Cricket

Entertainment

Football

وفاقی وزیر برائے مزہبی امور و ہم آہنگی سردار محمد یوسف کا کہنا ہے حاجیوں کے لیے بہترین انتظامات کیے جائیں گے، رواں سال سرکاری اسکیم کے تحت 90 ہزار افراد حج کریں گے۔لاہور میں پریس کانفرنس کرتے ہوئے وفاقی وزیر برائےمذہبی اموروہم آہنگی سردار محمد یوسف نے کہا کہ عازمین حج کو ملک کے مختلف اضلاع میں تربیت دی جا رہی ہے اور حجاج کی ٹریننگ کا دوسرا مرحلہ جلد شروع ہوگا۔سردار یوسف نے تجویز پیش کی کہ حجاج کو ٹریننگ سے پہلے ہی ویکسین دی جائے تاکہ ان کی صحت کے حوالے سے کوئی پریشانی نہ ہو۔ انہوں نے مزید بتایا کہ اس سال سرکاری حج اسکیم کے تحت 90 ہزار حاجی سعودی عرب روانہ ہوں گے حج پروازیں28مئی سے شرو ع ہوگی، ان کے انتظامات آخری مراحل میں ہیں، اس سلسلے میں وزیر اعظم کی واضح ہدایات ہیں۔انہوں نے کہا کہ اگر کوئی افسر ذمہ داری سے کام کرتا ہے تو یہ ہمارا عقیدہ بھی ہے، یہی وجہ ہے جب میں پہلے 2013 سے 2018 تک وزیر رہا، ہماری کوشش تھی کہ عام فرد حج کرسکے، اب انٹرنیشنل سطح پر حج 10 لاکھ 50 ہزار تک چلا گیا ہے، شاٹ ٹرم، 21 سے 22 روز کےلئے ہوتا ہے وہ 11 لاکھ 50 ہزار روپے میں ہو گا، جو پیسے بچ جاتے ہیں وہ حاجی کو واپس کردیے جاتے ہیں۔ان کا کہنا تھا کہ یہ حاجیوں کا حق ہے ان کو واپس دینا، باقی 2 مہینے باقی رہ گئے ہیں، حاجیوں کے لئے اچھے انتظامات ہوں گے، وہاں سعودی حکومت بہتر سے بہتر انتظامات کرتے ہیں۔سردار یوسف نے کہا کہ وزیر حج کے بتایا کہ حجاج کی سہولت کےلئے میڈیکل مشن، ٹرانسپورٹ سمیت دیگر انتظامات بہتر کیے ہیں، یہ انتظامات سعودی حکومت خود کرتی ہے، مجھے یہ آج تک اطلاع نہیں ہے کہ کسی حاجی نے بھیک مانگی ہوانہوں نے کہا کہ بھکاریوں کو لے جانے والی کمپنی کو بلیک لسٹ کر دیا جائے گا۔

رواں سال سرکاری اسکیم کے تحت 90 ہزار افراد حج کریں گے، وزیر مذہبی امور

عازمین حج کیلئے بہترین انتظامات کئے گئے ہیں، سعودی عرب جا کر خود جائزہ لیا،سردار یوسف کی پریس کانفرنس

پاکستان سپر لیگ (پی ایس ایل) کے 10ویں ایڈیشن میں پہلی بار اردو کمنٹری کا تڑکا لگانے کی تیاری کرلی گئی۔تفصیلات کے مطابق پاکستان کرکٹ بورڈ ( پی سی بی ) نے پاکستان سپر لیگ سیزن 10 کے لیے کمنٹری پینل کا اعلان کر دیا ہے۔کمنٹری پینل میں دنیائے کرکٹ کے بڑے نام شامل کیے گئے ہیں۔ پی سی بی نے پی ایس ایل کے کمنٹری پینل میں پہلی مرتبہ الیسٹر کک اور مارٹن گپٹل کو شامل کیا ہے۔دو بار کی ویمنز ورلڈ کپ فاتح آسٹریلوی خاتون کرکٹر لیزا اسٹالکر بھی پہلی بار ایچ بی ایل پی ایس ایل میں کمنٹری کریں گی۔اس کے علاوہ جے پی ڈومینی، مائیک ہیزمین، ڈومینک کارک اور مارک نکولس بھی کمنٹری پینل کا حصہ ہیں جبکہ وسیم اکرم، رمیز راجا، وقار یونس اور دیگر کمنٹیٹرز میں شامل ہیں۔اردو کمینٹری پینل میں بھی 5 کمنٹیٹرز شامل ہیں جبکہ زینب عباس اور ایرین ہالینڈ پریزینٹرز کی ذمے داریاں نبھائیں گی۔ ایچ بی ایل پاکستان سپر لیگ (پی ایس ایل) کی تاریخ میں پہلی بار، شائقین پورے ٹورنامنٹ کے دوران مکمل میچ اردو کمنٹری سے لطف اندوز ہو سکیں گے۔ پی ایس ایل میں پہلی بار مکمل اردو کمنٹری کیلئے طارق سعید، علی یونس، عقیل ثمر، مرینہ اقبال اور سلمان بٹ اپنی ذمہ داریاں نبھائیں گے۔معروف پریزینٹرز زینب عباس اور ایرن ہالینڈ میچز میں میزبانی کے فرائض سرانجام دیں گی۔اس حوالے سے چیف ایگزیکٹیو آفیسر ایچ بی ایل پی ایس ایل سلمان نصیر کا کہنا ہے کہ کرکٹ کی دنیا کے بڑے ناموں کی کمنٹیٹرز کے طور پر موجودگی سے کوریج کا بہترین معیار نظر آئے گا، پہلی بار پی ایس ایل میں مکمل طور پر اردو کمنٹری کے ذریعے ہم اپنے ُپرجوش شائقین کے بہت قریب پہنچ سکیں گے، جن کے لیے یہ ایک خوشگوار تجربہ ہوگا۔یادد رہے کہ پاکستان سپر لیگ (پی ایس ایل) کے 10ویں ایڈیشن کا آغاز 11 اپریل سے ہوگا۔اس سے قبل پی ایس ایل 10 کا آفیشل ترانہ بھی جاری کیا جا چکا ہے جس میں ابرارالحق، علی ظفر، نتاشا بیگ اور طلحہ انجم کی آوازیں شامل ہیں۔

پی ایس ایل سیزن 10 کے کمنٹری پینل اور پریزینٹرز کا اعلان کردیاگیا

پی سی بی نے پی ایس ایل کے کمنٹری پینل میں پہلی مرتبہ الیسٹر کک اور مارٹن گپٹل کو شامل کیا ہے

سپریم کورٹ نے شادی شدہ بیٹیوں کو مرحوم والد کے کوٹے پر ملازمت نہ دینا غیر قانونی اور امتیازی قرار دیتے ہوئے والد کی جگہ بیٹی کو نوکری کے لیے اہل قرار دے دیا۔سپریم کورٹ  نے سرکاری ملازم کے انتقال کے بعد بیٹی کو نوکری سے محروم کرنے کے کیس کا تحریری فیصلہ جاری کر دیا۔ جسٹس منصور علی شاہ نے 9 صفحات پر مشتمل فیصلہ تحریر کیا۔عدالتی فیصلے کے مطابق سیکشن آفیسر کی جانب سے ایک وضاحتی خط کے ذریعے رولز کو تبدیل کرنا غیر قانونی ہے، ایسی ایگزیکٹو ہدایات قانون سے بالاتر نہیں ہو سکتیں۔ شادی کی بنیاد پر بیٹیوں کو مرحوم ملازم کے کوٹے سے خارج کرنا امتیازی سلوک ہے، ایسا عمل آئین کے آرٹیکل 25، 27 اور 14 کی خلاف ورزی ہے۔تحریری فیصلے میں کہا گیا کہ شادی سے عورت کی قانونی حیثیت، اس کی ذات اور خود مختاری ختم نہیں ہو جاتی، عورت کے یہ حقوق شادی پر منحصر نہیں ہو سکتے، عورت کی مالی خود مختاری ایک بنیادی حق ہے، آئین ازدواجی اکائیوں یا سماجی کرداروں کی بنیاد کے بجائے ہر شہریوں کو انفرادی حقوق دیتا ہے جبکہ اسلام میں بھی عورت کو اپنی جائیداد، آمدنی اور مالی معاملات پر مکمل اختیار حاصل ہے۔فیصلے میں کہا گیا کہ پاکستان نے خواتین کیخلاف ہر قسم کے امتیازی سلوک کے خاتمے کے عالمی کنونشن کی توثیق کی ہے، اس کنونشن کے تحت شادی کی بنیاد پر ملازمت میں امتیازی سلوک ممنوع ہے، نسوانی قانونی نظریے کے تحت عورت کی معاشی اور قانونی خود مختاری کو تسلیم کرنا چاہیے جبکہ ایسی روایات کو ختم کرنا چاہیے جو شادی کی بنیاد پر عورتوں کو عوامی حقوق سے محروم کرتی ہیں۔سپریم کورٹ کے فیصلے میں کہا گیا کہ عدالتوں اور انتظامی اداروں کو اپنے فیصلوں میں صنفی حساس اور غیر جانبدار زبان استعمال کرنی چاہیے، شادی شدہ بیٹی شوہر پر بوجھ بن جاتی ہے جیسے الفاظ غیر مناسب ہیں، ایسے الفاظ پدر شاہی سوچ کی عکاسی کرتے ہیں اور آئینی اقدار کے منافی ہیں۔سپریم کورٹ کے جنرل پوسٹ آفس اسلام آباد و دیگر بنام محمد جلال کیس کے فیصلے کا اطلاق موجودہ کیس پر نہیں ہوتا، سپریم کورٹ نے مرحوم یا طبی بنیادوں پر نوکری سے ریٹائر ہونے پر بچوں کو ملازمت دینے کو آئین سے متصادم قرار دیا تھا۔سپریم کورٹ کے اس فیصلے کا اطلاق ان تقرریوں پر نہیں ہوتا جو پہلے ہی کی جا چکی ہیں، یہ اصول طے شدہ ہے کہ عدالت عظمیٰ کے فیصلے عمومی طور پر آئندہ کیلئے لاگو ہوتے ہیں۔عدالتی فیصلے کے مطابق عورت کو نوکری سے برخاست کرنے کے فیصلے کو کالعدم قرار دیا جاتا ہے اور متعلقہ محکمہ کو ہدایت کی جاتی ہے کہ درخواست گزار کی تقرری کو تمام سابقہ مراعات کے ساتھ بحال کیا جائے۔

شادی شدہ بیٹیوں کو مرحوم والد کے کوٹے پر ملازمت نہ دینا غیر قانونی ہے،جسٹس منصورعلی شاہ

سپریم کورٹ نے شادی شدہ بیٹیوں کو مرحوم والد کے کوٹے پر ملازمت نہ دینا غیر قانونی اور امتیازی قرار دے دیا

امریکی صدر ڈونلڈٹرمپ اور ایلون مسک کیخلاف ’’ ہینڈز آف‘‘ احتجاجی تحریک کا آغاز ہوگیا۔صدر ٹرمپ اور ان کے مشیر ایلون مسک کے خلاف ”ہینڈز آف“ احتجاجی تحریک شروع ہو گئی ہے۔ شکاگو، نیویارک، واشنگٹن، انٹلانٹا، ڈینور، ڈیلاس سمیت امریکا بھر میں مظاہرے شروع ہوگئے۔ اس کے علاوہ کینیڈا، برطانیہ، فرانس، جرمنی، پرتگال اور میکسیکو میں بارہ سو مقامات پر احتجاج کیا جا رہا ہے۔ مظاہرین امریکا میں حقیقی جمہوریت کی بحالی اور ٹرمپ حکومت سے عوام دشمن پالیسیاں واپس لینے کا مطالبہ کر رہے ہیں۔ہینڈز آف کے عنوان سے ہونے والے اس احتجاج نے عالمی سطح پر توجہ حاصل کی جس میں عوام نے حکومتی اقدامات کے خلاف شدید غم و غصے کا اظہار کیا۔ صرف نیویارک میں ہزاروں افراد سڑکوں پر نکل آئے جبکہ واشنگٹن ڈی سی کے نیشنل مال پر20ہزار سے زائد مظاہرین نے شرکت کی۔ ملک کی تمام 50 ریاستوں کے علاوہ کینیڈا اور میکسیکو میں بھی تقریباًبارہ سو احتجاجی مظاہرے منعقد کیے گئے۔مظاہرین نے امیگریشن پالیسیوں، تجارتی محصولات، تعلیمی بجٹ میں کٹوتیوں اور ایلون مسک کی سربراہی میں محکمہ حکومتی کارکردگی کی جانب سے وفاقی ملازمتوں میں کی گئی2لاکھ سے زائد کٹوتیوں پر شدید تحفظات کا اظہار کیا۔یورپ میں بھی احتجاجی مظاہرے کیے گئے۔ برلن، فرینکفرٹ، پیرس، اور لندن میں مقیم امریکی شہریوں نے احتجاجی ریلیوں میں شرکت کی۔ برلن میں ٹیسلا کے شوروم کے باہر مظاہرین نے ہاتھوں میں پلے کارڈز اٹھا رکھے تھے جن پرایلون، چپ رہو، کسی نے تمہیں ووٹ نہیں دیا جیسے نعرے درج تھے۔مظاہرین کا کہنا تھا کہ وہ امریکا میں جمہوریت کی بحالی، عوامی مفادات کی حفاظت اورطاقتور افراد کے ذریعے پالیسی سازی کے خلاف متحد ہو کر کھڑے ہوئے ہیں۔ ان کا مطالبہ تھا کہ حکومت فوری طور پر ان عوام دشمن پالیسیوں کو واپس لے اور حقیقی نمائندہ نظام کو بحال کرے۔

امریکا سمیت مختلف ممالک میں صدر ٹرمپ کی پالیسوں کے خلاف احتجاجی مظاہرے

ملک کی تمام 50 ریاستوں کے علاوہ کینیڈا اور میکسیکو میں بھی تقریباًبارہ سواحتجاجی مظاہرے منعقد کیے گئے

ایرانی صدر مسعود پزشکیان نے ڈونلڈ ٹرمپ کی جانب سے مذاکرات کی پیشکش پر ردعمل کا اظہار کرتے ہوئے کہا ہے کہ امریکی صدر کا غیر سنجیدہ رویہ مذاکرات کے بیان سے متصادم ہے۔ ایرانی صدر مسعود پزشکیان نے کہا ہے کہ امریکا مذاکرات کرنا چاہتا ہے تو دھمکیوں سے گریز کرے۔حال ہی میں امریکی صدر کی جانب سے ایران کے ایٹمی پروگرام پر براہ راست مذاکرات کی پیشکش کے جواب میں ایران نے سخت مؤقف اختیار کرتے ہوئے واضح کیا ہے کہ ایران برابری کی بنیاد پر مذاکرات کے لیے تیار ہے، لیکن دھمکیوں کے سائے میں نہیں۔ ٹرمپ کی مذاکرات کی پیشکش پر رد عمل دیتے ہوئے ایرانی صدر کا کہنا تھا کہ امریکا سے برابری کی بنیاد پر مذاکرات چاہتے ہیں، ایک طرف دھمکی دوسری طرف مذاکرات کی پیش کش ہے، امریکا کا غیر سنجیدہ رویہ مذاکرات کی درخواست سے متصادم ہے۔مسعود پزشکیان نے کہا کہ ایسا نہیں ہو سکتا امریکا ایک طرف مذاکرات دوسری طرف دھمکیاں دے، امریکا مذاکرات کرنا چاہتا ہے تو دھمکیوں سے گریز کرے۔واضح رہے کہ گزشتہ روز امریکی صدر ڈونلڈ ٹرمپ نے ایران کو براہِ راست مذاکرات کی پیشکش کی تھی۔امریکی صدر ڈونلڈ ٹرمپ نے صحافیوں سے گفتگو کرتے ہوئے کہا تھا کہ ایران سے براہِ راست بات چیت بہتر ہوگی کیونکہ یہ تیز تر عمل ہے اور اس سے دوسرے فریق کو بہتر سمجھنے کا موقع ملتا ہے بہ نسبت اس کے کہ کسی مصالحت کار کے ذریعے بات کی جائے۔ڈونلڈ ٹرمپ نے مزید کہا کہ ایران پہلے مصالحت کاروں کو استعمال کرنا چاہتا تھا، مگر شاید اب ایسا نہیں ہے، امکان ہے کہ ایران براہ راست بات چیت پر آمادہ ہوجائے گا۔

امریکا مذاکرات کرنا چاہتا ہے تو دھمکیوں سے گریز کرے، ایرانی صدر مسعودپزشکیان

امریکا مذاکرات کرنا چاہتاہے تودھمکیوں کاکیا جوازہے؟ ایک طرف دھمکیاں تودوسری طرف مذاکرات کی باتیں ، ایرانی صدر

سعودی عرب نے پاکستان سمیت 14 ممالک پر عارضی ویزا پابندی لگا دی۔میڈیارپورٹس کے مطابق سعودی عرب کی جانب سے پابندی حج سیزن کے دوران عمرہ، بزنس اور فیملی ویزوں پر لگائی گئی ہے، ویزہ پابندیاں جون کے وسط میں ختم ہونے کا امکان ہے۔نجی ٹی وی چینل کے مطابق فہرست میں پاکستان، بھارت، بنگلادیش، مصر، انڈونیشیا، عراق شامل ہیں۔نائیجیریا، اردن، الجزائر، سوڈان، ایتھوپیا، تیونس، چیمن بھی فہرست میں شامل ہیں جبکہ عارضی ویزا پابندیاں جون کے وسط میں ختم ہونے کا امکان ہے۔رپورٹس کے مطابق عمرہ ویزہ ہولڈر 13 اپریل تک سعودی عرب میں داخل ہوسکتے ہیں۔سعودی حکومت نے پاکستان کو باضابطہ طور پر فیصلے سے آگاہ کردیا ہے اور پاکستانی عمرہ ویزا ہولڈرز کو 29 اپریل تک وطن واپسی کی ہدایت کر دی ہے، پابندی کے باوجود سعودی عرب میں قیام پر 5 سال کی پابندی کا سامنا ہوسکتا ہے۔

حج سیزن،سعودی عرب نے پاکستان سمیت 14 ممالک پر عارضی ویزا پابندی لگا دی

پابندی کا اطلاق عمرہ، بزنس اور فیملی ویزوں پر ہوگا، ویزہ پابندیاں جون کے وسط میں ختم ہونے کا امکان ہے

کراچی کے علاقے عیسی نگری میں ٹریلر لگژری گاڑی سے ٹکرانے پر خاتون نے ٹریلر ڈرائیور پر گولیاں چلادیں، پولیس نے ٹریلر کے ڈائیور اور خاتون کو گرفتار کرلیا ۔میڈیارپورٹس کے مطابق کراچی میں عیسیٰ نگری کے قریب ٹریفک حادثہ پیش آیا جہاں ٹریلر اور گاڑی میں ٹکر کے بعد خاتون نے ڈرائیور پر گولیاں چلادی تاہم ڈرائیور ٹریلر سے اتر کر بھاگا اور پولیس کے پیچھے چھپ گیا۔اس واقعے کے بعد پولیس خاتون اور ٹریلر ڈرائیور کو پکڑ کر تھانے لے گئی اور مقدمہ درج کرلیا، حکام کا کہنا ہے ایک ہی ایف آئی آر میں دونوں کو نامزد کیا گیا ہے۔مقدمے کے متن کے مطابق واقعہ عیسیٰ نگری کٹ کے قریب پیش آیا تھا، ٹریلر ڈرائیور اور خاتون دونوں غفلت اور لاپرواہی سےگاڑی چلارہے تھے اس دوران جب ٹریلر نے آگے نکلنے کی کوشش کی تو گاڑی کو سائیڈ لگی۔مدعی پولیس افسر شبیر نے کہا کہ خاتون نے طیش میں آکر پستول نکالی اور ہوائی فائرنگ شروع کردی، خاتون نے اپنا نام علیشہ عامر بتایا جبکہ ٹرک ڈرائیور نے اپنا نام ظفر اقبال بتایا ہے۔رپورٹس کے مطابق خاتون کو وومن تھانے اور ڈرائیور کو پی آئی بی تھانے منتقل کردیا گیا۔پولیس کے مطابق خاتون نے نائن ایم ایم پستول کا لائسنس بھی موقع پر پیش کیا تاہم خاتون کا اسلحہ لائسنس 31 دسمبر 2023 کو ایکسپائر ہوچکا ہے، خاتون کے اسلحہ لائسنس کے اصل ہونے کی تصدیق بھی کی جارہی ہے۔

کراچی میں گاڑی سے ٹکرانے پر خاتون نے ٹریلر ڈرائیور پر گولیاں چلادیں، دونوں گرفتار

حادثےکے بعد خاتون کار سے اتری اور ڈرائیور پرگولیاں چلادیں، ڈرائیور ٹریلر سے اتر کر بھاگا اور پولیس کے پیچھے چھپ گیا

پاکستان کرکٹ ٹیم مینجمنٹ نے آج کے میچ کے دوران غیر ملکی شائقین کی جانب سے قومی کھلاڑیوں پر کی جانے والی بدزبانی اور غیر اخلاقی رویے کی شدید مذمت کی ہے۔تفصیلات کے مطابق پاکستان نے نیوزی لینڈ کے خلاف ون ڈے سیریز کا آخری میچ آج ماؤنٹ مانگانوئی کے اسٹیڈیم میں کھیلا۔جہاں افغان شائقین کی جانب سے پاکستانی کرکٹرز کیخلاف بدزبانی کا واقعہ رونما ہوا۔میڈیارپورٹس کے مطابق میچ کے دوران غیر ملکی، خصوصاً افغان شائقین نے نہ صرف پاکستانی کھلاڑیوں پر نامناسب جملے کسے بلکہ پاکستان مخالف نعرے بھی لگائے۔ اس موقع پر قومی ٹیم کے کھلاڑی خوشدل شاہ نے مداخلت کرتے ہوئے شائقین سے باز رہنے کی اپیل کی، تاہم جواباً افغان شائقین نے پشتو زبان میں مزید نازیبا الفاظ استعمال کرتے ہوئے معاملے کو مزید بگاڑ دیاجس پر پاکستانی کرکٹر کی افغان شائقین کیساتھ بات ہاتھا پائی تک پہنچ گئی۔دوسری جانب پاکستان کرکٹ ٹیم انتظامیہ نے غیر ملکی شائقین کی جانب سے قومی پلیئرز سے بد زبانی کی مذمت کی ہے۔اپنے بیان میں ٹیم انتظامیہ نے کہا ہے کہ غیر ملکی شائقین نے گراؤنڈ میں موجود کرکٹرز بارے نازیبا الفاظ ادا کیے۔ پاکستان مخالف آوازیں کسنے پر کرکٹر خوشدل شاہ نے غیر ملکی شائقین کو منع کیا۔ تاہم منع کرنے پر افغان شائقین نے پشتو میں مذید نازیبا الفاظ ادا کیے۔بتایا گیا ہے کہ دو افغان شائقین نے خوش دل شاہ سے ہاتھا پائی کی کوشش بھی کی۔ پاکستانی ٹیم کی شکایت پر 2 غیر ملکی شائقین کو سٹیڈیم سے باہر نکال دیا گیا۔

افغان شائقین کی خوشدل شاہ سے بدزبانی، پاکستان کرکٹ ٹیم مینجمنٹ کی شدید مذمت

پاکستانی ٹیم کی شکایت پر اسٹیڈیم انتظامیہ نے دو ہنگامہ خیز شائقین کو اسٹیڈیم سے باہر نکال دیا

امریکی صدر ڈونلڈ ٹرمپ نے ایران کو براہِ راست مذاکرات کی پیشکش کر دی۔امریکی صدر ڈونلڈ ٹرمپ نے صحافیوں سے گفتگو کرتے ہوئے کہاکہ ایران سے براہِ راست بات چیت بہتر ہوگی کیونکہ یہ تیز تر عمل ہے اور اس سے دوسرے فریق کو بہتر سمجھنے کا موقع ملتا ہے بہ نسبت اس کے کہ کسی مصالحت کار کے ذریعے بات کی جائے۔ڈونلڈ ٹرمپ نے مزید کہا کہ ایران پہلے مصالحت کاروں کو استعمال کرنا چاہتا تھا، مگر شاید اب ایسا نہیں ہے، صدر ٹرمپ نے کہاکہ امکان ہے کہ ایران براہ راست بات چیت پر آمادہ ہوجائے گا۔واضح رہے کہ اس سے قبل ایران نے براہ راست مذاکرات کا امکان مسترد کردیا تھا، تاہم بالواسطہ بات چیت پر آمادگی ظاہر کی تھی، عرب میڈیا کے مطابق ایران اور امریکا نےبالواسطہ بات چیت پر اتفاق کرلیا ہے۔ عرب میڈیا کا کہنا ہے کہ ایرانی ایٹمی منصوبے پر بات چیت کے ادوار اومان میں منعقد ہوں گے، اگلے تین ہفتوں میں بات چیت شروع ہونے کا امکان ہے۔یاد رہے رواں سال مارچ کے آغاز میں، صدر ٹرمپ نے انکشاف کیا تھا کہ انہوں نے جوہری معاہدے پر مذاکرات کے لیے ایران کے سپریم لیڈر آیت اللہ علی خامنہ ای کو ایک خط بھیجا ہے۔ انہوں نے کہا تھا کہ ایران سے دو طریقوں سے نمٹا جا سکتا ہے پہلا عسکری راستہ اور دوسرا معاہدہ کرنا۔ صدر ٹرمپ نے مزید کہا تھا کہ وہ معاہدہ کرنا چاہتے ہیں کیونکہ وہ ایران کو نقصان نہیں پہنچانا چاہتے، ان کے مطابق، ایرانی عوام بہت اچھے لوگ ہیں۔ تاہم، صدر ٹرمپ نے ایران کو دھمکی دیتے ہوئے یہ بھی کہا تھا کہ اگر جوہری معاہدہ نہ کیا گیا تو ایران کو سنگین نتائج بھگتنا ہوں گے۔انہوں نے اوول آفس میں صحافیوں سے بات کرتے ہوئے کہا تھا کہ انہوں نے حال ہی میں ایران کو ایک خط بھیجا ہے جس میں کہا گیا ہے کہ ایران کو فیصلہ کرنا ہوگا۔

امریکی صدر ڈونلڈ ٹرمپ نے ایران کو براہِ راست مذاکرات کی پیشکش کردی

مصالحت کاروں کےبجائے براہ راست بات چیت ایک دوسرے کوسمجھنے کا بہترموقع دیتی ہے، امریکی صدر

صدر مملکت کے ذاتی معالج ڈاکٹر عاصم حسین نے کہا ہے کہ افسوس ہے کہ سوشل میڈیا اور بھارتی چینلز من گھڑت خبریں چلا رہے ہیں۔ڈاکٹر عاصم حسین کا کہنا تھا کہ صدر مملکت آصف علی زرداری کی صحت بتدریج بہتر ہورہی ہے، کل یا پرسوں تک انہیں ہسپتال سے رخصت دیکر گھر بھیج دیا جائے گا۔کراچی میں میڈیا سے گفتگو کرتے ہوئے ڈاکٹر عاصم کا کہنا تھا کہ صدر مملکت کے ٹیسٹ ہوئے جن سے پتہ چلا کہ کورونا ہوگیا ہے،ان کی طبیعت بتدریج بہتر ہو رہی ہے،یہ کہنا کہ صدر کو کورونا نہیں ہوا بالکل غلط ہے۔انہوں نے کہا کہ آصف زرداری سے ملاقاتوں پر پابندی برقرار ہے، کورونا کی شدت اب ویسی نہیں ہے جبکہ صدر کے اہل خانہ کو مکمل آگاہی فراہم کی جا رہی ہے،پیپلز پارٹی کا اپنا فیصلہ ہے ان کی کوئی فوٹیج جاری کریں یا نہیں۔واضح رہے کہ صدر پاکستان آصف علی زرداری کورونا کا شکار ہونے کی وجہ سے کراچی کے نجی ہسپتال میں زیر علاج ہیں،گزشتہ روز وزیراعظم پاکستان شہبازشریف نے فون پر صدر مملکت کی خیریت دریافت کی تھی، اور ان کی صحت سے متعلق دریافت کیا اور نیک خواہشات کا اظہار کیا۔

صدرمملکت کی صحت بارے بھارتی چینلز اورسوشل میڈیاجھوٹی خبریں چلا رہے ہیں،ڈاکٹر عاصم

صدر مملکت کی صحت سے متعلق سوشل میڈیا پر پھیلائی جانے والی افواہیں بے بنیاد ہیں، ڈاکٹر عاصم حسین

نیوزی لینڈ نے پاکستان کو سیریز کے تیسرے اور آخری ون ڈے میچ میں شکست دیکر کلین سوئپ کردیا۔ ون ڈے سیریز میں نیوزی لینڈ نے قومی ٹیم کو وائٹ واش کردیا اور ون ڈے سیریز 0-3 سے جیت لی، پاکستانی ٹیم نے نیوزی لینڈ کی جانب سے دیے گئے 265 رنز کے ہدف تعاقب میں 221 رنز ہی بنا سکی۔ماونٹ مانگا نوئی میں گزشتہ روز ہوئی بارش کے بعد ٹاس میں تاخیر گیلی آؤٹ فیلڈ کی وجہ سے ہوئی جس کے بعد میچ کی اننگز 42، 42 اوورز تک محدود کردی گئی تھی۔پاکستان نے نیوزی لینڈ کے خلاف ٹاس جیت کر پہلے فیلڈنگ کا فیصلہ کیا جس کے بعد میزبان ٹیم نے مقررہ 42 اوورز میں 8 وکٹ کے نقصان پر 264 رنز اسکور کیے، کپتان بریسویل نے 40 بالز پر 58 رنز کی برق رفتار اننگز کھیلی۔نیوزی لینڈ کی ٹیم کی پہلی وکٹ 13 رنز پر گر گئی، نائیک کیلے 3 رنز بنا کر آؤٹ ہوگئے، رائس ماریو نے 58 رنز کی اننگز کھیلی، ڈیرل مچل 43 اور ہنری نکولس 31 رنز بنا کر پویلین لوٹ گئے، ٹم سائفرٹ نے 26 رنز بنائے، محمد عباس 11 اور مچل ہے 8 رنز بنا کر پویلین لوٹے۔میزبان ٹیم نے پہلے کھیلتے ہوئے مقررہ 42 اوورز میں 8 وکٹ کے نقصان پر 264 رنز بنائے،پاکستان کی جانب سے عاکف جاوید نے 4 وکٹیں حاصل کیں، نسیم شاہ 2، فہیم اشرف اور سفیان مقیم نے 1،1 کھلاڑی کو آؤٹ کیا۔ہدف کے تعاقب میں پاکستان ٹیم 40 اوورز میں 221 رنز بنا کر آؤٹ ہوگئی۔ اوپنر امام الحق اور عبداللہ شفیق نے اننگز کا آغاز کیا تو امام گیند لگنے کے باعث ریٹائر ہرڈ ہوگئے، اوپنر عبداللہ شفیق 33 رنز بناکر آؤٹ ہوئے۔ بابر اعظم نے 50 رنز کی اننگز کھیلی۔دیگر کھلاڑیوں میں سلمان آغا 11، عثمان خان 12، کپتان محمد رضوان 37، طبیب طاہر 33، نسیم شاہ 17، فہیم اشرف 3، محمد وسیم جونئیر صفر پر پویلین لوٹے۔ نیوزی لینڈ کی جانب سے بین سیئرز نے 5، جیکب ڈفی 2 جبکہ محمد عباس اور ڈیرل مچل نے ایک ایک وکٹ حاصل کی۔

نیوزی لینڈ نےپاکستان کو 43 رنز سے ہرا کر تین میچوں کی سیریز میں وائٹ واش کر دیا

نیوزی لینڈ کی جانب سے دیے گئے 265 رنز کے ہدف تعاقب میں پاکستانی ٹیم 221 رنز ہی بنا سکی

پاکستان 4 سال کی مدت کیلئے اقوام متحدہ کے کمیشن برائے منشیات کا رکن منتخب بن گیا۔پاکستان کے اقوام متحدہ مشن کی جانب سے جاری بیان کے مطابق پاکستان کو2026 سے 2029 تک کے لیے اقوام متحدہ کے کمیشن برائے منشیات کا رکن منتخب کیا گیا ہے۔ پاکستان کو نیویارک میں اقوام متحدہ اقتصادی و سماجی کونسل کے انتخابات میں رکن منتخب کیا گیا۔پاکستان یواین مشن کے اعلامیے کے مطابق پاکستان یو این اقتصادی و سماجی کونسل کی حمایت پر مشکور ہے، کمیشن برائے منشیات کا رکن منتخب ہونا پاکستان پر اعتماد کو ظاہر کرتا ہے۔اعلامیے میں کہا گیا کہ کمیشن برائے منشیات کا رکن منتخب ہونا پاکستان پر اعتماد اور بھروسے کو ظاہر کرتا ہے، پاکستان عالمی انسداد منشیات کی کوششوں میں اپنا مؤثر کردارادا کرنے کے لئے تیار ہے۔اعلامیے میں مزید کہا کہ گیا کہ پاکستان عالمی سطح پر انسداد منشیات کی کوششوں میں پیش پیش رہا ہے، پاکستان منشیات کی سمگلنگ، پیداوار اور استعمال کے خلاف نمایاں کردار ادا کر رہا ہے۔پاکستان نے اقوام متحدہ میں عالمی منشیات پالیسی سے متعلق مباحثوں میں ہمیشہ فعال اور تعمیری کردار ادا کیا۔

پاکستان 4 سال کیلئے اقوام متحدہ کے کمیشن برائے منشیات کا رکن بن گیا

پاکستان کو2026 سے 2029 تک کیلئے اقوام متحدہ کے کمیشن برائے منشیات کا رکن منتخب کیا گیا ہے

گجرات(این این آئی)جنوبی افریقا کے مایہ ناز فاسٹ بولر کاگیسو ربادا اچانک انڈین پریمیئر لیگ( آئی پی ایل) چھوڑ کر گھر روانہ ہوگئے۔کاگیسو ربادا آئی پی ایل میں گجرات ٹائٹنز کی نمائندگی کررہے ہیں وہ دو میچز کھیلنے کے بعد اچانک جنوبی افریقا روانہ ہوگئے، رباڈا کو گجرات ٹائٹنز نے آئی پی ایل 2025 کی میگا نیلامی میں 10 کروڑ 75 لاکھ بھارتی روپے میں خریدا تھا۔فرنچائز گجرات ٹائٹنز نے رباڈا کے آئی پی ایل چھوڑ کر وطن واپسی کے حوالے سے باضابطہ اعلان کیا۔بھارتی میڈیا کے مطابق گجرات ٹائٹنز نے ایک بیان میں کہا کہ رباڈا آئی پی ایل کے جاری سیزن سے ذاتی وجوہات کی بنا پر واپس جنوبی افریقا چلے گئے ہیں، وہ گجرات ٹائٹنز کے پہلے 2 میچز میں شامل تھے لیکن اب وہ ایک اہم ذاتی معاملے کو حل کرنے کے لیے وطن واپس لوٹ گئے ہیں۔فرنچائز نے رباڈا کی اچانک روانگی کی مزید تفصیلات فراہم نہیں کیں اور نہ ہی ان کی ممکنہ واپسی کے بارے میں کوئی اطلاع دی۔واضح رہے کہ آئی پی ایل کے پوائنٹس ٹیبل پر دو میچ جیت کر گجرات ٹائٹنز کی ٹیم چوتھی پوزیشن پر موجود ہے۔

جنوبی افریقی فاسٹ باؤلر رباڈا اچانک آئی پی ایل چھوڑ کر وطن واپس چلے گئے

رباڈا کو گجرات ٹائٹنز نے آئی پی ایل 2025 کی میگا نیلامی میں 10 کروڑ 75 لاکھ بھارتی روپے میں خریدا تھا

وزیراعلی خیبرپختونخوا علی امین گنڈا پور نے صوبے سے افغان مہاجرین کو زبردستی نہ نکالنے کا اعلان کرتے ہوئے کہا ہے کہ ملک میں جاری دہشت گردی کا واحد حل مذاکرات ہیں،این ایف سی اجلاس نہ بلایا گیا تو صوبے کے عوام، پولیس اور سرکاری ملازمین کو لے کر نکلوں گا۔وزیر اعلی خیبر پختونخوا علی امین گنڈا پور کا کہنا تھا کہ سابق فاٹا کے لوگوں کے ساتھ وعدہ خلافی کی گئی ہے۔ وفاقی حکومت نے این ایف سی پر نظر ثانی کی یقین دہانی کرائی تھی اپریل میں این ایف سی ایوارڈ کے حوالے سے حتمی فیصلہ ہونا ہے۔ اگر حق نہ ملا تو دکھاؤں گا کہ ہمارے صوبے کی عوام اتنی لاچار نہیں ہے۔علی امین گنڈاپور کی خیبرپختونخوا ہاؤس اسلام آبادمیں پریس کانفرنس کرتے ہوئے کہا کہ دہشت گردی پر بانی پی ٹی آئی کی پالیسی ہے کہ مذاکرات واحد حل ہیں۔ پی ٹی آئی دور حکومت میں ملک سے دہشت گردی ختم ہو چکی تھی۔ تحریک انصاف کو ختم کرنے کیلئے ریاست پورا زور لگا رہی ہے۔ نتیجہ یہ نکلا کہ دہشت گردی نے دوبارہ جنم لے لیا۔ انہوں نے کہا کہ عوام اور اداروں کے درمیان ایک خلا آ گیا ہے ایسے حالات میں دہشت گردی کے خلاف جنگ نہیں ہو سکتی۔ امریکہ کی حمایت کی وجہ سے افغانستان کے ساتھ ہمارے تعلقات خراب ہوئے۔وفاقی حکومت اور اداروں نے افغانستان حکومت کے ساتھ مذاکرات کی حامی بھری تھی۔ ابھی تک مذاکرات کیلئےٹی او آر نہیں بنائے جا سکے۔ مذاکرات کیلئے وفاقی حکومت ہمارا ساتھ نہیں دے رہی۔ علی امین گنڈاپور نے کہا کہ وفاقی حکومت کے پاس دہشت گردی کے خلاف جنگ کیلئے استطاعت نہیں ہے۔ ہماری زمہ داری ہے کہ ہم نے شہریوں کو تحفظ دینا ہے۔ وزیراعظم ، وزراء اور وفاقی حکومت شہیدوں کی شہادت کو غلط رنگ دے رہی ہے۔ وزیر اعلی خیبرپختونخوا نے کہا کہ کبوتر کی طرح آنکھیں بند کرنے سے مسئلے حل نہیں ہوں گے۔صوبائی ایکشن پلان پرکام شروع ہو چکا ہے۔  صوبائی ایکشن پلان ماضی کے تجربات کو مدنظر رکھ کر بنایا گیا ہے۔ دہشت گردی کے خلاف جنگ کے لئے عوام کی حمایت بہت ضروری ہے۔ان کا کہنا تھا کہ وفاقی حکومت کی پالیسیوں سے تباہ کن نتائج آ رہے ہیں۔ حکومت افغانستان کے ساتھ مذاکرات کیلئے ہمارا ساتھ دے۔ افغانستان کے ساتھ مذاکرات کے بغیر مثبت نتائج نہیں ملیں گے۔علی امین گنڈا پو ر نے کہا کہ اپنے لوگوں کے دل جیتیں، جنگ کو جیتنے کیلئے اعتماد کا رشتہ بحال کرنا ہو گا۔ سابق فاٹا کے لوگوں کے ساتھ وعدہ خلافی کی گئی ہے۔  وفاقی حکومت نے این ایف سی پر نظر ثانی کی یقین دہانی کرائی تھی۔دعا ہے کہ صدر مملکت جلد صحتیاب ہوں۔ اپریل میں این ایف سی ایوارڈ کے حوالے سے حتمی فیصلہ ہونا ہے۔ اگر حق نہ ملا تو دکھاؤں گا کہ ہمارے صوبے کی عوام اتنی لاچار نہیں ہے۔وزیر اعلی خیبرپختونخوا نے کہا کہ کرم میں مسلئے کے حل کیلئے  پیسے صوبائی حکومت کر رہی ہے۔ پارا چنار کا مسئلہ بہت پرانا اور دیرینہ ہے۔ پاراچنار میں ہمارے لوگوں نے شہادتیں دی ہیں، مسئلے کا مکمل حل نکال لیا ہے۔ پاراچنار کے مسئلے کو ہمیشہ کے لئے حل کریں گے۔ بانی پی ٹی آئی کے ساتھ ملاقات کے حوالے سے علی امین گنڈاپور سے سوال انہوں نے کہا کہ سوال یہ ہونا چا ہیئے کہ بطور وزیر اعلیٰ مجھے دو ماہ کے بعد ملاقات کی اجازت کیوں دی گئی۔ انہوں نے کہا کہ بانی پی ٹی آئی مذاکرات کے لئے تیار ہیں، ڈیل کسی صورت نہیں کی جائے گی۔ مسلم لیگ ن نے ہمیشہ ڈیل کی ہے۔ وزیر اعلی خیبرپختونخوا نے بتایا کہ بانی پی ٹی آئی کے ساتھ اسٹیبلشمنٹ کے ساتھ مذاکرات کے حوالے سے کوئی بات نہیں ہوئی۔ ملاقات میں حکومتی معاملات اور دہشت گردی کے خلاف جنگ پر بات ہوئی۔ وزیر اعلیٰ خیبرپختونخوا علی امین گنڈا پور نے  تمباکو کے حوالے سے وفاق کے ساتھ اختلاف پر سپریم کورٹ جانے کا اعلان کردیا۔انہوں نے کہا کہ بجلی چوری ہم سب کا مسئلہ ہے۔ بجلی چوری روکنے کے لئے وفاقی حکومت کے ساتھ بھرپور تعاون کیاہے۔ خیبرپختونخوا کا خسارہ 128 ارب ہے، پورے ملک کی چوری ہمارے صوبے کے پلے نہ ڈالی جائے۔

علی امین گنڈاپور نے این ایف سی ایوارڈ کے لئے سڑکوں پر نکلنے کی دھمکی دے دی

صوبے کے عوام، پولیس اور سرکاری ملازمین کو لے کر نکلوں گا، وزیراعلیٰ خیبرپختونخوا کی پریس کانفرنس

راولپنڈی (این این آئی)آرمی چیف جنرل سید عاصم منیر کی زیر صدارت کور کمانڈرز کانفرنس نے ہر قیمت پر بلا تفریق دہشت گردی کے خاتمے کے عزم کا اعادہ کرتے ہوئے کہا ہے کہ پاکستان کو غیر مستحکم کرنے کی کوشش کرنیوالے عناصر اور ان کے سہولت کاروں سے ریاست پوری طاقت سے نمٹے گی، کسی کو بلوچستان میں امن میں خلل ڈالنے کی اجازت نہیں دی جائیگی، ملکی وغیر ملکی عناصر کا گٹھ جوڑبے نقاب ہوچکاہے، ان عناصر کو کوئی معافی نہیں دی جائیگی جبکہ آرمی چیف نے کہاہے کہ پاکستان میں دہشت گردوں اور ان کے سہولت کاروں کیلئے کوئی جگہ نہیں ، پاک فوج دہشت گردوں کی مالی اعانت کیخلاف سخت قانونی اقدامات میں مکمل تعاون کرے گی۔آئی ایس پی آر کی جانب سے جاری بیان کے مطابق آرمی چیف جنرل سید عاصم منیر، نشانِ امتیاز(ملٹری) کی زیر صدارت 268ویں کور کمانڈر کانفرنس کا انعقاد ہوا جس میں شہداء کے ایصال و ثواب کے لئے فاتحہ خوانی کی گئی۔ شرکاء نے مادرِ وطن کے امن و استحکام کے لئے شہدائے افواج ِ پاکستان ، قانون نافذ کرنے والے اداروں اور شہریوں کی لازوال قربانیوں کو خراجِ عقیدت پیش کیا۔ فورم کو خطے کی موجودہ صورتحال، قومی سلامتی کو درپیش چیلنجز اور بڑھتے ہوئے خطرات کے جواب میں پاکستان کی حکمتِ عملی کے بارے میں جامع بریفنگ دی گئی۔کانفرنس میں علاقائی اور داخلی سلامتی  کی صورتحال کا تفصیلی جائزہ بھی لیا گیا،فورم نے ہرقیمت پر بلاتفریق دہشت گردی کو ختم کرنے کے عزم کا اعادہ کیا۔آئی ایس پی آر کے مطابق فور م نے اس عزم کا اعادہ کیا کہ پاکستان کو غیر مستحکم کرنے کی کوشش کرنے والے ملک دشمن عناصر  ، سہولت کاروں  اور ان کی حوصلہ افزائی کرنے والوں کے خلاف ریاست پوری طاقت سے نمٹے گی،کسی کو بھی بلوچستان میں امن میں خلل ڈالنے کی اجازت نہیں دی جائے گی۔ شرکاء نے کہاکہ بلوچستان کے استحکام اور خوشحالی میں  خلل ڈالنے والے مذموم سیاسی مفادات اور سماجی عناصر  کو بلوچستان کے عوام کی غیر متزلزل حمایت سے  فیصلہ کن طور پر ناکام بنایا جائے گا۔شرکاء نے کہا کہ بلوچستان میں  تمام ملکی اور غیر ملکی عناصر کا اصل چہرہ، گٹھ جوڑ اور انتشار پھیلانے اور پروان چڑھانے کی کوششیں پوری طرح سے بے نقاب ہو چکی  ہیں۔ فورم نے ایسے عناصر اور ایسی کوششیں کرنے والوں کوکسی بھی قسم کی معافی نہ دینے کا اعادہ کیا، فورم نے نیشنل ایکشن پلان کے دائرہ کار کے تحت عزمِ استحکام کی حکمت عملی کے  تیز اور موثر نفاذ  کی ضرورت پر زور دیتے ہوئے دہشت گردی کے خلاف پوری قوم کے تعاون سے مشترکہ نقطہ  نظر کی اہمیت کو اْجاگر کیا۔شرکاء کانفرنس نے اعادہ کیا کہ ریاستی ادارے آئین کے دائرے میں رہتے ہوئے قانون پر پوری استقامت سے عمل درآمد کریں گے جبکہ قانون کی عملداری میں کسی قسم کی نرمی اور کوتاہی نہیں برتی جائے گی۔فورم نے  بھارت کی غیر قانونی طور پر مقبوضہ جموں و کشمیر میں انسانی حقوق کی  جاری سنگین خلاف ورزیوں  پر گہری تشویش کا اظہار کیااور لائن آف کنٹرول  پر بھارتی فوج کی بلا اشتعال جنگ بندی کی خلاف ورزیوں پر بھی خدشات ظاہر کئے۔فورم نے بھارت کے غیر قانونی طور پر مقبوضہ جموں و کشمیر کے عوام کے منصفانہ حقوق  کیلئے پاکستان کی پْر زور اور غیر متزلزل حمایت پر زور دیا۔فورم نے عالمی سطح  پر مقبوضہ جموں و کشمیر میں جاری  انسانی حقوق کی خلاف ورزیوں کو اجاگر کرنے کیلئے مستقل سفارتی کوششوں کی ضرورت پر بھی زور دیا۔فورم نے فلسطین کے عوام کے ساتھ مکمل یکجہتی کا اظہار کرتے ہوئے غزہ میں ہونے والی سنگین انسانی حقوق کی خلاف ورزیوں اور جنگی جرائم کی شدید مذمت کی۔ فورم نے فلسطین کے عوام کی غیر متزلزل سفارتی، سیاسی اور اخلاقی حمایت فراہم کرنے کا اعادہ بھی کیا۔آئی ایس پی آر کے مطابق آرمی چیف نے پاکستان بھر میں نیشنل ایکشن پلان کے تحت قائم شدہ ضلعی رابطہ کمیٹیوں کے آغاز کو سراہا اور بغیر کسی رکاوٹ کے نیشنل ایکشن پلان کے تیز نفاذ کی ضرورت پر زور دیا۔ آرمی چیف نے کہا کہ نیشنل ایکشن پلان کے نفاذ میں حکومتی ہدایات کے مطابق  تمام ادارے پائیدار ہم آہنگی ، مربوط کوششوں اور تعاون کو یقینی بنائیں، پاک فوج حکومت اور قانون نافذ کرنے والے اداروں کو دہشت گردوں  کی مالی اعانت کیخلاف سخت قانونی اقدامات میں مکمل تعاون فراہم کرے گی۔ انہوں نے کہاکہ غیر قانونی سر گرمیاں  دہشت گردی کی مالی معاونت سے اندرونی طور پر جڑی ہوئی ہیں،پاکستان میں دہشت گردوں اور ان کے سہولت کاروں کے لیے کوئی جگہ نہیں ہے۔ کانفرنس کے اختتام پر آرمی چیف نے فیلڈ کمانڈرز کو آپریشنل تیاری اور پیشہ ورانہ مہارت کے اعلیٰ ترین معیارات کو برقرار رکھنے کی ہدایت کی اور بہترین جنگی تیاریوں کو برقرار رکھنے کیلئے سخت تربیت کو یقینی  بنانے پر زور دیا۔

کسی کو بلوچستان کے امن میں خلل ڈالنے کی اجازت نہیں دی جائیگی، کورکمانڈرز کانفرنس

دہشت گردوں کی مالی اعانت کیخلاف سخت قانونی اقدامات میں مکمل تعاون کیا جائیگا، آرمی چیف جنرل سید عاصم منیر

پاکستان پیپلز پارٹی کے چیئرمین بلال بھٹو نے کہا ہے کہ ہم نے دریائے سندھو کو بحال کرنا اور اسے صحت بند کرنا ہے۔ پانی کی منصفانہ تقسیم کی جنگ میں عالمی سطح پر لڑ کر آیا ہوں۔بلاول بھٹو کا کہناتھا کہ  وفاقی حکومت پسماندہ علاقوں پرترجیح دے، پی ایس ڈی پی میں مشاورت نہ ہوئی توبجٹ میں ووٹ نہیں دیں گے۔ذوالفقار علی بھٹو کی 46ویں برسی پر گڑھی خدا بخش میں جلسے سے خطاب کرتے ہوئے بلاول بھٹو کا کہنا تھا کہ میں آپ کا شکر گزار ہوں کہ ہر سال کی طرح ہم گڑھی خدا بخش میں جمع ہو کر قائد عوام شہید ذوالفقار علی بھٹو کو خراج عقیدت پیش کررہے ہیں۔انہوں نے کہا کہ پاکستان پیپلزپارٹی اور کارکنان نے یہ علم بلند رکھا ہے، ہم شہید ذوالفقار علی بھٹو کے علم بردار ہیں اور میں پاکستان پیپلزپارٹی کے کارکنوں کو سلام پیش کرتا ہوں، جنہوں نے 46 سال کے لیے یہ جدوجہد جاری رکھی ہے۔ان کا کہنا تھا کہ صدرآصف زرداری نے ایک اور وعدہ گڑھی خدابخش کے ساتھ نبھایا ہے،صدر زرداری نے اس سے پہلے صدارتی ریفرنس کے ذریعے شہید ذوالفقار علی بھٹو کو انصاف دلوایا۔چیئرمین پیپلزپارٹی نے کہا کہ صدر زرداری نے اپنی کامیابیوں سے شہید محترمہ بے نظیر بھٹو کا وہ فیصلہ کہ پیپلزپارٹی کی قیادت صدر زرداری کو دی، اور وہ انہوں نے وہ ذمہ داری ادا کی۔بلاول بھٹو نے مزیدکہا کہ ہماری اپنی غلطیوں کی وجہ سے دہشتگردی کی لہر جاری ہے،اپنی اندرونی غلطیوں کو درست کرنا پیپلزپارٹی کے ایجنڈے میں رہا ہے،جس کیلئے کام کرتے رہیں گے، ہم نے احساس محرومی دور کرنی ہے،صوبائی خودمختاری پر عمل کرنا ہے۔بلاول بھٹو زرداری کا کہناتھا کہ ہم نے ان درندوں کامقابلہ کرنا ہے جو عوام کے ساتھ خون کی ہولی کھیل رہے ہیں، عالمی سازش کامیاب کرنے کیلئے پاکستان کے عوام کو شہید کیا جا رہا ہے، کے پی میں رمضان میں مسجد میں خودکش دھماکوں سے لوگ شہید کئے جاتے ہیں، بلوچستان میں غریب مزدوروں کو فائرنگ کر کے شہید کیا جاتا ہے، ہمارے قائدین کو لیاقت باغ کی سڑکوں پر خودکش حملوں میں شہید کیا جاتا ہے۔ان کا کہناتھا کہ کراچی میں بلوچستان کی بہنوں کو خودکش بنا کر استعمال کرنے کی کوشش کرتے ہیں، دہشتگرد کبھی مذہب اور کبھی قوم پرستی کے پیچھے چھپتے ہیں، دہشتگرد کا کوئی مذہب اور قوم نہیں ہوتی،یہ کھلونے اور پیشہ ورقاتل ہوتے ہیں، ہم نے پہلے بھی دہشتگردوں کو شکست دی،اب بھی شکست دیں گے، دہشتگردوں کا  سیاسی اور عالمی سطح پر مقابلہ کریں گے، دہشتگرد پاکستان سے جنگ چھیڑ چکے ہیں،پاکستانی عوام کو شہید کر رہے ہیں، ہم نے قتل کا جواب دینا ہے،ہم نے آپس کے اختلافات بھولنے ہیں۔انہوں نے کہا کہ دہشتگردوں کا مقابلہ کرنے کیلئے پیپلزپارٹی کا ہر کارکن پاکستان کے ساتھ کھڑا ہے، شکایت اپنی جگہ لیکن پیپلزپارٹی کا ہر کارکن پاکستان کے ساتھ کھڑا ہے، اپوزیشن سے اپیل ہے وہ بھی اپنا کردار ادا کرے، سیاست کرنا اپوزیشن کا حق ہے کرتے رہیں، کوئی ایک صوبہ دہشتگردوں ، ان کے پیچھے قوتوں کا مقابلہ نہیں کر سکتا، ہم متحد ہوں گےتو دہشتگردوں کو عبرتناک شکست دلوائیں گے۔بلاول بھٹو کا کہناتھا کہ حکومت سے طے کیا تھا پی ایس ڈی پی پیپلزپارٹی سے ملکر بنائی جائے گی، پی ایس ڈی پی پر مشاورت کے بغیر بجٹ کیلئے ووٹ نہیں دیں گے، حکومت کے ساتھ بیٹھ کر پی ایس ڈی پی اوربجٹ بنائیں گے، بینظیر بھٹو کا بیٹا ہوں ہمیشہ وفاق کے ساتھ کھڑا ہوں گا اور ہرسازش کو ناکام کراؤں گا ہم پاکستان کھپےکہنے والے ہیں،نہ کھپے کہنے والے نہیں۔ ان کا کہنا تھا کہ میں نے اقوام متحدہ میں اسلاموفوبیا کے خلاف آواز اٹھانے کے لیے بحث کرائی، ہم نے پاکستان کو فیٹف کے شکنجے سے نکلوایا، ہم نے جی ایس پی پلس کے سٹیٹس کو بچایا۔چیئرمین پی پی نے کہا کہ سیلاب کے دوران میں آپ کا وزیر خارجہ تھا، میں نے دنیا کو قائل کیا کہ موسمیاتی تبدیلی کی وجہ سے ہمارا نقصان ہو رہا ہے، میں نے دنیا کو بتایا کہ آپ کی وجہ سے میرے لوگ ڈوب رہے ہیں،چین سے امریکا، یورپ سے عرب ممالک تک کوئی ایسا ملک نہیں جو سندھ اور بلوچستان کے ساتھ کھڑے نہیں ہوئے، ہم نے وفاق کو منایا کہ کوئی ایک صوبہ اس قدرتی آفت کا مقابلہ نہیں کر سکے گا،موسمیاتی تبدیلیوں کے خلاف جنگ عالمی سطح پر لڑ کر آیا ہوں، وزیر خارجہ کی حیثیت سے دنیا کو منوایا کہ ہمارے سندھو کو بچانا ہے، باقی سب سو رہے تھے۔ان کا کہنا تھا کہ پانی کی منصفانہ تقسیم ، موسمیاتی تبدیلیوں کے خلاف جنگ عالمی سطح پر لڑ کر آیا ہوں،  پانی پر بھارت کے ڈاکے اور یکطرفہ فیصلوں کا مقابلہ کرکے آیا ہوں اور کرتا رہوں گا۔انہوں نے مزید کہا کہ سندھ اور پنجاب کے عوام کی آواز سنو،پانی کی منصفانہ تقسیم ہمارا حق ہے، شہبازشریف صاحب یہ عوام کا مطالبہ ہے نئی نہریں نامنظور ہیں، پیپلزپارٹی عوام کے ساتھ کھڑی ہو گی آپ کے ساتھ نہیں، ہم چاہتے ہیں کہ وفاق کو نقصان پہنچانے والی ہر پالیسی واپس لی جائے، یہ منصوبہ متنازعہ بن چکا ، پیپلزپارٹی وفاق کو نقصان پہنچنے والا کوئی غیرذمہ دارانہ فیصلہ نہیں لینے دے گی،  وفاق کو صوبوں سے لڑانے والوں کو آپ نے اور میں نے جواب دینا ہے۔

پانی کی منصفانہ تقسیم کی جنگ پاکستان تو کیا عالمی سطح پر لڑ کر آیا ہوں، بلاول بھٹوزرداری

پیپلز پارٹی کوئی ایسا فیصلہ نہیں کرنے دی گی جس سے وفاق کو نقصان ہو، گڑھی خدا بخش میں خطاب

برطانوی شاہی خاندان کی بڑی بہو، پرنسس آف ویلز کیٹ مڈلٹن نے عید الفطر کے موقع پر مسلم کمیونٹی کا دورہ کیا، اس موقع پر وہ پاکستانی ڈیزائنر کی جانب سے تیار کردہ لباس میں نظر آئیں۔پاکستان فیشن انڈسٹری کی نامور ڈیزائنر ایلان کلوتھنگ برانڈ کی کری ایٹیو ڈائریکٹر خدیجہ شاہ نے اپنے سوشل میڈیا اکاؤنٹ انسٹاگرم پر پرنسس آف ویلز کی نئی ویڈیو شیئر کی ہے ویڈیو میں کیٹ مڈلٹن کو ایلان برانڈ کے جوڑے کا دوپٹہ اوڑھے دیکھا جا سکتا ہے۔ میڈیا رپورٹس کے مطابق پرنسس آف ویلز کیٹ مڈلٹن نے کمیونٹی سینٹر میں مسلم برادری کے ساتھ عیدالفطر منائی۔کیٹ مڈلٹن نے کمیونٹی سینٹر میں موجود افراد کے ساتھ وقت گزارا۔ بالخصوص بچیوں کے ساتھ کچھ گیمز بھی کھیلے۔برطانوی شہزادی کی جانب سے بچوں میں تحائف بھی تقسیم کیے گئے جب کہ شہزادی کو مٹھائی پیش کی گئی۔شہزادی کیٹ مڈلٹن نے اس موقع پر خوبصورت قیمص شلوار زیب تن کیا ہوا تھا جو انھوں نے 2019 میں دورۂ پاکستان کے دوران بھی پہنا تھا۔یہ سُوٹ ڈیزائنر خدیجہ شاہ نے تیار کیا تھا جو فیشن انڈسٹری کی نامور ڈیزائنر ایلان کلوتھنگ برانڈ کی کری ایٹیو ڈائریکٹر ہیں۔کلوتھنگ برانڈ نے انسٹاگرام پوسٹ پر اس لباس کی قیمت 29 ہزار 500 روپے بتائی تھی۔یادرہے کہ 2006 میں اُس وقت کے شہزادہ اور موجودہ کنگ شاہ چارلس اپنی اہلیہ شہزادی کمیلا کے ہمراہ پاکستان آئے تھے۔اس دورے کے 13 سال بعد کسی برطانوی شاہی خاندان کے رکن 2019 میں پاکستان کا دورہ کیا تھا۔

برطانوی شہزادی کیٹ مڈلٹن نے پاکستانی ڈیزائنر کا جوڑا ایک بار پھر پہن لیا

یہ لباس برطانوی شہزادی نے 2019 میں پاکستان کے سرکاری دورے کے دوران خریدا تھا

ٹک ٹاکر مناہل ملک نے عمرے کی ادائیگی کے بعد عید الفطر کے موقع پر ایک بار پھر اپنی نازیبا ویڈیوز لیک ہونے پر ردِ عمل کا اظہار کیا ہے۔میڈیارپورٹس کے مطابق لاکھوں فالوورز والی ٹک ٹاک سینسیشن مناہل ملک ایک بار پھر متنازعہ ویڈیو لیک کے طوفان میں گھر گئی ہیں۔رمضان المبارک میں عمرہ ادا کرنے اور عید منانے کے بعد اب ان کی ایک اور نجی ویڈیو سوشل میڈیا پر وائرل ہوگئی ہے جس نے صارفین میں اشتعال کو جنم دیا ہے۔ حال ہی میں متعدد میڈیا پلیٹ فامرز کی جانب سے عید کے موقع پر ٹک ٹاکر مناہل ملک کی نازیبا ویڈیوز لیک ہونے سے متعلق رپورٹس شائع کی گئی تھیں۔مناہل ملک کی نامناسب ویڈیوز سامنے آنے کے نتیجے میں ٹک ٹاکر مناہل کا نام ایکس سمیت دیگر سوشل میڈیا پلیٹ فارمز پر ٹرینڈ پر بھی رہا تھا۔ جس کے بعد ٹک ٹاکر مناہل نے ایک بار پھر اپنی نازیبا ویڈیوز لیک ہونے پر وضاحت کرتے ہوئے کہا ہے کہ اب انہیں کوئی فرق نہیں پڑتا، انہوں نے اپنا معاملہ خدا پر چھوڑ دیا ہے۔مناہل ملک نے ٹک ٹاک پر تین منٹ سے زائد دورانیے کی ویڈیو جاری کرتے ہوئے کہا ہے کہ جن لوگوں کو اپنے گھر کا کچھ پتا نہیں ہوتا، وہ دوسروں کے گھروں پر نظر رکھے ہوئے ہیں اور آج کل انہیں ایسے لوگ بہت زیادہ دکھائی دیتے ہیں۔انہوں نے اپنی مبینہ فحش ویڈیوز لیک ہونے کا ذکر کیے بغیر کہا کہ جو لوگ انہیں گھٹیا اور گندا کہتے رہتے ہیں، ان کے لیے پیغام ہے کہ اب انہیں کوئی فرق نہیں پڑتا، وہ مضبوط بن چکی ہے، کیوں کہ چند ہفتے قبل ہی وہ مقدس مقامات سے ہوکر آئی ہیں۔ٹک ٹاکر نے طنزیہ انداز میں کہا ’’اگر میں دو نمبر ہوتی تو اللہ مجھے اپنے گھر کیوں بلاتا؟ میرا معاملہ اب اللہ کے حوالے ہے، تو براہ کرم میرا باپ بننے کی کوشش نہ کریں۔‘‘ انہوں نے یہ بھی واضح کیا کہ مشکل وقت میں صرف ان کا خاندان ہی ان کے ساتھ کھڑا رہا۔مناہل کے مداحوں اور ناقدین کے درمیان اس معاملے پر شدید ردعمل سامنے آیا ہے۔ جہاں کچھ لوگ ان کے موقف کی حمایت کر رہے ہیں، وہیں دوسرے اسے شہرت حاصل کرنے کی کوشش قرار دے رہے ہیں۔ٹک ٹاکر نے اپنی ویڈیو میں مداحوں کو عید کی مبارک باد پیش کرتے ہوئے کہا ہے کہ جو لوگ اب بھی میرے خلاف بول رہے ہیں، ان کے تھک جانے پر میں ان سے پوچھوں گی، ابھی انہیں بولنے دیں۔واضح رہے کہ اس سے قبل 2024ء کے اختتام پر بھی مناہل ملک کی فحش ویڈیوز وائرل ہوئی تھیں۔

عمرے سے واپسی کے بعد مناہل کی لیک ویڈیو نے طوفان برپا کردیا

مناہل ملک کا عید پر نئی نازیبا ویڈیو وائرل ہونے پر ردِ عمل کا اظہار

پاسپورٹ کی درجہ بندی کے حوالے سے نئی فہرست جاری کر دی گئی ہے جس میں پاکستانی پاسپورٹ ایک بار پھر دنیا کے کمزور ترین ممالک میں شامل رہا ہے۔دنیا کا طاقتور ترین پاسپورٹ رکھنے والے ممالک میں آئرلینڈ، سوئٹزر لینڈ، یونان، پرتگال اور مالٹا بالترتیب پہلے سے پانچویں نمبر پر ہیں، پاکستانی پاسپورٹ 32 پوائنٹس کے ساتھ 195ویں نمبر پر ہے۔ میڈیارپورٹس کے مطابق نوماڈ کیپیٹلسٹ نے 2025 کی نئی درجہ بندی جاری کی ہے جس میں آئرلینڈ کو دنیا کے سب سے طاقتور پاسپورٹ کا اعزاز حاصل ہوا ہے اس درجہ بندی میں مختلف عوامل کو مدنظر رکھا گیا جن میں ویزا فری سفر کی سہولت شہریوں پر ٹیکس کی شرح دوہری شہریت کی اجازت ذاتی آزادی اور عالمی ساکھ شامل ہیں ان تمام پہلوؤں کی بنیاد پر آئرلینڈ نے 109 پوائنٹس حاصل کیے اور پہلی پوزیشن حاصل کر لی اس کے شہریوں کو 176 ممالک میں بغیر ویزا سفر کرنے کی سہولت حاصل ہے جو اسے دنیا کے بہترین پاسپورٹس میں سرفہرست رکھتا ہے یونان اور سوئٹزرلینڈ 108 پوائنٹس کے ساتھ دوسرے نمبر پر رہے جبکہ پرتگال کو چوتھی پوزیشن حاصل ہوئی اس فہرست میں دیگر مضبوط پاسپورٹس رکھنے والے ممالک میں مالٹا فن لینڈ ناروے نیوزی لینڈ متحدہ عرب امارات اور آئس لینڈ شامل ہیں ان ممالک کے پاسپورٹس کو بھی عالمی سطح پر سفر کی سہولت اور شہریوں کے لیے بہتر مواقع کی بنیاد پر اعلیٰ درجہ دیا گیا ہے اس فہرست میں پاکستان کا درجہ کافی کمزور رہا اور اسے 195 ویں نمبر پر رکھا گیا جس کا شمار دنیا کے سب سے کمزور پاسپورٹس میں ہوتا ہے رپورٹ کے مطابق پاکستان کا پاسپورٹ اریٹیریا کے ساتھ 195 ویں نمبر پر ہے جبکہ عراق 196 ویں یمن 198 ویں اور افغانستان 199 ویں نمبر پر موجود ہے اس سے ظاہر ہوتا ہے کہ پاکستانی شہریوں کو بین الاقوامی سفر میں کافی مشکلات کا سامنا کرنا پڑتا ہے اور ویزا فری رسائی محدود ترین ہے دلچسپ بات یہ ہے کہ گزشتہ درجہ بندیوں میں سرفہرست رہنے والے جاپان اور سنگاپور اس سال نمایاں طور پر نیچے آ گئے ہیں ان ممالک کی دوہری شہریت سے متعلق سخت پالیسیوں اور ٹیکس قوانین میں سختی کے باعث ان کے پاسپورٹس کی درجہ بندی میں کمی ہوئی ہے حالانکہ ماضی میں یہ دونوں ممالک دنیا کے مضبوط ترین پاسپورٹس کی فہرست میں سرفہرست رہے ہیں تاہم اس نئی درجہ بندی میں شہریوں کی مالی اور قانونی آزادی کو بھی اہمیت دی گئی ہے جس کے باعث ان کا سکور کم ہوا ہے نوماڈ کیپیٹلسٹ کی اس فہرست کو دنیا بھر میں اہمیت دی جاتی ہے کیونکہ یہ روایتی پاسپورٹ رینکنگ سے ہٹ کر زیادہ وسیع عوامل کا احاطہ کرتی ہے عام طور پر پاسپورٹ کی طاقت کا اندازہ صرف ویزا فری سفر سے لگایا جاتا ہے لیکن اس درجہ بندی میں دیگر عناصر جیسے کہ ٹیکس کی سہولت اور عالمی ساکھ بھی اہمیت رکھتے ہیں یہی وجہ ہے کہ اس سال کئی ممالک کی درجہ بندی میں اتار چڑھاؤ دیکھنے کو ملا ہے

پاسپورٹ کی نئی درجہ بندی میں پاکستان کمزور ترین ممالک میں شامل

مضبوط پاسپورٹس میں مالٹا، فن لینڈ، ناروے، متحدہ عرب امارات،پاکستانی پاسپورٹ 32 پوائنٹس کیساتھ 195ویں نمبر پر

کراچی (این این آئی)مشہور پاکستانی اداکارہ اور ٹیلی ویژن ہوسٹ حرا مانی نے حالیہ دنوں میں اپنے عید کے بولڈ لباس کی وجہ سے سوشل میڈیا پر خاصی تنقید کا سامنا کیا ہے۔حرا مانی مقبول ڈراموں دو بول، کشف، سن یارا اور میرے پاس تم ہو میں اپنی جاندار اداکاری کے باعث شہرت حاصل کر چکی ہیں۔انہوں نے عید کے موقع پر کچھ ایسی ساڑھیاں زیب تن کیں جن میں ان کا جسم نمایاں طور پر ظاہر ہو رہا تھا، جیسے ہی ان کی تصاویر سوشل میڈیا پر پوسٹ ہوئیں، مداحوں نے ان پر سخت تنقید کرنا شروع کر دی۔ناقدین کا کہنا ہے کہ حرا مانی نے ایک بار پھر بولڈ لباس کا انتخاب کر کے اسلامی معاشرتی اقدار کو مجروح کیا ہے۔ایک صارف نے تبصرہ کیا ہے کہ حرا مانی دن بدن بولڈ ہوتی جا رہی ہیں، ایک اور صارف نے کہا ہے کہ یہ اداکارائیں پیسہ اور کام حاصل کرنے کے لیے ایسے لباس پہنتی ہیں۔کچھ لوگوں نے ان کے شوہر اور بچوں کو بھی تنقید کا نشانہ بنایا اور کہا کہ وہ کس طرح اپنی والدہ کو ایسے لباس پہننے کی اجازت دے سکتے ہیں۔ایک صارف نے تو یہاں تک کہا کہ نہ چہرے میں کوئی کشش ہے اور نہ ہی کپڑوں میں، جدید اور بولڈ لباس پہن کر بھی خوبصورتی نظر نہیں آتی۔ایک اور صارف نے رمضان کے دوران ان کے آنسوں کو یاد کرتے ہوئے طنز کیا کہ یہ وہی ہیں جو رمضان میں روتی نظر آتی تھیں۔

مشہور پاکستانی اداکارہ حرا مانی کو عید کے بولڈ لباس پر شدید تنقید کا سامنا

حرا مانی نے ایک بار پھر بولڈ لباس کا انتخاب کر کے اسلامی معاشرتی اقدار کو مجروح کیا ،ناقدین

پاکستان اسٹاک ایکس چینج میں کاروباری ہفتے کے آخری روز ایک اور نئی تاریخ رقم ہو گئی۔ پہلی بار مارکیٹ ایک لاکھ 20 ہزار پوائنٹس کی بلند ترین سطح عبور کرگئی۔تفصیلات کے مطابق پاکستان اسٹاک ایکسچینج میں آج ریکارڈ ساز تیزی دیکھی گئی، اس دوران انڈیکس نئی بلند ترین سطح کو چھو گیا۔ کاروباری ہفتے کے آخری دن بازارِ حصص میں کاروبار میں زبردست تیزی کا رجحان دیکھا جا رہا ہے۔کاروبار کے دوران صبح 10 بجے بینچ مارک ’کے ایس ای 100‘ انڈیکس ایک ہزار 855 پوائنٹس یا 1.56 فیصد اضافے کے ساتھ ایک لاکھ 20 ہزار 793 کی سطح پر پہنچ گیا جو گزشتہ روز ایک لاکھ 18 ہزار 938 کی سطح پر بند ہوا تھا۔واضح رہے کہ ملک میں عیدالفطر کی تعطیلات کے بعد امریکی صدر کی جانب سے 180 ممالک پر جوابی ٹیرف عائد کرنے کے باوجود جمعرات کے روز پی ایس ایکس میں 100 انڈیکس نئی بلند ترین سطح کو چھو گیا تھا۔گزشتہ روز وزیر اعظم شہباز شریف نے ملک بھر میں بجلی کے نرخوں میں 7 روپے 41 پیسے فی یونٹ کمی کا اعلان کرتے ہوئے ’بڑے‘ ریلیف پیکج میں شہریوں کو بجلی کے بے تحاشا بلوں کا سامنا کرنے والے بوجھ کو کم کرنے کا اعلان کیا تھا۔تجزیہ کاروں کا کہنا ہے کہ وزیراعظم کی جانب سے بجلی کے نرخوں میں کمی مارکیٹ کی کارکردگی کی ایک بڑی وجہ ہے۔دوسری جانب انٹر بینک میں کاروبار کے دوران ڈالر 20 پیسے سستا ہو گیا ہے، انٹربینک میں ڈالر 280 روپے 36 پیسے کی سطح پرٹریڈ ہورہا ہے۔گزشتہ روز کاروبار کے اختتام پر ڈالر چالیس پیسے مہنگا ہو کر 280 روپے 56 پیسے پر بند ہو ا تھا۔

اسٹاک مارکیٹ میں زبردست تیزی، 100 انڈیکس نئی بلند ترین سطح پر پہنچ گیا

ایک اور نئی تاریخ رقم ہو گئی، پہلی بار مارکیٹ ایک لاکھ 20 ہزار پوائنٹس کی بلند ترین سطح عبور کرگئی

On Wednesday, March 20th, the Pakistan team arrived in Auckland ahead of the third T20I in the ongoing five-match series against New Zealand.

PAK vs NZ 3rd T20I: PAK Team Arrives In Auckland For This Must-Win Clash

On Wednesday, March 20th, the Pakistan team arrived in Auckland ahead of the third T20I in the ongoing five-match series against New Zealand.

This must-win clash will be played on March 21st at Eden Park, Auckland.&nbsp;

The Pakistan team led by newly appointed captain, Salman Ali Agha, need to win this match at all costs if they want to keep their hopes of winning the T20I series alive. As per sources, the team will take part in a three-hour practice session at Eden Park.

New Zealand is currently leading the series 2-0, having won the first two matches with a massive margin.&nbsp;

In the opening game of the series, the hosts secured a whopping nine-wicket victory, whereas in the PAK vs NZ 2nd T20I, the Kiwis emerged victorious with 5 wickets in hand.&nbsp;

If the Men in Green lose the PAK vs NZ 3rd T20I, their chances of winning the series will be completely over.&nbsp;

Salman Ali Agha and co. must win the upcoming match in order to save face as well as the series.&nbsp;

PAK vs NZ 3rd T20I: PAK Team Arrives In Auckland For This Must-Win Clash

Related Post

What to watch

What Is Wrong With Football In Pakistan?

Why Does Pakistan’s Cricket Team Fail

Meri Shehzadiyan