوزہ آئینی ترمیم کو کالعدم قرار دیا جائے، عدلیہ کی آزادی، اختیارات اور عدالتی امور کو مقدس قرار دیا جائے۔درخواست میں مزید استدعا کی گئی کہ پارلیمنٹ اگر آئینی ترمیم کر لے تو صدر مملکت کو دستخط کرنے سے روکا جائے۔

مجوزہ آئینی ترمیم کو کالعدم قرار دینے کیلئے سپریم کورٹ میں درخواست دائر کردی گئی

پارلیمنٹ اگر آئینی ترمیم کرلے تو صدر مملکت کو دستخط کرنے سے روکا جائے، درخواست میں استدعا

حکومتی وفود کی رات گئے ،آنیاں جانیاں، رابطے اور جوڑ توڑ سب ناکام ہوگئے اور آئینی ترامیم غیر معینہ مدت کے لیے مؤخر کردی گئیں۔ تفصیلات کے مطابق سیاسی جوڑ توڑ میں ناکامی ،مجوزہ آئینی ترامیم کیلئے بلایا جانے والا سینیٹ کا اجلاس غیر معینہ مدت کیلئے ملتوی کردیا گیا ،مسلم لیگ ن کے سینیٹر عرفان صدیقی نے تصدیق کردی۔سینیٹ کا اجلاس غیرمعینہ مدت تک ملتوی کردیا گیا،وفاقی کابینہ کا اجلاس بھی پھر ملتوی کر دیا گیا،اس حوالے سے میڈیا سے گفتگو کرتے ہوئے عرفان صدیقی کا کہنا تھا کہ ترمیم آنے میں ہفتہ دس دن بھی لگ سکتے ہیں،اگر ترمیم نہیں بھی آئی تو کوئی قیامت نہیں آجائے گی۔ان کا کہنا تھا کہ آئینی مسودہ کبھی پبلک نہیں ہوتا، پہلے یہ ایوان میں پیش ہوتا ہے، قانون مطلوبہ اکثریت مانگتا ہے، ہمیں نمبر گیم کا مسئلہ نہیں ہے۔انہوں نےمزید کہا کہ آئینی ترمیم ہو جائے گی اس میں کوئی رکاوٹ نظر نہیں آتی، مولانا فضل الرحمان نے وقت مانگا ہے، وہ بہت ساری چیزوں پر مطمئن تھے، مسودے میں کچھ نکات پر اتفاق کا مسئلہ ہے جو ہر فریق کا حق ہے۔سینیٹر عرفان صدیقی کا مزید کہنا تھا کہ قومی اسمبلی کے نئے سیشن میں ترامیم آجائیں گی۔ کمیٹی میں کوئی کسی کا محتاج نہیں تھا۔ پی ٹی آئی ارکان کے پاس ضمانت دینے کے لئے کوئی اتھارٹی نہیں تھی۔ پی ٹی آئی والے یہاں متفق ہوکر اڈیالہ چلے بھی جائیں اور بانی پی ٹی آئی کہے میں نہیں مانتا تو بات ختم ہو جائے گی۔ پی ٹی آئی کی مجبوری ہم سمجھتے ہیں۔واضح رہے کل ہونے والے پارلیمنٹ کے اجلاس میں آئینی ترامیم کا مسودہ پیش کیا جانا تھا مگر رات گئے تک حکومت کو ترامیم کی منظوری کے لیے مطلوبہ اکثریت نہ ملنے پر اسپیکر اور چیئرمین سینیٹ نے پارلیمنٹ کے دونوں ایوانوں کے اجلاس ملتوی کرکے آج پھر اجلاس طلب کیےتھے۔

حکومت دو تہائی اکثریت ثابت کرنے میں ناکام،آئینی ترامیم کابل غیر معینہ مدت تک مؤخر

سیاسی جوڑ توڑ میں ناکامی ،مجوزہ آئینی ترامیم کیلئے بلایا جانے والا سینیٹ کا اجلاس غیر معینہ مدت کیلئے ملتوی کردیا گیا

ایشیئن ہاکی چیمپیئنز ٹرافی کے سیمی فائنل میں چین نے پاکستان کو پنالٹی شوٹ آؤٹ پر شکست دیدی ۔تفصیلات کے مطابق چین نے سنسنی خیز مقابلے کے بعد پاکستان کو شکست دے کر ایشین ہاکی چیمپئنز ٹرافی کے فائنل کے لیے کوالیفائی کر لیا۔چین میں جاری ایشین ہاکی چیمپئنز ٹرافی کا پہلا سیمی فائنل پاکستان اور میزبان چین کے درمیان کھیلا گیا۔جس میں مقررہ وقت یں دونوں ٹیموں نے سخت مقابلہ کیا، میچ ایک ایک گول سے برابر ہونے کے بعد فیصلہ پینلٹی شوٹ پر ہوا۔پنالٹی شوٹس میں پاکستان کوئی بھی گول نہ کر سکا جبکہ چین نے دو گول کیے۔ایونٹ کے دوسرے سیمی فائنل میں بھارت اور جنوبی افریقا کے درمیان میچ ہوگا جس میں فاتح ٹیم منگل 17 ستمبر کو فائنل میں چین سے مدمقابل ہوگی۔واضح رہے کہ پاکستان کو گروپ میچز میں صرف بھارت سے شکست ہوئی تھی جبکہ دو میچز میں فاتح اور دو میچز برابر رہے تھے۔

ایشین ہاکی چیمپنز ٹرافی، چین نے سیمی فائنل میںپاکستان کو شکست دیدی

فیصلہ پنالٹی شوٹ آؤٹ میں ہوا پاکستان کوئی بھی گول نہ کر سکا جبکہ چین دو گول کرکے فائنل میں پہنچ گیا

سلیمہ امتیاز آئی سی سی کے انٹرنیشنل پینل آف ڈیولپمنٹ امپائرز میں شامل ہونے والی پہلی پاکستانی خاتون بن گئیں۔تفصیلات کے مطابق پاکستان سے تعلق رکھنے والی خاتون کرکٹ امپائر سلیمہ امتیاز انٹرنیشنل کرکٹ کونسل (آئی سی سی) کے انٹرنیشنل پینل آف ڈیولپمنٹ امپائرز میں نامزد ہوگئیں۔سلیمہ امتیاز آئی سی سی پینل میں شامل ہونے والی پہلی پاکستانی خاتون بن گئیں۔ اس نامزدگی کے بعد وہ دو طرفہ انٹرنیشنل سیریز اور آئی سی سی ویمنز ایونٹس میں امپائرنگ کرسکیں گی۔ سلیمہ امتیاز جنوبی افریقہ ویمنز کے خلاف ٹی ٹوئنٹی ہوم سیریز میں امپائرنگ کریں گی۔پاکستان کرکٹ بورڈ (پی سی بی) کے مطابق ان کی نامزدگی کے بعد سلیمہ امتیاز خواتین کے دو طرفہ بین الاقوامی میچوں اور آئی سی سی ویمنز ایونٹس میں فرائض انجام دیں گی جو پاکستان کی کرکٹ کی تاریخ میں ایک اہم سنگ میل ہے ۔سلیمہ امتیاز کی عمر 52سال ہے اور وہ پاکستانی ویمن کرکٹر کائنات امتیاز کی والدہ ہیں۔اس حوالے سے اپنے ایک بیان میں سلیمہ امتیاز کا کہنا تھا کہ یہ صرف میرے لیے نہیں بلکہ پوری قوم کے لیے خوشی کا موقع ہے۔ مواقع فراہم کرنے پر میں پاکستان کرکٹ بورڈ (پی سی بی) کی شکرگزار ہوں۔ انہوں نے مزید کہا کہ مجھے امید ہے اس نامزدگی سے دیگر خواتین کی بھی بھرپور حوصلہ افزائی ہوگی۔

سلیمہ امتیاز آئی سی سی امپائرزپینل میں شامل ہونے والی پہلی پاکستانی خاتون بن گئیں

پاکستان کی سلیمہ امتیاز جنوبی افریقہ ویمنز کے خلاف ٹی20 ہوم سیریز میں امپائرنگ کریں گی

چیئرمین پی ٹی آئی بیرسٹر گوہر کا کہنا ہے کہ ابھی جو مسودہ لیک ہوا ہے اس کے مطابق تو کوئی بھی ان سے اتفاق نہیں کر سکتا۔اسلام آباد ہائیکورٹ کے باہر میڈیا سے گفتگو کرتےہوئے پی ٹی آئی چیئرمین بیرسٹر گوہر علی خان کا کہنا تھا کہ ہمیں مسودہ ہی نہیں دیا گیا صرف کچھ معلومات دی گئی ہیں۔ جب مسودہ ہی نہیں ملا تو اتفاق کس چیز پر پیدا کرنا ہے۔ ہمارا پہلا مطالبہ تھا کہ مسودہ ہمیں دیا جائے ہم اسے دیکھیں گےانہوں نے کہا کہ جو مسودہ لیک ہوا ہے اس کے مطابق تو کوئی بھی بندہ ان کے ساتھ اتفاق رائے نہیں کر سکتا، یہ ججز کو ان کی مرضی کے خلاف ٹرانسفر کریں گے، اس کا مطلب ہے ججز کو جب مرضی ٹرانسفر کر دیا جائے گا، اگر کوئی جج نہیں جاتا تو اس سے استعفیٰ لے لیا جائے گا، عدلیہ پر قدغن لگ جائے گی۔بیرسٹر گوہر کا مزید کہنا تھا کہ سپریم کورٹ سے سارے اختیارات لیے جا رہے ہیں، متوازی عدالتیں کیسے چلیں گی، آئینی ترامیم کے معاملے پر سب جماعتوں کو آن بورڈ لیا جانا چاہیے تھا، اگر قانون کا ڈرافٹ نہیں ہے تو اتفاق رائے کس چیز پر پیدا کرنا ہے؟

جو مسودہ لیک ہوا ہے اس کے مطابق تو کوئی بھی ان سے اتفاق نہیں کر سکتا، بیرسٹر گوہر

سپریم کورٹ سے اختیارات لیے جارہے ہیں، متوازی عدالتیں کیسے چلیں گی، یہ ججز کو ان کی مرضی کیخلاف ٹرانسفر کریں گے

مجوزہ آئینی ترمیمی بل کا مسودہ سامنے آگیا جس میں مجموعی طور پر 54 تجاویز شامل ہیں۔تفصیلات کے مطابق پارلیمنٹ سے آئینی ترامیم پاس کروانے کیلئے حکومت سرتوڑ کوشش کررہی ہے جبکہ اپوزیشن ان ترامیم کو پاس ہونے سے رکوانے کیلئے سرگرم ہے۔عدلیہ سے متعلق آئینی ترامیم سے متعلق بل حکمران اتحاد کی بھرپور کوششوں کے باوجود گزشتہ روز بھی پارلیمنٹ میں پیش نہیں کیا جا سکا۔آئینی ترمیم کے معاملے پر گزشتہ روز قومی اسمبلی اور سینیٹ کا اجلاس کئی گھنٹے التوا کا شکار ہونے کے بعد رات گئے شروع ہوا اور مختصر کارروائی کے بعد دوبارہ ملتوی کردیا گیا۔اس کے علاو دوپہر 3 بجے طلب کیے جانے والا وفاقی کابینہ کا اجلاس بھی متعدد بار ملتوی کیے جانے بعد آخر میں موخر کرنا پڑا ۔میڈیارپورٹس کے مطابق مجوزہ آئینی ترمیمی پیکیج کی دستاویز منظر عام پر آگئیں، مجموعی طور پر مسودے میں54 تجاویز شامل کی گئی ہیں۔مسودے کے مطابق آئینی عدالت کو وفاقی آئینی عدالت کا نام دینے کی تجویز دی گئی ہے جبکہ سپریم جوڈیشل کونسل کے ڈھانچے کو بھی تبدیل کرنے کی تجویز مسودے میں شامل ہے تاہم ججز کی ریٹائرمنٹ کی عمر 3 سال بڑھانے کی ترمیم بھی پیکیج کا حصہ ہے۔آرٹیکل 17 میں ترمیم کے ذریعے وفاقی آئینی عدالت کی تجویز اور آرٹیکل 175 اے کے تحت ججز کی تقرری کے طریقہ کار میں بھی ترمیم کی تجویز شامل ہے،مجوزہ آئینی ترمیمی بل کے مسودے کے مطابق وفاقی آئینی عدالت کے چیف جسٹس کیلئے نام قومی اسمبلی کی کمیٹی وزیراعظم کو دے گی۔ دستاویز کے مطابق قومی اسمبلی کی کمیٹی3 سینئر ترین ججز میں سے چیف جسٹس کا انتخاب کرے گی، ججز کی تقرری کیلئے قومی اسمبلی کی کمیٹی 8 ارکان پر مشتمل ہو گی،کمیٹی ارکان کا انتخاب اسپیکر قومی اسمبلی تمام پارلیمانی پارٹی کے تناسب سے کریں گے، کمیٹی چیف جسٹس کی ریٹائرمنٹ سے 7  روز قبل سفارشات وزیراعظم کو دے گی۔مجوزہ آئینی ترمیمی بل کے مسودے کے مطابق وفاقی آئینی عدالت کے جج کی ریٹائرمنٹ کی عمر 68 سال ہو گی، سپریم کورٹ کا جج وفاقی آئینی عدالت میں 3 سال کیلئے جج تعینات ہو گا۔بل میں ہائی کورٹس سے سو موٹو لینے کا اختیار واپس لینے اور ہائی کورٹ ججز کی ایک ہائی کورٹ سے دوسری ہائی کورٹ میں تبادلے کی تجویز بھی شامل ہے۔آئینی ترمیمی بل میں ہائیکورٹس سے سو موٹو لینے کا اختیار واپس لینے کی بھی تجویز ہے۔ اس کے علاوہ ہائیکورٹس کے ججوں کی ایک ہائیکورٹ سے دوسری ہائیکورٹ تبادلے کی تجویز بھی شامل ہے۔مسودے کے مطابق سروسز چیف کی تقرری اور ایکسٹینشن کے حوالے سے آرمی ایکٹ میں کی گئی ترامیم کو آئینی تحفظ حاصل ہوگا اور اس متعلقہ قانون میں ترمیم اس وقت تک ممکن نہیں ہوگی جب تک آئین میں ترمیم نہ کرلی جائے۔آئینی ترمیمی بل میں یہ بھی تجویز شامل ہے کہ کسی بھی جج کا عہدہ خالی ہونے کی صورت میں صدر پاکستان کے پاس یہ اختیار ہوگا کہ وہ کسی ریٹائرڈ جج کو بھی آئینی عدالت کا جج تعینات کرسکتے ہیں۔مجوزہ ترمیم کے مطابق نئے چیف الیکشن کمشنر کے تقرر تک موجودہ چیف الیکشن کمشنر کام کرتے رہیں گے، صدر مملکت وفاقی آئینی عدالت کے چیف جسٹس اور دیگر جسٹسز کا تقرر کریں گے جبکہ ججز کیلئے دہری شہریت رکھنے پر پابندی لگانے کی بھی تجویز آئینی پیکیج میں شامل ہے۔ترمیم میں مزید کہا گیا ہے کہ فلور کراسنگ کرنے والے ارکان کا ووٹ گنا جائے گا، وفاقی آئینی عدالت وفاقی یا صوبائی حکومتوں کے درمیان تنازعات کا فیصلہ کرے گی اور سپریم کورٹ میں زیر سماعت تمام آئینی پٹیشنز آئینی عدالت کو منتقل ہو جائیں گی۔

مجوزہ آئینی ترمیمی پیکیج کی دستاویز منظر عام پر آگئیں، مسودے میں54 تجاویز شامل

ججز کی تقرری کے طریقہ کار میں ترمیم،جبکہ ججز کیلئے دہری شہریت رکھنے پر پابندی لگانے کی بھی تجویز آئینی پیکیج میں شامل ہے

عوامی مسلم لیگ کے سربراہ شیخ رشید نے جمعیت علماء اسلام (جے یو آئی) کے سربراہ مولانا فضل الرحمان کو پہلے مرحلے کا فاتح قرار دے دیا۔ سابق وزیر داخلہ شیخ رشید کا کہناہے کہ مولانا فضل الرحمان نے آئینی ترمیم کے مسودے کا پہلا رائونڈجیت لیا ہے، مولانا فضل الرحمان نے سب کو گھر کا راستہ دکھایا ہے۔شیخ رشید نے کہا کہ مفتی محمود مرحوم نے بھی ذوالفقار علی بھٹو کو شکست دی تھی۔ ووٹ کو عزت دینے والوں نے ووٹ کو ٹکے ٹوکری بنا دیا ہے، ووٹ کا جمعہ بازار بنا ہوا ہے۔ یہ 25 کروڑ عوام کو کیسے اعتماد میں لیں گے۔انہوں نے کہا کہ کسی کے پاس آئینی مسودے کی کاپی نہیں۔ جمہوریت پر جب بھی شب خون مارا گیا رات کے وقت مارا گیا۔سربراہ عوامی مسلم لیگ اور سابق وفاقی وزیر کا مزید کہنا تھا کہ امید ہے 30 ستمبر تک ملکی سیاست کا اتار چڑھاؤ فیصلہ کن ہو جائے گا۔ امید ہے کہ 30 ستمبر تک جمہوریت کی سیاست کا اتار چڑھاؤ فیصلہ کن ہو جائے گا۔

مولانا فضل الرحمان نے آئینی ترمیمی مسودے کا پہلا راؤنڈ جیت لیاہے، شیخ رشید

ووٹ کا جمعہ بازار بنا ہوا ہے،جو کہتے تھے ووٹ کو عزت دو انہوں نے ووٹ کو ٹکے کی ٹوکری بنا دیا،سابق وزیرداخلہ

اسلام آباد کی انسداد دہشت گردی کی عدالت نے تھانہ سنگجانی میں درج مقدمے میں گرفتار پاکستان تحریک انصاف کے اراکین قومی اسمبلی کی ضمانت منظور کرتے ہوئے انہیں رہا کرنے کا حکم دے دیا ہے۔عدالت نے تمام مقدمات میں پی ٹی آئی کے ارکان قومی اسمبلی کی ضمانت 30،30 ہزار روپے مچلکوں کے عوض منظور کرتے ہوئے پی ٹی آئی اراکین اسمبلی کو فوری رہا کرنے کا حکم دیا۔انسداد دِہشت گردی عدالت اسلام آباد کے جج ابو الحسنات محمد ذوالقرنین نے گرفتار پی ٹی آئی ایم این ایز کے خلاف تھانہ سنگجانی میں درج مقدمے میں ضمانت بعد از گرفتاری کی درخواستوں پر سماعت کی پراسیکیوٹر اور پی ٹی آئی ارکان قومی اسمبلی کے وکلا عدالت میں پیش ہوئے۔پراسیکیوٹر نے موقف اختیارکیا کہ ایم این اے احمد چٹھہ مقدمے میں نامزد ہیں۔ مقدمے میں جو دفعات لگائی گئی ہیں ان کی سزا کم سے کم 3 سال ہے ضمانت منظور نہ کی جائے۔ جج ابو الحسنات محمد ذولقرنین نے استفسار کیا کہ شیر افضل مروت ، احمد چٹھہ اور دیگر اراکین قومی اسمبلی  سے کچھ برآمد ہوا ہے جس پر پراسیکیوٹر نے جواب دیا کہ کچھ برآمد نہیں ہوا۔ بعدازاں عدالت نے تمام مقدمات میں پی ٹی آئی کے گرفتار ایم این ایز کی 30، 30 ہزار روپے مچلکوں کے عوض ضمانت بعد از گرفتاری منظور کرتے ہوئے فوری رہا کرنے کا حکم دے دیا۔پی ٹی آئی کے گرفتار ایم این ایز میں شیر افضل مروت، شیخ وقاص، زین قریشی، احمد چٹھہ، عامر ڈوگر، یوسف خان، نعیم علی شاہ اور دیگر شامل ہیں۔یاد رہے کہ 10 ستمبر کو انسداد دہشت گردی کی عدالت نے پاکستان میں نئے قانون پرامن جلسہ، جلوس اور امن عامہ بل 2024 میں وضع کردہ قواعد و ضوابط کی خلاف ورزی کرنے کے الزام میں پاکستان تحریک انصاف (پی ٹی آئی) کے گرفتارقائدین میں سے پارٹی چیئرمین بیرسٹر گوہر علی خان کو رہا جبکہ شعیب شاہین، شیر افضل مروت اور عامر ڈوگر سمیت 7 قائدین کا جسمانی ریمانڈ منظور جب کہ شعیب شاہین کو جوڈیشل ریمانڈ پر جیل بھیج دیا تھا۔انسداد دہشتگردی کی عدالت کے فیصلے کے خلاف گرفتار پی ٹی آئی رہنماؤں نے اسلام آباد ہائیکورٹ سے رجوع کیا تھا۔ اسلام آباد ہائیکورٹ نے گزشتہ روز پی ٹی آئی رہنماؤں کی درخواست پر سماعت کرتے ہوئے انسداد دہشتگردی عدالت کی جانب سے پی ٹی آئی کے گرفتار رہنماؤں کے جسمانی ریمانڈ کا فیصلہ معطل کردیا تھا۔

گرفتار پی ٹی آئی ارکان اسمبلی کی ضمانتیں منظور، عدالت کافوری رہا کرنے کا حکم

انسداد دہشت گردی عدالت نے 30،30 ہزار روپے کے مچلکوں کے عوض ضمانت منظور کی

Babar Azam's bad form results in another humiliating dismissal for him during the Champions One-Day Cup 2024.

Babar Azam Poor Form Continues, Gets Bowled By A Local Spinner During Champions Cup 2024

Pakistan&rsquo;s white-ball captain and leading batsman, Babar Azam has not been having the best time in his career.&nbsp;

With the Champions One-Day Cup 2024 <a href="https://www.tapmad.com/blog/champions-one-day-cup-2024-live-streaming-schedule/445-2-0">starting on 12th September</a>, the players have indulged in practice sessions to get into their best form before the beginning of this highly anticipated tournament.&nbsp;

One such practice session has spotlighted both promise and concern among the country&#39;s top players.&nbsp;

The practice match between Lions and Stallions added insult to Babar Azam&rsquo;s injury. He was bowled out by a local player Asghar while trying to play a weird sweep shot.&nbsp;

Babar Azam must have entered the match with high expectations, but had a very disappointing encounter.&nbsp;

The Pakistan skipper&rsquo;s form has been a topic of discussion in recent times, with the fans hoping for him to regain his form in Champions Cup Pakistan 2024.&nbsp;

In the practice match, Babar was dismissed for just 20 runs, falling prey to the spinner Mohammad Asghar.&nbsp;

His attempt to play a sweep shot, a risky move that ultimately failed, resulted in his dismissal. Babar&rsquo;s recent failure has added more disappointment to his already struggling career.&nbsp;

Babar Azam&#39;s recent form has been significantly concerning. His performance in the <a href="https://www.tapmad.com/blog/shocking-collapse-babar-azams-unbelievable-8th-duck-stuns-fans-in-test-cricket/418-2-0">Pakistan vs Bangladesh test series</a> was notably poor, including a duck in the series opener and below average scores in subsequent innings.&nbsp;

His struggling form has resulted in a decrease in his international rankings and has attracted criticism from fans and experts alike.

Will Babar Azam be able to recover from this disturbance in his form during the Champions One-Day Cup 2024?

Babar Azam Faces Backlash Due To Poor Performance In Champions Cup 2024

Related Post

Dolphins vs Markhors Live Streaming Champions Cup 2024

Stallions vs Markhors Champions Cup 2024: Fans Leave Stadium After Babar Azam’s Wicket

Dolphins vs Panthers Champions Cup 2024 3rd Match Streaming & Match Details

PAK vs ENG Series 2024 Fixtures, Squads, & Streaming Details

Dolphins vs Markhors Live Streaming Champions Cup 2024

Stallions vs Markhors Champions Cup 2024: Fans Leave Stadium After Babar Azam’s Wicket

Dolphins vs Panthers Champions Cup 2024 3rd Match Streaming & Match Details

What to watch

What Is Wrong With Football In Pakistan?

Why Does Pakistan’s Cricket Team Fail

Meri Shehzadiyan