Cricket

Entertainment

Football

راولپنڈی (این این آئی) بانی پی ٹی آئی عمران خان نے کہا ہے کہ بھارت کے خلاف ہم متحد ہیں،وہ ہمیشہ فالس فلیگ آپریشن کرکے پاکستان پرالزام لگا دیتا ہے۔سابق وزیراعظم عمران خان سے اڈیالہ جیل میں ملاقات کے بعد ان کے وکیل فیصل چوہدری نے میڈیا سے گفتگو کرتے ہوئے کہاکہ بانی پی ٹی آئی عمران خان نے واضح کہا ہے کہ بھارت کے خلاف ہم متحد ہیں، حکومت فارم 47والی ہے، بھارت اور مودی کے خلاف یکجا ہونے کا پیغام دیا ہے۔ فیصل چوہدری نے بتایا کہ عمران خان نے کہا کہ حکومت نے فیصلے کرتے ہوئے کسی کو اعتماد میں نہیں لیا، مودی کے اقدامات نے پاکستانی قوم کو متحد کردیا۔ انہوں نے کہا کہ عمران خان نے بھارت کے خلاف 2019کا موقف اپنایا، انہوں نے کہا کہ بھارت ہمیشہ فالس فلیگ آپریشن کرکے پاکستان پرالزام لگا دیتا ہے۔ انہوں نے بتایا کہ عمران خان نے پوری قوم کو پاکستان کے ساتھ کھڑے رہنے کا کہا ہے، ان سے قومی سلامتی کمیٹی کے فیصلوں پر کوئی بات نہیں ہوئی، انہوں نے کہا ہے میں ملاقات کیلئے آتا رہوں، بانی کی بہنیں الزام لگا رہی ہیں، جو ملاقات کررہے ہیں وہ مشکوک ہیں، یہ ان کا غصہ ہوسکتا ہے۔ انہوں نے کہا کہ عثمان گل اور ظہر عباس بانی پی ٹی آئی کے وکیل ہیں، کسی کے ساتھ بیک ڈور مذاکرات نہیں ہورہے ہیں۔

بھارت کیخلاف ہم متحد ہیں، بانی پی ٹی آئی عمران خان کا جیل سے اہم پیغام

بھارت ہمیشہ فالس فلیگ آپریشن کرکے پاکستان پرالزام لگا دیتا ہے، سابق وزیراعظم

اسلام آ باد(این این آئی)سیکریٹری جنرل اقوام متحدہ انتونیو گوتریس  نے جنوبی ایشیا میں امن کیلئے پاکستان کی کوششوں کو سراہتے ہوئے کہاہے کہ دنیا اس اہم وقت میں خطے میں کسی قسم کی کشیدگی کی متحمل نہیں ہو سکتی جبکہ وزیراعظم شہبازشریف نے پاکستان کے خلاف بھارتی الزامات کو بے بنیادقراردیتے ہوئے کہاہے کہ سندھ طاس کا پانی 24 کروڑ لوگوں کی لائف لائن ہے،بھارت کی طرف سے کسی بھی مہم جوئی کی صورت میں پاکستان اپنی خودمختاری اور علاقائی سالمیت کا پوری طاقت سے دفاع کرے گا۔جاری بیان کے مطابق منگل کووزیراعظم شہبازشریف نے  اقوام متحدہ کے سیکریٹری جنرل انتونیو گوتیرس کے ساتھ ٹیلی فونک رابطہ کیا جس میں جنوبی ایشیا کی صورت حال پر توجہ مرکوز کی گئی۔ وزیراعظم نے کہا کہ پاکستان نے دہشت گردی کے خلاف عالمی جنگ میں بڑی قربانیاں دی ہیں اور وہ دہشت گردی کی تمام شکلوں اور مظاہر میں مذمت کرتا ہے۔پاکستان کے خلاف بھارتی  الزامات کو بے بنیاد قرار دیتے ہوئے وزیر اعظم نے پاکستان کو پہلگام واقعہ سے جوڑنے کی کسی بھی کوشش کو دوٹوک الفاظ میں مسترد کیا اور واقعے کی شفاف اور غیر جانب دارانہ تحقیقات کے اپنے مطالبے کا اعادہ کیا۔وزیر اعظم نے کشمیریوں کی جدوجہد آزادی کو غیر قانونی قرار دینے کی بھارتی کوششوں کے ساتھ ساتھ بھارت کے غیر قانونی طور پر مقبوضہ جموں و کشمیر میں اس کی وسیع پیمانے پر ریاستی سرپرستی میں دہشت گردی پر شدید تشویش کا اظہار کیا۔وزیراعظم نے بھارت کے غیر قانونی اور غیر ذمہ دارانہ اقدامات کو ناقابل قبول قرار دیتے ہوئے کہا کہ سندھ طاس کا پانی 24 کروڑ لوگوں کی لائف لائن ہے۔وزیراعظم نے کہا کہ بھارت کی طرف سے کسی بھی مہم جوئی کی صورت میں پاکستان اپنی خودمختاری اور علاقائی سالمیت کا پوری طاقت سے دفاع کرے گا۔وزیر اعظم نے اقوام متحدہ کے سیکریٹری جنرل سے مطالبہ کیا کہ وہ بھارت کو ذمہ داری اور تحمل سے کام لینے کا مشورہ دیں۔ وزیراعظم نے کہا کہ مقبوضہ جموں و کشمیر کا حل طلب مسئلہ جنوبی ایشیا میں عدم استحکام کی بنیادی وجہ ہے ، اقوام متحدہ سلامتی کونسل کی متعلقہ قراردادوں کے مطابق اس کے منصفانہ حل کے لیے اپنا کردار ادا کرے۔وزیراعظم نے بین الاقوامی برادری کے ذمہ دار رکن اور اقوام متحدہ کی سلامتی کونسل کے غیر مستقل رکن کی حیثیت سے بین الاقوامی امن اور سلامتی کو فروغ دینے کے لیے پاکستان کے غیر متزلزل عزم کا اعادہ کیا۔اس موقع پر سیکریٹری جنرل اقوام متحدہ نے جنوبی ایشیا میں امن کے لیے پاکستان کی کوششوں کو سراہتے ہوئے کہا کہ دنیا اس اہم وقت میں خطے میں کسی قسم کی کشیدگی کی متحمل نہیں ہو سکتی۔

شہبازشریف اور سیکریٹری جنرل اقوام متحدہ کے درمیان رابطہ، بھارتی الزامات بے بنیاد قرار

دنیا اس اہم وقت میں خطے میں کسی قسم کی کشیدگی کی متحمل نہیں ہو سکتی، سیکریٹری جنرل اقوام متحدہ انتونیو گوتریس

پاکستان سپر لیگ (پی ایس ایل) 10 کے 18ویں میچ میں کوئٹہ گلیڈی ایٹرز نے ملتان سلطانزکوباآسانی 10 وکٹوں سے شکست دے دی۔کوئٹہ گلیڈی ایٹرز نے ملتان سلطان کی جانب سے ملنے والا 90 رنز کا ہدف بغیرکسی نقصان کے ساتویں اوور میںباآسانی حاصل کرلیا۔کپتان سعود شکیل 42رنز بنا کر ناٹ آؤٹ رہے، فن ایلن نے 45 رنز کی اننگز کھیلی۔ملتان سلطانز کا کوئی بھی بولر وکٹ حاصل نہیں کرسکا۔قبل ازیں کوئٹہ گلیڈی ایٹرز نے ٹاس جیت کر ملتان سلطانز کو بیٹنگ کی دعوت دی، پہلے بیٹنگ کرتے ہوئے ملتان سلطان کی پوری ٹیم محض 89رنز بناکر پویلین لوٹ گئی۔ملتان سلطانز کی جانب سے اننگز کا آغاز مایوس کن رہا، محمد رضوان 44 رنز کیساتھ ناٹ آؤٹ رہے، عثمان میر 11 رنز بناکر آؤٹ ہوئے جبکہ دیگر کوئی کھلاڑی ڈبل فگر میں داخل نہ ہوسکا۔یاسر خان5، کامران غلام3 ، کرٹس کیمفر 4، افتخار احمد 6، ڈیوڈ ولی 7، محمد حسنین 2، عبید شاہ 1 جبکہ عثمان خان اور مائیکل بریسویل بغیر کھاتے کھولے چلتے بنے۔خیال رہے یہ پی ایس ایل کی تاریخ میں ملتان سلطانز کا کم ترین ٹوٹل ہے۔ اس سے قبل ملتان سلطانز 2023 میں کراچی کنگز کے خلاف 101 رنز پر آؤٹ ہوئی تھی۔کوئٹہ گلیڈی ایٹرز کی جانب سے خرم شہزاد نے 4، فہیم اشرف اور محمد وسیم نے 2، 2 وکٹیں حاصل کیں۔

پی ایس ایل 10،کوئٹہ گلیڈی ایٹرز نے ملتان سلطانز کو10وکٹوں سے ہرا دیا

کوئٹہ گلیڈی ایٹرز نے ملتان سلطان کا دیاگیا90رنز کاہدف بغیرکسی نقصان کے7ویں اوورمیں حاصل کرلیا

پاک فوج نے ایک اور بھارتی کواڈ کاپٹر مار گرایا، پاک فوج کی جانب سے لائن آف کنٹرول پر ایک ہی روز میں بھارتی فوج کے 2 کواڈ کاپٹر مار گرائے گئے۔سیکیورٹی ذرائع کے مطابق پاک فوج نے لائن آف کنٹرول کے ستوال سیکٹر پر بھارتی فوج کا دوسرا کواڈ کاپٹر مار گرایا ہے۔بھارتی فوج کا کواڈ کاپٹر پاکستانی علاقے میں جاسوسی کررہا تھا، مار گرایا جانے والا کواڈ کاپٹرفینٹم فورہے۔اس سے قبل آج دن کوپاک فوج نے بھارتی 5 آسام رجمنٹ کا ایک کواڈ کا پٹر بھمبر کےعلاقے مناور سیکٹر میں مار گرایا تھا۔دفاعی ماہرین کا کہنا ہے کہ بھارتی فوج کی جانب سے غیر ذمہ دارانہ ایکشنز حالات میں مزید کشیدگی کا باعث بن رہے ہیں۔دفاعی ماہرین کے مطابق یہ واقعہ پاک فوج کی پیشہ ورانہ مہارت، دفاعی تیاری اور چوکسی کا منہ بولتا ثبوت ہے۔ دشمن کی طرف سے اس طرح کی حرکتیں خطے کے امن کو سبوتاژ کرنے کی دانستہ کوششیں ہیں۔دفاعی ماہرین نے کہاکہ پاک فوج ہر قسم کی جارحیت کا منہ توڑ اور مؤثر جواب دینے کے لیے ہمہ وقت تیار ہے۔ دوسری جانب بھارت کی جانب سے یہ سرحدی درآندازی، جارحیت اور غیر ذمہ دارانہ اقدامات حالات میں مزید کشیدگی کا باعث بن رہے ہیں اور جارحیت کسی بھی ناخوشگوار واقعے کا سبب بن سکتی ہے.

پاک فوج نے ایک اور بھارتی کواڈ کاپٹر مار گرایا

لائن آف کنٹرول کی خلاف ورزی پر آج ہی گرائے گئے کواڈ کاپٹرز کی تعداد دو ہوگئی

ااوٹاوا(این این آئی)لبرل پارٹی نے کینیڈا کے پارلیمانی انتخابات میں کامیابی کا اعلان کر دیا۔غیرملکی خبررساں ادارے کے مطابق فتح کے بعد اپنی تقریر میں مارک کارنی نے حامیوں سے خطاب کرتے ہوئے کہا کہ امریکی صدر ٹرمپ ہمیں توڑ کر ہم پر قبضہ کرنا چاہتے ہیں لیکن ایسا کبھی نہیں ہوگا۔ کینیڈین وزیراعظم مارک کارنی نے اعلان کرتے ہوئے کہاکہ لبرل پارٹی نے انتخابات میں کامیابی حاصل کر لی ہے۔انہوں نے کہا کہ پارلیمنٹ میں تمام جماعتوں کے ساتھ تعمیری کام کرنے کے لیے پرامید ہیں، دو خودمختار ممالک کے درمیان مستقبل کے اقتصادی اور سیکیورٹی تعلقات پر بات چیت کیلیے ٹرمپ کے ساتھ بیٹھیں گے۔دوسری جانب کنزرویٹو پارٹی نے انتخابات میں شکست تسلیم کر لی۔کنزرویٹو پارٹی کا کہنا تھا کہ ہم آنے والی مخلوط حکومت کا محاسبہ کریں گے۔ غیرملکی خبر رساں ادارے کے مطابق اب تک کے لبرل پارٹی کے 114 امیدوار کامیاب ہوئے ہیں اور48 نشستوں پر برتری حاصل ہے جبکہ کنزرویٹو پارٹی کے 106 امیدوار کامیاب ہوچکے ہیں اور 43 نشستوں پربرتری حاصل ہے۔کینیڈا میں عام انتخابات کیلئے پولنگ، 2 کروڑ سے زائد ووٹرز حقِ رائے دہی استعمال کریں گیاس کے علاوہ بلاک کیوبک کے 19 اور این ڈی پی کے 2 امیدواروں نے اب تک کامیابی سمیٹی ہے۔کینیڈا کے پارلیمانی انتخابات میں 50 سے زائد پاکستانی نژاد امیدوار مختلف سیاسی جماعتوں سے قسمت آزمائی کر رہے ہیں۔تمام بڑی سیاسی جماعتوں کے لیڈر اپنا ووٹ کاسٹ کر چکے ہیں اور ووٹنگ سب سے پہلے نیو فاونڈ لینڈ اور لیبرا ڈور میں بند ہوئی۔واضح رہے کہ 343 کے ایوان میں اکثریت حاصل کرنے کیلئے کسی بھی پارٹی کو 172 نشستیں درکار ہوں گی۔الیکشن سے پہلے لبرل کے پاس 152 اور کنزریٹوز کے پاس 120 نشستیں تھیں جبکہ بلاک کیوبک کے پاس 33 اور این ڈی پی کے پاس 24 نشستیں تھیں۔مارک کارنی کا کہنا تھا کہ وہ امریکا کے صدر ڈونلڈ ٹرمپ کا مقابلہ کرنے کیلیے بہترین امیدوار ہیں کیونکہ اقتصادی بحران کے دور میں وہ کامیاب بینکار رہے ہیں۔کنزرویٹو پارٹی کے لیڈر پئیغ پولی ایوغ نے کہا کہ صدر ٹرمپ آپ ہمارے الیکشن سے ایک طرف رہیں۔ صرف کینیڈا کے عوام ہی بیلٹ باکس کے ذریعے اپنے مستقبل کا فیصلہ کرسکتے ہیں۔

کینیڈین وزیراعظم مارک کارنی نے لبرل پارٹی کی کامیابی کا اعلان کردیا

ٹرمپ ہمیں توڑ کر ہم پر قبضہ کرنا چاہتے ہیں لیکن ایسا کبھی نہیں ہوگا، مارک کارنی کی وکٹری اسپیچ

ڈی جی آئی ایس پی آر میجر جنرل احمد شریف چوہدری نے کہا ہے کہ بھارت پاکستان میں دہشت گردی پھیلا رہا ہے اور پاکستان میں ٹیرر فنانسنگ میں ملوث ہے، حال ہی میں بھارتی ہینڈلرز کی واٹس ایپ چیٹ پکڑی گئی ہیں۔راولپنڈی میں پریس کانفرنس کرتے ہوئے انہوں نے کہاکہ بھارت کے پاکستان پر دہشت گردی سے متعلق الزامات بے بنیاد ہیں۔انہوں نے کہا کہ بھارت پاکستان پر بے بنیاد الزامات عائد کررہا ہے، حال ہی میں واٹس ایپ چیٹ پکڑی گئی ہیں جن میں چار بھارتی دہشت گردوں کی شناخت ہوئی ہے جو پاکستان میں ٹیرر فنانسنگ اور ٹیررازم میں ملوث ہیں۔ڈی جی آئی ایس پی آر نے کہا کہ جہلم بس اسٹینڈ سے ڈھائی کلو گرام کا بم برآمد ہوا، پاکستان میں دہشت گردی کرنے والے بھارتی ہینڈلرز کی واٹس ایپ کا فرانزک جاری ہے۔ اس موقع پر انہوں ںے یہ وائس میسجز شرکا کو سنائے جن میں دہشت گرد فنانسنگ سے متعلق بات کررہے تھے اور شہریوں کے قتل عام کی بات کررہے تھے۔ڈی جی آئی ایس پی آر نے کہا کہ دہشت گردوں کے ہینڈلر کا نام سکھوندر ہے جو بھارتی فوج میں صوبے دار ہے، بھارتی ساختہ ڈرون پکڑا گیا جس سے دس لاکھ روپے برآمد ہوئے ہیں، ان وائسز میں ایک بھارتی آرمی افسر خود کہہ رہا ہے کہ ہم لاہور تک کام کررہے ہیں، یہ را نہیں کہہ رہی یہ بھارتی آرمی کہہ رہی ہے، یہ ٹیرر فنانسنگ کی ایک مثال ہے ایسے متعدد واقعات ہیں۔انہوں نے کہاکہ بھارت پاکستان میں دہشت گردوں کو آپریٹ کرتا ہے، 25 اپریل کو بھارتی تربیت یافتہ ایک شخص جہلم بس اڈے سے پکڑا گیا۔ گرفتار شخص مجید کے گھر سے بھارتی ڈرون برآمد ہوا، جبکہ گھر سے 10 لاکھ روپے کیش بھی ملے۔انہوں نے کہاکہ گرفتار شخص کے موبائل فون سے بھارت میں ہونے والی گفتگو پکڑی گئی۔ پہلگام حملے کو 7 روز گزر گئے لیکن ابھی تک بھارت نے کوئی ثبوت پیش نہیں کیا۔میجر جنرل احمد شریف چوہدری نے کہاکہ ہمارے پاس بھارت کے خلاف ناقابل تردید شواہد موجود ہیں، بھارت دہشتگردوں کو اسلحہ سمیت دیگر سہولت کاری بھی فراہم کرتا ہے۔انہوں نے کہاکہ گرفتار شخص کی بھارتی فوج کے صوبیدار سے ہونے والی گفتگو پکڑی گئی، جس میں دہشتگردی کی منصوبہ بندی کی جارہی تھی۔میجر جنرل احمد شریف نے پریس کانفرنس کے دوران بھارتی فوج کے آفیسر کی دہشتگرد سے ہونے والی گفتگو بھی سنائی جس میں وہ پاکستان میں موجود دہشتگرد کو ہدایات دے رہا ہے۔ اور کہہ رہا ہے کہ پاکستان میں لوگوں کی لاشیں چاہیے، ایسی کارروائی کرو کہ میڈیا پر رپورٹ ہو اور نظر آئے۔ڈی جی آئی ایس پی آر نے پریس کانفرنس میں دکھایا کہ بھارت فوج کا آفیسر پاکستان میں موجود دہشتگرد کو ویڈیو پر تربیت دے رہا ہے، اور بتا رہا ہے کہ ڈیوائس کیسے استعمال کرنی ہے۔

بھارت پاکستان سمیت خطےمیں دہشت گردی پھیلا رہا ہے، ڈی جی آئی ایس پی آر

بھارت پاکستان میں دہشت گردی میں ملوث ہے، بھارتی آرمی ہینڈلرز کی واٹس ایپ چیٹ پکڑی گئی ہیں،ترجمان پاک فوج

مودی سرکار نے پہلگام ناکام فالس فلیگ آپریشن کا سارا ملبہ بھارتی فوج کے ناردرن کمانڈ کے سربراہ پر گراتے ہوئے لیفٹیننٹ جنرل ایم وی ایس کمار کی نہ صرف چھٹی کروا دی بلکہ ان کو گرفتار کرکے ان کے خلاف اعلیٰ سطحی انکوائری کا بھی آغاز کر دیا ہے۔حاضر سروس بھارتی جنرل نے پہلگام ڈرامے کا بھانڈا پھوڑ دیا جس کے بعدلیفٹیننٹ جنرل ایم وی ایس کمار کوحراست میں لے لیا گیا۔میڈیارپورٹس کے مطابق لیفٹیننٹ جنرل ایم وی ایس کمار کی جگہ اب لیفٹیننٹ جنرل پراتک شرما یکم مئی کو انڈین آرمی کی ناردرن کمانڈ کا چارج سنبھالیں گے۔ بھارتی حکومت نے آپریشن میں انٹیلی جنس اور سیکیورٹی کی ناکامی کا سارا ملبہ جنرل کمار پر ڈال دیا ہے۔بھارتی جنرل ایم وی کمار کا کہنا ہے کہ پہلگام واقعہ پاکستان سے نہیں بلکہ ہمارے ملک سے ہی ہوا ہے ۔ سچائی بتانے پر مودی سرکار نے بھارتی جنرل فارغ کردیا ۔ جنرل ایم وی کمار نے دھمکی دی کہ سچائی پرمیرےخلاف کارروائی ہوئی توتمام ماورائے قانون اقدامات بتادونگا۔ذرائع کا کہنا ہے کہ لیفٹیننٹ جنرل ایم وی ایس کمار کو زیرِ حراست لے لیا گیا ہے،  لیفٹیننٹ جنرل ایم وی ایس کمار کو عجلت اور غیرمعمولی انداز میں مخصوص گاڑی کے ذریعے منتقل کیا جا رہا ہے۔ذرائع کے مطابق  لیفٹیننٹ جنرل ایم وی ایس کمار کو خصوصی طیارے کے ذریعے نئی دہلی منتقل کیا جا رہا ہے ، نئی دہلی میں آرمی چیف، لیفٹیننٹ جنرل کی کونسلنگ کریں گے، راج ناتھ سنگھ نے تحقیقات کا حکم دے دیا ۔ذرائع کا کہنا ہے کہ جنرل افسر کی فوجی عدالت میں پیشی متوقع ہے، جنرل افسر کی غیرمعمولی منتقلی، دہلی میں ہائی پروفائل انکوائری کا آغازکردیا گیا۔

مودی سرکار کا حکم نا ماننے پر بھارتی فوج کی ناردرن کمانڈ کے سربراہ کوگرفتارکرلیاگیا

لیفٹیننٹ جنرل ایم وی ایس کمار کی جگہ لیفٹیننٹ جنرل پراتک شرما کو انڈین آرمی کی ناردرن کمانڈ کا چارج دیدیا گیا

پاکستان سپر لیگ (پی ایس ایل) سیزن 10 کے دلچسپ مقابلے جاری ہیں،ایک روزہ بریک کے بعد آج سے پھر چوکوں چھکوں کی برسات ہوگی۔پاکستان سپر لیگ میں آج ایک میچ کھیلا جائے گا،پی ایس ایل 10 کےاٹھارہویںمیچ میں آج ملتان سلطانز اورکوئٹہ گلیڈی ایٹرز کی ٹیمیں آمنے سامنے ہوں گی ۔قذافی اسٹیڈیم لاہور میں کھیلا جانے والایہ میچ رات 8 بجے شروع ہو گا اورٹیپمیڈ پربراہ راست دکھایا جائے گا۔ کوئٹہ گلیڈی ایٹرز کی ٹیم مایہ ناز آل رائونڈر سعود شکیل کی زیر قیادت میدان میں اترے گی، دیگر نمایاں کھلاڑیوں میں مارک، چیپمین ،ریلی روسو،فن ایلن، حسن نواز،فہیم اشرف،شعیب ملک،حسیب اللہ خان،کوسل مینڈس،ابراراحمد،محمد عامر،سین ایبٹ اور کائل جیمیسن شامل ہیں۔ ملتان سلطانز کی ٹیم مایہ ناز وکٹ کیپر بلے باز محمد رضوان کی زیر قیادت میدان میں اترے گی، دیگر نمایاں کھلاڑیوں میں مائیکل بریسویل،ڈیوڈ ویلے،شائی ہوپ،کرس جارڈن،محمد حسنین،اوسامہ میر،عثمان خان،افتخار احمد اور کامران غلام شامل ہیں۔کوئٹہ گلیڈی ایٹرز کی ٹیم 5 میچز کھیل چکی ہے جن میں اس کو 3 میچز میں فتح نصیب ہوئی جبکہ دو میں شکست کاسامنا کرناپڑا۔کوئٹہ گلیڈی ایٹرز کی ٹیم ٹیبل پر 6 پوائنٹس کے ساتھ تیسرے نمبر پر ہےجبکہ ملتان سلطانز کی ٹیم 6میچز کھیل چکی ہے لیکن تاحال وہ ایک میچ جیت سکی ہے اور وہ پوائنٹس ٹیبل پر سب سے نیچے چھٹے نمبر پر ہے۔ آج کے میچ میں دونوں ٹیمیں پوائنٹس ٹیبل پر اپنی پوزیشن بہتر بنانے کی کوشش کریں گی۔

پی ایس ایل 10  میں ملتان سلطانز اورکوئٹہ گلیڈی ایٹرزکے درمیان مقابلہ آج ہوگا

میچ رات 8 بجے شروع ہو گا ،پوائنٹس ٹیبل پرکوئٹہ گلیڈی ایٹرز کے6جبکہ ملتان سلطانزکے 2پوائنٹس ہیں

انقرہ (این این آئی )پاکستان اور بھارت کے درمیان پہلگام واقعے کے بعد بڑھتی ہوئی کشیدگی پر ترک صدر رجب طیب اردوان کا ردعمل سامنے آ گیا، ترک صدر نے  پاکستان اور بھارت کے درمیان بڑھتی کشیدگی میں کمی لانے کی اپیل کی ہے۔ترک صدر طیب اردون نے کہا ہے کہ وزیر اعظم شہباز شریف کا دورہ ترکیہ خطے کی تازہ ترین پیشرفت کے فریم ورک میں ایک انتہائی حساس وقت میں ہوا۔ پاک بھارت کشیدگی میں کمی چاہتے ہیں۔میڈیارپورٹس کے مطابق انقرہ میں پریس کانفرنس سے خطاب کرتے ہوئے انھوں نے کہا کہ ہم نے خصوصی طور پر تجارت اور دفاعی صنعت میں کثیر جہتی تعاون پر بات کی۔ صدر اردوان نے کہا کہ ہم نے پاکستانی عوام کے لیے اپنی بھرپور حمایت کا اعادہ کیا، ہم اپنے خطے یا خطے سے باہر کسی بھی قسم کا تنازع نہیں چاہتے۔انھوں نے کہا کہ ہم پاکستان اور بھارت میں کشیدگی بدترین ہونے سے پہلے اس میں فوری کمی چاہتے ہیں۔ ہماری وزارت خارجہ اور دیگر ادارے صورتحال پر نظر رکھے ہوئے ہیں۔صدر اردوان نے مزید کہا کہ ترکیہ چاہتا ہے کہ پاکستان اور بھارت کے درمیان بڑھتی ہوئی کشیدگی میں جلد از جلد کمی آئے، اس سے پہلے کہ صورتحال مزید سنگین ہو۔ انہوں نے واضح کیا کہ ترکیہ کا ہمیشہ سے اصولی مؤقف رہا ہے کہ وہ اپنے خطے اور دنیا بھر میں نئے تنازعات سے گریز کا حامی ہے۔

ترک صدر نے پاکستان اور بھارت سے کشیدگی کم کرنے کی اپیل کردی

ہم اپنے خطے یا خطے سے باہر کسی بھی قسم کا تنازع نہیں چاہتے،ترک صدر کا پاکستانی عوام کیلئے اپنی بھرپورحمایت کااعادہ

پاک فوج نے لائن آف کنٹرول (ایل او سی) پر بھارتی کواڈ کاپٹر کی فضائی حدود کی خلاف ورزی کو ناکام بناتے ہوئے اسے مار گرایا ہے۔میڈیارپورٹس کے مطابق بھارتی جارحیت کا ایک اور منصوبہ پاک فوج کی مستعدی اور شجاعت کے سامنے ناکام ہو گیا۔ سیکیورٹی ذرائع کے مطابق، لائن آف کنٹرول (ایل او سی) کے بھمبر سیکٹر کے مناور علاقے میں بھارتی فوج نے کواڈ کاپٹر کے ذریعے پاکستانی فضائی حدود کی خلاف ورزی کرتے ہوئے جاسوسی کرنے کی کوشش کی، تاہم پاک فوج نے بروقت کارروائی کرتے ہوئے دشمن کا کواڈ کاپٹر مار گرایا۔سکیورٹی ذرائع کے مطابق بھمبر کے علاقے مناور سیکٹر میں دشمن نے کواڈ کاپٹر کے ذریعے جاسوسی کرنے کی کوشش کی، پاک فوج نے بروقت کارروائی کر کے دشمن کی اس مذموم کوشش کو ناکام بنا دیا۔ذرائع کا کہنا ہے کہ یہ واقعہ پاک فوج کی مستعدی، پیشہ ورانہ مہارت اور دفاعی تیاری کا منہ بولتا ثبوت ہے۔سکیورٹی ذرائع کے مطابق پاک فوج دشمن کی کسی بھی جارحیت کا فوری اور مؤثر جواب دینے کیلئے ہر دم تیار ہے، پوری قوم افواجِ پاکستان کے ساتھ مل کر دشمن کو ہر محاذ پر منہ توڑ جواب دیں گی۔یاد رہے کہ پہلگام واقعے کے بعد بھارت کی جانب سے اشتعال انگیزی اور دھمکیوں کا سلسلہ جاری تھا، اب بھارت فضائی حدود کی خلاف ورزی پر بھی اتر آیا ہے۔

ایل اوسی پربھارتی جاسوسی کی کوشش ناکام، پاک فوج نے بھارتی کواڈ کاپٹر مار گرایا

بھمبر کے علاقے مناور سیکٹر میں دشمن نے کواڈ کاپٹر کے ذریعے جاسوسی کرنے کی کوشش کی، سیکیورٹی ذرائع

امریکی صدر ڈونلڈ ٹرمپ نے دعویٰ کیا ہے کہ اب میں ملک ہی نہیں دنیا بھی چلا رہا ہوں۔امریکی صدر ٹرمپ نے ”دی اٹلانٹک“ کو دیے گئے ایک انٹرویو میں کہا ہے کہ ان کی دوسری مدت صدارت پہلی کے مقابلے میں بہت مختلف ہے، اور اب وہ نہ صرف امریکہ بلکہ پوری دنیا چلا رہے ہیں۔ انہوں نے کہا، ’پہلی بار مجھے دو کام کرنے تھے ملک چلانا اور اپنی بقا کی جنگ لڑنا کیونکہ میرے اردگرد کرپٹ لوگ موجود تھے۔ اب دوسری بار میں ملک اور دنیا دونوں چلا رہا ہوں،جو کام میں کر رہا ہوں وہ نہایت سنجیدہ ہے، اس کے باوجود میں اسے کرتے ہوئے لطف اندوز ہو رہا ہوں۔انٹرویو سے قبل ٹرمپ نے سوشل میڈیا پلیٹ فارم ”ٹروتھ سوشل“ پر ایک پوسٹ میں طنزیہ انداز میں کہا تھا کہ وہ محض یہ جاننے کے لیے اٹلانٹک کو انٹرویو دے رہے ہیں کہ آیا یہ میگزین سچ بولنے کی صلاحیت رکھتا بھی ہے یا نہیں۔صدر ٹرمپ نے کہا کہ وہ دوسری مدت میں خود کو زیادہ طاقتور محسوس کر رہے ہیں، ان کی انتظامیہ اب وفادار افراد پر مشتمل ہے اور عدالتی نظام کے ساتھ ان کا رویہ بھی پہلے سے زیادہ جارحانہ ہو گیا ہے جو بعض اوقات ان کے ایجنڈے کے راستے میں رکاوٹ بنتا ہے۔

اب میں صرف ملک ہی نہیں دنیا بھی چلا رہاہوں، ٹرمپ نے نیا دعویٰ کردیا

میرا کام انتہائی سنجیدہ ہونے کے باوجود اسے کرتے ہوئے لطف اندوز ہو رہا ہوں،امریکی صدر

سب سے زیادہ خوش قوموں میں پاکستانیوں نے بھارتیوں کو پیچھے چھوڑ دیا۔سروے اور اعداد و شمار جمع کرنے کے معتبر ترین ادارے گیلپ نے دنیا کی خوش باش قوموں کی فہرست برائے سال 2025 جاری کردی۔گیلپ نے خوشی (ہیپی نیس) انڈیکس جاری کردیا جس میں 44 خوش باش قوموں میں سے پاکستانیوں کا نمبر 8 واں ہے۔ سروے کے مطابق   72 فیصد پاکستانیوں نے اپنی زندگی سے مطمئن ہونے کا اظہار کیا، چاہے ان کی زندگی میں کتنے ہی چیلنجز کیوں نہ ہوں۔اس کے برعکس، بھارت کااس فہرست میں سب سے آخری نمبر ہے۔صرف 31 فیصد بھارتی شہریوں نے خود کو خوش قرار دیا، جبکہ 34 فیصد نے زندگی سے مایوس ہونے کی بات کی۔اس  سروے میں چین سب سے خوش قوم کے طور پر سامنے آیا، جہاں 86 فیصد عوام نے اپنی زندگی سے اطمینان کا اظہار کیا، یوں چینی عوام نے یورپی ممالک کو بھی پیچھے چھوڑ دیا۔

سب سے زیادہ خوش قوموں میں پاکستانیوں نے بھارتیوں کو بھی پیچھے چھوڑ دیا

خوشی (ہیپی نیس)کے انڈیکس میں پاکستان کا 44 ممالک میں 8 واں نمبر ہے، گیلپ سروے

پاکستان سے حج آپریشن کا باقاعدہ آغاز ہوگیا، اسلام آباد ایئرپورٹ سے پہلی حج پرواز عازمین حج کو لیکر مدینہ منورہ روانہ ہوگئی، وفاقی وزیرمذہبی امورسردار محمد یوسف اور سعودی سفیر نے عازمین حج کو رخصت کیا۔ اس موقع پر وفاقی وزیر کو روڈ ٹو مکہ امیگریشن منصوبے پر بریفنگ دی گئی۔تفصیلات کے مطابق پاکستان سے حج آپریشن 2025 کا باضابطہ آغاز ہو گیا۔ اس سلسلے کی پہلی حج پرواز پی کے 713 آج صبح 4 بج کر 45 منٹ پر 442 عازمین حج کو لے کر اسلام آباد سے مدینہ منورہ روانہ ہوئی۔عازمین کو الوداع کہنے کے لیے وفاقی وزیر مذہبی امور سردار محمد یوسف، پاکستان میں سعودی سفیر نواف بن سعید المالکی اور پی آئی اے کے چیف ایگزیکٹو آفیسر ائیر وائس مارشل عامر حیات اسلام آباد ایئرپورٹ پر موجود تھے۔ اس موقع پر عازمین حج کو خصوصی تحائف بھی دیے گئے۔ترجمان قومی ایئرلائن کے مطابق کوئٹہ سے پہلی حج پرواز صبح 10 بجے 170 حجاج کو لے کر روانہ ہوگی۔ترجمان کے مطابق لاہور سے پہلی حج پرواز رات 10 بجے 323 مسافروں کو لے کر مدینہ روانہ ہوگی۔پہلے مرحلے میں عازمین حج کی خصوصی پروازیں مدینہ کے لیے روانہ ہوں گی، دوسرے مرحلے میں عازمین حج کی پروازیں جدہ جائیں گی۔اسلام آباد اور کراچی ایئرپورٹ پر سعودی حکومت کے اشتراک سے روڈ ٹو مکہ کی سہولیات دستیاب ہوں گی۔روڈ ٹو مکہ سے عازمین حج سعودی امیگریشن پاکستان سے کرواکے جائیں گے۔ قومی ایئرلائن کا قبل از حج آپریشن 31 مئی تک جاری رہے گا، بعد از حج آپریشن کا آغاز 10 جون سے 10 جولائی تک رہے گا۔

پاکستان سے حج آپریشن کا باقاعدہ آغاز، پروازوں کی روانگی شروع ہوگئی

اسلام آباد اور کراچی ایئرپورٹس پر سعودی حکومت کے تعاون سےروڈ ٹو مکہ سہولت بھی فراہم کی گئی ہے

وزیراعظم شہباز شریف کی زیر صدارت مشترکہ مفادات کونسل (سی سی آئی) نے دریائے سندھ سے نئی نہریں نکالنے کا منصوبہ ختم کرنے کی منظوری دے دی، جس کے بعد وفاقی حکومت نے نہریں نکالنے کا منصوبہ واپس لے لیا، اجلاس میں فیصلہ کیا گیا کہ سی سی آئی سے باہمی اتفاق کے بغیر کوئی نئی نہریں نہیں بنائی جائیں گی، وفاق اور تمام صوبوں کی نمائندگی کے ساتھ ایک کمیٹی تشکیل دی جا رہی ہے جو تمام صوبوں کے پانی کے استعمال کے لیے حل تجویز کرے گی۔ مشترکہ مفادات کونسل اجلاس کا اعلامیہ بھی جاری کردیاگیا اعلامیے کے مطابق وزیراعظم شہباز شریف کی زیر صدارت مشترکہ مفادات کونسل (سی سی آئی) کا 52 واں اجلاس وزیراعظم ہاؤس اسلام آباد میں منعقد ہوا جس میں بھارت کے غیر قانونی اقدامات کی شدید مذمت اور نئی نہروں کی تعمیر پر اہم فیصلہ کیا گیا۔اعلامیے کے مطابق سی سی آئی نے فیصلہ کیا کہ باہمی افہام و تفہیم کے بغیر کوئی نئی نہریں نہیں بنائی جائیں گی۔اعلامیے میں کہا گیا کہ جب تک صوبوں کے درمیان مکمل اتفاق رائے نہیں ہوتا وفاقی حکومت نئی نہروں کی تعمیر آگے نہیں بڑھائے گی۔اجلاس میں تمام صوبوں کو شامل کرتے ہوئے زرعی پالیسی اور پانی کے انتظام کے بنیادی ڈھانچے کے لیے طویل المدتی متفقہ روڈ میپ تیار کرنے پر زور دیا گیا اور واضح کیا گیا کہ تمام صوبوں کے پانی کے حقوق 1991 کے پانی کی تقسیم کے معاہدے اور واٹر پالیسی 2018 کے تحت محفوظ ہیں۔اجلاس میں پہلگام حملے کے بعد بھارت کے یکطرفہ، غیر قانونی اور غیر ذمہ دارانہ اقدامات کی بھرپور مذمت کی گئی۔سی سی آئی نے قومی امنگوں کی ترجمانی کرتے ہوئے ممکنہ بھارتی جارحیت اور مس ایڈونچر کے تناظر میں پوری قوم کے لیے اتحاد اور یکجہتی کا پیغام دیا۔اعلامیے میں کہا گیا کہ پاکستان ایک پرامن اور ذمہ دار ملک ہے، لیکن اپنے دفاع کی مکمل صلاحیت رکھتا ہے۔تمام صوبائی وزرائے اعلیٰ نے بھارت کے غیر قانونی اقدامات کے خلاف وفاقی حکومت کے شانہ بہ شانہ کھڑے ہونے کا عزم ظاہر کیا۔سی سی آئی نے سینیٹ میں بھارتی غیر قانونی اور غیر ذمہ دارانہ اقدامات کے خلاف پیش کی گئی قرارداد کی بھی بھرپور حمایت کا اعلان کیا۔اجلاس کے بعد میڈیا سے گفتگو کرتے ہوئے وزیر اعلیٰ خیبر پختونخوا ( کے پی کے ) علی امین گنڈا پور کا کہنا تھا کہ معاہدے کے مطابق صوبوں کو پانی کا حصہ دیا گیا ہے اور ہر صوبے کو ان کے حصے کا پانی دیا جائے گا، ہم کسی کا حق کسی کو کھانے نہیں دیں گے۔علی امین گنڈاپور کا کہنا تھا کہ کسی صوبے کے مسائل ہیں تو بیٹھ کر حل کرنے کا فیصلہ کیا گیا ہے۔ان کا کہنا تھا کہ این ایف سی ایوارڈ کا مسئلہ حل ہوگیا، 10 ویں اور11 ویں این ایف سی کا مسئلہ ہے، ہمیں ضم اضلاع کا حق دیا جائے گا۔انہوں نے مزید کہا کہ جون میں مشترکہ مفادات کونسل کا اجلاس دوبارہ ہوگا اور ہمارا آئینی حق ہمیں مل جائے گا۔

مشترکہ مفادات کونسل نے دریائے سندھ سے نئی نہریں نکالنے کا منصوبہ ختم کردیا

جب تک صوبوں کے درمیان مکمل اتفاق رائے نہیں ہوتا وفاقی حکومت نئی نہروں کی تعمیر آگے نہیں بڑھائیگی، اجلاس کا اعلامیہ

پاکستان میں ذی القعد 1446 ہجری کا چاند نظر آگیا، یکم ذی القعد 1446 ہجری کل بروز منگل 29 اپریل 2025 کو ہوگی۔مرکزی رویت ہلال کمیٹی کے مطابق ملک کے مختلف علاقوں سے چاند نظر آنے کی شہادتیں موصول ہوئیں،چیئرمین مولانا عبدالخبیر آزاد نے ٹیلی فون کے ذریعے مرکزی رویت ہلال کمیٹی میں چاند نظر آنے کا اعلان کیا۔قبل ازیں اسپیس اینڈ اپر ایٹماسفیئر ریسرچ کمیشن (سپارکو) نے بھی پاکستان میں آج ذی القعدہ کا چاند نظر آنے کی پیشگوئی کی تھی۔سپارکو نے اعلان کیا تھا کہ ذوالقعدہ 1446 ہجری کے نئے چاند کی پیدائش 28 اپریل 2025 کی رات 12بج کر31منٹ پر متوقع ہے، 28 اپریل کو غروب آفتاب کے وقت نئے چاند کی عمر تقریباً 18 گھنٹے اور 51 منٹ ہوگی۔ملک کے ساحلی علاقوں میں غروب آفتاب اور چاند کے نکلنے کا دورانیہ 53 منٹ ہونے کی توقع ہے، یہ صورتحال نئے چاند کی رویت کیلئے سازگار ہیں۔فلکیاتی پیرا میٹرز کی بنیاد پر ذوالقعدہ کا نیا چاند 28 اپریل 2025 کی شام کو صاف موسمی حالات میں ممکن ہے نتیجتاً یکم ذوالقعدہ 29 اپریل 2025 کو ہونے کا امکان ہے۔

پاکستان میں ذیقعد 1446 ہجری کا چاند نظر آگیا،یکم ذی القعد کل ہوگی

ملک کے مختلف حصوں سے چاند نظر آنے کی متعدد شہادتیں موصول ہوئیں، مرکزی رویت ہلال کمیٹی

اسلام آباد ہائیکورٹ کے جج جسٹس بابر ستار کا عبوری آرڈر قائم مقام چیف جسٹس کے ڈویژن بنچ سے معطل ہونے پر نیا تنازع کھڑا ہوگیا۔جسٹس بابر ستار کی ہدایت کے باوجود کیس اُن کے بنچ میں مقرر نہ ہو سکا، تاہم آرڈر معطل ہونے کے باوجود جسٹس بابر ستار نے کیس سماعت کی اور 8 صفحات پر مشتمل تحریری حکم نامہ بھی جاری کردیاجبکہ ڈی جی امیگریشن اینڈ پاسپورٹ اور ڈائریکٹر نیب کو عدالتی احکامات کی خلاف ورزی پر توہینِ عدالت کا شوکاز نوٹس جاری کرنے کے معاملے پر جسٹس بابر ستار کے آرڈر معطل ہونے کے باوجود ان کی جانب سے ایک اور آرڈر جاری کرنے پر قائم مقام چیف جسٹس اسلام آبد ہائیکورٹ سرفراز ڈوگر نے برہمی کا اظہار کیا ہے۔تفصیلات کے مطابق قائم مقام چیف جسٹس اسلام آباد ہائیکورٹ کی سربراہی میں ڈویژن بینچ نے توہین عدالت شوکاز نوٹس کیس میں جسٹس بابر ستار کا جاری حکمنامہ بھی معطل کردیا۔ڈی جی امیگریشن اینڈ پاسپورٹ نے جسٹس بابر ستار کے آرڈر کے خلاف انٹراکورٹ اپیل دائر کر رکھی ہے، قائم مقام چیف جسٹس سرفراز ڈوگر، جسٹس محمد آصف پر مشتمل ڈویڑن بینچ نے انٹراکورٹ اپیل پر سماعت کی۔قائم مقام چیف جسٹس کی سربراہی میں ڈویژن بینچ نے توہین عدالت شوکاز نوٹس کیس میں حکمنامہ معطل کیا، قائم مقام چیف سرفراز ڈوگر جسٹس بابر ستار کا آرڈر معطل ہونے کے باوجود حکم نامہ جاری ہونے پر برہم ہوئے۔وکیل ڈائریکٹوریٹ امیگریشن کے مطابق جسٹس بابر ستار نے بھی پیر کو سماعت کی اور 8 صفحات کا آرڈر بھی جاری کر دیا ہے، جس پر قائم مقام چیف جسٹس اسلام آباد ہائیکورٹ نے کہا کہ وہ آرڈر کیسے پاس کر سکتے ہیں؟ ان کے پاس تو کیس ہی نہیں؟ پٹیشن میرے پاس ڈویژن بینچ میں کلب ہے، توہین عدالت نوٹس معطل کیا ہوا ہے، جسٹس بابر ستار کا آج کا 8 صفحوں کا آرڈر بھی معطل کر رہے ہیں۔قائم مقام چیف جسٹس نے ریمارکس دیے کہ میں اس معاملے کو انتظامی جانب بھی دیکھوں گا، ایسا نہیں ہونا چاہیے، پہلے مجھے یہ دیکھنے دیں کہ اس جج نے آرڈر کیسے کر دیا۔عدالت نے انٹراکورٹ اپیل پر سماعت ملتوی کر دی۔قبل ازیںاسلام آباد ہائیکورٹ کے جج جسٹس بابر ستار کا عبوری آرڈر قائم مقام چیف جسٹس کے ڈویژن بنچ سے معطل ہونے پر نیا تنازع کھڑا ہوگیا۔جسٹس بابر ستار کی ہدایت کے باوجود کیس اُن کے بنچ میں مقرر نہ ہو سکا، تاہم آرڈر معطل ہونے کے باوجود جسٹس بابر ستار نے کیس سماعت کی اور 8 صفحات پر مشتمل تحریری حکم نامہ بھی جاری کردیا جسٹس بابر ستار کے جاری حکم نامے میں کہا گیا ہے کہ 26 مارچ کا کیس مقرر کرنے کا آرڈر ڈویژن بینچ میں چیلنج ہی نہیں ہوا تو معطل کیسے ہو سکتا ہے؟ 12 اور 26 مارچ کے آرڈرز عبوری تھے اور کیس کا حتمی فیصلہ ابھی آنا باقی ہے۔حکم نامے میں کہا گیا ہے کہ چیف جسٹس کے پاس زیرسماعت کیس میں انتظامی سائیڈ پر مداخلت کا کوئی اختیار نہیں، ڈپٹی رجسٹرار آئی ٹی بتائیں کس کے کہنے پرجوڈیشل آرڈرز ویب سائٹ سے ہٹائے؟ عدالتی ہدایت کے باوجود کیس مقرر نہ کرنےپر ڈپٹی رجسٹرار کے خلاف کیوں نہ کارروائی کی جائے؟ڈپٹی رجسٹرار جوڈیشل کو طلب کرنے پر انہوں نے نوٹ پیش کیا کہ آرڈر ڈویژن بینچ نے معطل کر دیا، ڈپٹی رجسٹرار جوڈیشل نے کیس کاز لسٹ میں شامل نہ کر کے بادی النظر میں عدالتی حکم کی خلاف ورزی کی۔حکم نامے کے مطابق ڈپٹی رجسٹرار جوڈیشل نے ہدایات کے باوجود بھی کیس سپلیمنٹری کازلسٹ میں بھی شامل نہیں کیا، ڈپٹی رجسٹرار جوڈیشل نے جواز دیا کہ ڈویژن بینچ کی ہدایت کے مطابق کیس مقرر نہیں کیا جا سکتا، بظاہر ڈویژن بینچ کی درست طور پر معاونت نہیں کی گئی کہ یہ عبوری آرڈر ہے،لا ریفارمز آرڈیننس کے تحت سنگل بینچ کے حتمی فیصلے کے خلاف ہی انٹراکورٹ اپیل دائر کی جا سکتی ہے، ریکارڈ طلب کر کے یا کسی ڈائریکشن کے ذریعے آئینی عدالت کی کارروائی میں رکاوٹ ڈالنا ناقابلِ تصور ہے۔حکمنامے میں کہا گیا ہے کہ کیس 7 مئی کو آئندہ سماعت کے لیے مقرر کیا جاتا ہے، رجسٹرار آفس کیس کازلسٹ میں شامل کرے، کیس کازلسٹ میں شامل نہیں بھی کیا جاتا تو بھی 7 مئی کو سماعت کی جائے گی، آرڈر کی کاپی تمام فریقین کو بھیجی جائے تاکہ وہ آئندہ سماعت پر اپنی حاضری یقینی بنائیں۔بعد ازاں عدالت نے ڈپٹی رجسٹرار جوڈیشل اور ڈپٹی رجسٹرار آئی ٹی کو آئندہ سماعت پر ذاتی حیثیت میں طلب کر لیا۔واضح رہے کہ جسٹس بابر ستار نے ڈی جی امیگریشن اینڈ پاسپورٹ اور ڈائریکٹر نیب کو توہینِ عدالت کا شوکاز نوٹس جاری کیا تھا، قائم مقام چیف جسٹس سرفراز ڈوگر کی سربراہی میں ڈویژن بینچ نے جسٹس بابر ستار کا آرڈر معطل کر دیا تھا۔

قائم مقام چیف سرفراز ڈوگر جسٹس بابر ستار کا آرڈر معطل ہونے کے باوجود حکم نامہ جاری ہونے پر برہم

بابر ستار آرڈر کیسے پاس کر سکتے ہیں؟ ان کے پاس تو کیس ہی نہیں؟ پٹیشن میرے پاس ڈویژن بینچ میں کلب ہے،قائمقام چیف جسٹس

بھارت نے آزادی اظہار کا گلا گھونٹنے کی اپنی روایت برقرار رکھتے ہوئے سابق پاکستانی اسپیڈ اسٹار شعیب اختر کا یوٹیوب چینل ملک بھر میں بلاک کر دیا۔تفصیلات کے مطابق پہلگام حملے کا الزام پاکستان پر دھرنے کے بعد بھارت اوچھے ہتھکنڈوں پر اُتر آیا، پاکستانی فنکاروں کے پراجیکٹس پر پابندی کے بعد بھارت میں پاکستانی کرکٹ ٹیم کے عظیم سابق فاسٹ باؤلر شعیب اختر کا یوٹیوب چینل بھی بلاک کردیا گیا۔بھارتی میڈیا کے مطابق سرکاری ذرائع کا کہنا ہے کہ وزارت داخلہ کی سفارش پر مجموعی طور پر 16 پاکستانی یوٹیوب چینلز پر پابندی عائد کی گئی ہے۔ بھارتی حکام نے الزام عائد کیا کہ یہ چینل پہلگام واقعے کے بعد غلط معلومات اور جھوٹے بیانیے کو فروغ دے رہے تھے۔ ان چینلز کے مجموعی سبسکرائبرز کی تعداد تقریباً 6 کروڑ 30 لاکھ ہے۔شعیب اختر کے چینل کو دنیا بھر میں 35 لاکھ سے زائد صارفین فالو کرتے ہیں جہاں وہ کرکٹ اور معاشرتی موضوعات پر اپنی دوٹوک اور بے لاگ رائے پیش کرتے ہیں۔اپنی بات حق اور سچائی کے ساتھ بیان کرنے والے شعیب اختر کی آواز کو دبانا اس بات کا ثبوت ہے کہ بھارت میں اختلافِ رائے کی کوئی گنجائش باقی نہیں رہی۔دنیا بھر میں جمہوریت اور آزادی رائے کے دعویدار بھارت نے ایک بار پھر اپنی حقیقت دنیا کے سامنے آشکار کر دی ہے۔ جہاں ایک طرف بھارت اقلیتوں کے حقوق سلب کر رہا ہے، وہیں اب وہ بین الاقوامی شخصیات کی آوازوں کو بھی برداشت کرنے سے قاصر دکھائی دے رہا ہے۔بھارت میں شائقین کرکٹ بالخصوص شعیب اختر کے مداح اس صورتحال پر افسوس کا اظہار کر رہے ہیں اور اس بارے میں مزید وضاحت کے منتظر ہیں۔

پہلگام واقعے پر مودی سرکار کی بوکھلاہٹ، شعیب اختر کا یوٹیوب چینل بھی بلاک

پاکستانی اسپیڈ اسٹارشعیب اختر کے چینل کو دنیا بھر میں 35 لاکھ سے زائد صارفین فالو کرتے ہیں،رپورٹ

اٹارنی جنرل آف پاکستان منصور عثمان اعوان نے کہا ہے کہ پہلے سندھ کنال کا معاملہ زیر بحث رہا، بھارت نے جو کچھ کیا سب کی توجہ اس پر ہے اور آج عالمی عدالت انصاف روانگی تھی لیکن منسوخ کردی۔سپریم کورٹ میں فوجی عدالتوں میں سویلینز کے ٹرائل کے فیصلے کے خلاف انٹرا کورٹ اپیل پر سماعت ہوئی، جسٹس امین الدین خان کی سربراہی میں 7 رکنی بینچ نے کیس کی سماعت کی۔فوجی عدالتوں میں سویلینز کے ٹرائل سے متعلق کیس میں اٹارنی جنرل نے بیان دیا کہ ملٹری ٹرائل کا سامنا کرنے والوں کو اپیل کا حق دینے کا معاملہ پالیسی میٹر ہے اور اس پر ہدایات لے کر ہی گزارشات عدالت کے سامنے رکھ سکتا ہوں ۔انہوں نے کہا کہ میں نے تو صرف گذارشات رکھی ہیں آگے وقت دینا یا نا دینا عدالت نے طے کرنا ہے، ملٹری ایکٹ میں شقیں 1967 سے موجود ہیں۔اس پر آئینی بینچ کے رکن جسٹس جمال خان مندوخیل نے کہا پارلیمنٹ نے جو کرنا ہے کرے وہ ان کا پالیسی معاملہ ہے، ہم نے صرف اس کیس کی حد تک معاملہ دیکھنا ہے۔جسٹس جمال خان مندوخیل  نے ریمارکس دیے کہ یہ پالیسی فیصلہ بھی کر لیں سول نظام ناکام ہو چکا سب کیسز فوجی عدالت بھیج دیں۔جسٹس محمد علی مظہر نے پوچھا دلائل میں کتنا وقت درکار ہوگا؟ اٹارنی جنرل نے کہا وہ 45 منٹ میں دلائل مکمل کر لیں گے۔بعد ازاں عدالت نے کیس کی مزید سماعت 5 مئی تک ملتوی کردی گئی۔

بھارتی اقدام پر آج عالمی عدالت انصاف روانگی تھی جو منسوخ کردی، اٹارنی جنرل پاکستان

پہلے سندھ کنال کا معاملہ زیر بحث رہا، اب بھارت نے جو کچھ کیا اس پر سب کی توجہ ہے، منصور عثمان اعوان

پاکستان تحریک انصاف کی سر گرم کارکن صنم جاوید اور ان کے شوہر عتیق احمد کو گرفتار کرلیا گیا،میڈیارپورٹس کے مطابق صنم جاوید اور ان کے شوہر کو گرین ٹاؤن کے علاقے سے حراست میں لیا گیا ہے۔پولیس کے مطابق صنم جاوید اور ان کے شوہر کو 9 مئی کے جلاؤ گھیرائو کے مقدمات میں گرفتار کیا گیا ہے۔رپورٹ کے مطابق پولیس کی نفری نے دونوں میاں بیوی کو حراست میں لیا اور اپنے ہمراہ لے کر روانہ ہوگئی۔اہلخانہ نے تصدیق کی کہ صنم جاوید کے ساتھ ان کے شوہر عتیق ریاض کو بھی حراست میں لیا گیا۔صنم جاوید 9 مئی کیسز کی جیل میں جاری عدالتی سماعت کے بعد کوٹ لکھپت جیل سے باہر نکلی تھیں۔رپورٹ کےپولیس اور ایف آئی اے کے مشترکہ آپریشن کے دوران پی ٹی آئی کی کارکن صنم جاوید اور ان کے شوہر عتیق احمد کو لاہور کے علاقے ٹاؤن شپ سے گرفتار کیا گیا، صنم جاوید کے خلاف 7 اے ٹی اے کی دفعات پر کیس درج ہے۔پولیس ذرائع کے مطابق صنم جاوید پر سنگین الزامات کے تحت تحقیقات جاری ہیں اور انہیں مزید تفتیش کے لیے متعلقہ تھانے منتقل کر دیا گیا ہے۔دوسری جانب صنم جاوید کے شوہر عتیق احمد کو وزیر اطلاعات پنجاب کی اے آئی ویڈیو بنا کر وائرل کرنے کے الزام میں گرفتار کیا گیا۔ ابتدائی تفتیش کے مطابق عتیق پر الزام ہے کہ وہ سوشل میڈیا پر جعلی مواد پھیلانے میں ملوث رہا ہے۔ حکام کے مطابق گرفتار شدگان سے مزید تفتیش جاری ہے اور کیسز میں ممکنہ دیگر ملزمان کی گرفتاریوں کا بھی امکان ہے۔

پی ٹی آئی کی سر گرم کارکن صنم جاوید اور ان کے شوہر عتیق احمد کو گرفتار کرلیا گیا

صنم جاوید کے شوہر کو وزیر اطلاعات پنجاب کی اے آئی ویڈیو بنا کر وائرل کرنے کے الزام میں گرفتار کیا گیا

جنوبی وزیرستان کے علاقے وانا میں واقع ایک مقامی امن کمیٹی کے دفتر میں زور دار بم دھماکہ ہوا جس کے نتیجے میں سات افراد جاں بحق اور نو زخمی ہو گئے۔ ہسپتال انتظامیہ کے مطابق دھماکے کے بعد مجموعی طور پر سولہ افراد کو زخمی حالت میں ہسپتال منتقل کیا گیا تھا، جن میں سے سات جانبر نہ ہو سکے۔میڈیارپورٹس کے مطابق اس حوالے سے ڈپٹی کمشنر کا کہناہے کہ دھماکے میں 15 افراد زخمی ہوئے ہیں، دھماکے میں امن کمیٹی کے رہنما کو نشانہ بنایا گیا۔ڈپٹی کمشنر کا بتانا ہے کہ جنوبی وزیرستان دھماکے کے زخمیوں کو ہیڈکوارٹر اسپتال وانا منتقل کیا جا رہا ہے جبکہ دھماکے میں کئی افراد ملبے تلے دب گئے ہیں۔اس حوالے سے پولیس نے بتانا کہ دھماکے سے امن کمیٹی کا دفتر مکمل طور پر تباہ ہو گیا ہے، جائے وقوعہ پر پولیس کی بھاری نفری موجود ہے، ملزمان کی تلاش کے لیے علاقے میں سرچ آپریشن جاری ہے۔پولیس کے مطابق اطلاع ملتے ہی ریسکیو ٹیمیں اور مقامی افراد فوراً جائے وقوعہ پر پہنچے اور زخمیوں کو نکالنے کے لیے امدادی کارروائیاں شروع کر دیں۔دوسری جانب وفاقی وزیرداخلہ محسن نقوی نے جنوبی وزیرستان کے وانا بازار میں امن کمیٹی کے دفتر کے قریب دھماکے کی شدید الفاظ میں مذمت کی ہے۔وفاقی وزیرداخلہ محسن نقوی نے کہا ہے کہ معصوم لوگوں کی جانوں سے کھیلنے والے عناصر کسی رعایت کے مستحق نہیں۔

جنوبی وزیرستان، وانا بازار میں بم دھماکا،7 افراد جاں بحق، متعددزخمی

دھماکے سے دفتر مکمل تباہ ، سکیورٹی فورسز نے علاقے کو گھیرے میں لیکر تحقیقات شروع کر دیں

لندن (این این آئی)لیورپول نے انگلش پریمیئر لیگ چیمپئن شپ جیت کر مانچسٹر یونائیٹڈ کا 20 ٹاپ فلائٹ ٹائٹلز کا ریکارڈ برابر کردیا۔لیورپول نے ٹوٹنہم ہوٹسپر کو ایک کے مقابلے میں پانچ گول سے ہرا کر انگلش پریمیئر لیگ ٹائٹل جیت لیا۔لیور پول نے اپنے 34 ویں میچ میں ٹوٹنہم ہوٹسپر کو آؤٹ کلاس کیا، پہلے ہی ہاف میں تین گول کردیئے، یہ گول ڈیاز، میک الیسٹر اور گیکپو نے اسکور کیے جبکہ ٹوٹنہم ہوٹسپر کا واحد گول اسی ہاف میں بنا جو ڈی سولنکی نے اسکور کیا۔دوسرے ہاف میں لیور پول کا چوتھا گول محمد صلاح نے بنایا جبکہ لیورپول کا پانچواں گول اون گول تھا، ٹوٹنہم ہوٹسپر کے کھلاڑی یوگی نے گیند اپنے ہی جال میں پہنچائی۔یوں لیورپول نے پانچ ایک سے کامیابی حاصل کر کے پوائنٹس کی تعداد 82 کر لی، جبکہ دوسرے نمبر پر موجود آرسنل کے 67 پوائنٹس ہیں۔دونوں ٹیموں کے ابھی چار چار میچز باقی ہیں، لیکن ٹائٹل لیورپول کے نام ہو گیا ہے۔لیور پول پریمیئر لیگ پانچ سال بعد جیتا ہے اور مجموعی طور پر یہ اس کا 20 واں ٹائٹل ہے.دوسری جانب مانچسٹر سٹی نے ناٹنگھم فاریسٹ کو دو صفر سے شکست دے کر مسلسل تیسری مرتبہ ایف اے کپ کے فائنل میں پہنچنے کا اعزاز حاصل کرلیا۔اس ایونٹ کا فائنل 17 مئی کو مانچسٹر سٹی اور کرسٹل پیلس کے درمیان کھیلا جائے گا۔واضح رہے کہ انگلش پریمیئر لیگ میں لیورپول کی ٹیم پوائنٹس ٹیبل پر 82 پوائنٹس کے ساتھ ٹاپ پوزیشن پر براجمان ہے۔آرسنل کی ٹیم 67 پوائنٹس کے ساتھ دوسرے جبکہ نیوکیسل یونائیٹڈ کی ٹیم 62 پوائنٹس کے ساتھ تیسرے نمبرپر ہے ۔

ٹوٹنہم ہوٹسپر کو شکست،لیورپول نے انگلش پریمیئر لیگ ٹائٹل جیت لیا

انگلش پریمیئر لیگ میں لیورپول کی ٹیم پوائنٹس ٹیبل پر 82 پوائنٹس کے ساتھ ٹاپ پوزیشن پر براجمان ہے

Former Australian opening batsman and explosive batsman David Warner has been appointed as the skipper of Karachi Kings for the upcoming edition of the Pakistan Super League.

David Warner To Lead Karachi Kings In PSL 10

Former Australian opening batsman and explosive batsman David Warner has been appointed as the skipper of Karachi Kings for the upcoming edition of the Pakistan Super League.&nbsp;

The left-handed batsman will bring to the table his extensive leadership and decades-long playing experience.&nbsp;

David Warner, a winner of both the ODI and T20 World Cups, is regarded as one of the most dangerous T20 openers and has led several major cricket leagues over the past decade, including the Big Bash League (BBL).

Karachi Kings selected Warner as their first pick in the Platinum category during the PSL 10 Players Draft, which took place on January 13, 2025, at the historic Hazoori Bagh in Lahore.

Karachi Kings&rsquo; owner, Salman Iqbal, stated: &ldquo;We warmly welcome David Warner to the Karachi Kings family as our captain. His leadership and match-winning performances align perfectly with our team&rsquo;s vision.&rdquo;

It&rsquo;s worth noting that Karachi Kings have only won the Pakistan Super League once in 2020.&nbsp;

PSL Season 10 is set to begin on Friday, April 11, 2025, while Karachi Kings will play their opening match on Saturday, April 12, 2025, at their home ground, National Bank Stadium, Karachi, against Multan Sultans.

David Warner To Lead Karachi Kings In PSL 10

Related Post

What to watch

What Is Wrong With Football In Pakistan?

Why Does Pakistan’s Cricket Team Fail

Meri Shehzadiyan