Sports News

Entertainment

بھارت کے اپوزیشن لیڈر راہول گاندھی نے لوک سبھا سے خطاب کرتے ہوئے پیغمبر اسلام حضرت محمد مصطفیٰ ﷺ پر درود پڑھ لیا۔ بھارتی لوک سبھا میں اپوزیشن لیڈر و کانگریسی رہنما راہول گاندھی نے وزیراعظم نریندر مودی اور اس کے انتہا پسند ہندو وزراء کی موجودگی میں اسلام کی امن پسندی اور تشدد سے نفرت کاذکر کرتے ہوئے قرآنی تعلیمات کا حوالہ دیا اور حضور نبی اکرمﷺ کا اسم مبارک لیتے ہوئے آپؐ پر درود بھیجا۔میڈیا رپورٹس کے مطابق دوران خطاب راہول گاندھی نے ایک تصویر پیش کی جس میں ہاتھ اٹھا کر دعا مانگنے کا طریقہ واضح تھا جس پر اپوزیشن کی طرف سے اعتراض کیا گیا۔سپیکر لوک سبھا نے قدرے عجلت میں راہول گاندھی کو مخاطب کر کے کہا کہ ’آپ عوامی نمائندہ ہیں، اس طرح مناسب نہیں‘، جس پر راہول گاندھی نے کہا کہ میں سمجھانے سے قاصر، سمجھانے کے لیے تصویر دکھائی۔راہول گاندھی نے پر پیغمبر اسلام حضرت محمد ﷺ کا حوالہ دیتے ہوئے دورد بھیجا اور کہا کہ ’تمام عظیم ہستیوں نے عدم تشدد اور خوف کو ختم کرنے کی بات کی اور کہا کہ مت ڈرو۔اپوزیشن لیڈر نے بی جے پی اور ہندو انتہاپسندوں پارٹیوں کو شدید تنقید کا نشانہ بناتے ہوئے کہا کہ بی جے پی کے رہنما نفرت، خوف اور تشدد پھیلا رہے ہیں۔ یہ لوگ ہندو لیڈر ہونے کا دعویٰ کرتے ہیں لیکن ساتھ ہی ساتھ نفرت اور تشدد بھی کرتے ہیں۔ یہ ہندو نہیں ہیں۔اس منظر کو دیکھتے مودی اور اس کےرفقا دم بخودہو کر رہ گئے ،بھارتی وزیراعظم نریندر مودی نے اپوزیشن لیڈر راہول گاندھی سے بیان پر معافی مانگنے کا مطالبہ کیا  جواب میں راہول گاندھی نے کہا کہ نریندر مودی اور آر ایس ایس پورا ہندو سماج نہیں ہے۔انہوں نے کہا کہ بی جے پی ہر وقت خوف پھیلا رہی ہے اور تشدد اور نفرت کو فروغ دے رہی ہے۔

راہول گاندھی نے پیغمبراسلام حضرت محمد مصطفیٰ ﷺ پر درود پڑھ لیا

بی جے پی ہر وقت خوف پھیلا رہی ہے اور تشدد اور نفرت کو فروغ دے رہی ہے، راہول گاندھی کا لوک سبھا اسمبلی میں خطاب

نائب ترجمان امریکی محکمہ خارجہ ویدانت پٹیل نے ایوان نمائندگان میں پاکستان سے متعلق قرارداد پر ردعمل دیتے ہوئے کہا ہے کہ زیر التوا کانگریسی قانون سازی پر بات نہیں کرسکتے۔واشنگٹن میں پریس بریفنگ دیتے ہوئے امریکی ترجمان نے کہا کہ امریکی جمہوری نظام میں کانگریس حکومت کی ایک علیحدہ شاخ ہے۔نائب ترجمان امریکی محکمہ خارجہ نے پریس کانفرنس کے دوران گفتگو کرتے ہوئے کہا ہے کہ بانی پی ٹی آئی پر مقدمات پاکستان کا اندرونی معاملہ ہے، پاکستان میں انتخابات کی شفافیت کا معاملہ ہماری توجہ کا مرکز ہے، ہم زیر التوا کانگریس کی قانون سازی پر بات نہیں کریں گے۔امریکی محکمہ خارجہ کے نائب ترجمان ویدانت پٹیل نے مزید کہا کہ امریکی جمہوری نظام میں کانگریس حکومت کی ایک علیحدہ شاخ ہے، پاکستان اور بھارت کو اپنے معاملات خود طے کرنا ہیں، امریکا دنیا بھر میں پڑوسی ممالک میں مذاکرات کی حوصلہ افزائی کرتا ہے۔انہوں نے کہا کہ امریکی اعلیٰ حکام نے مسلسل، نجی اور عوامی طور پر پاکستان پر زور دیا کہ آئین کے مطابق عوام کے حقوق کا احترام، انسانی حقوق اور بنیادی آزادیوں کا احترام کیا جائے، اس میں اظہار رائے کی آزادی، پرامن اجتماع اور مذہبی آزادی بھی شامل ہے، یہ معاملہ اٹھاتے رہے ہیں۔

امریکا نے عمران خان پر مقدمات کو پاکستان کا اندرونی معاملہ قرار دے دیا

حکومت پاکستان انسانی حقوق، بنیادی آزادیوں کا احترام کرے،امریکا

اقوام متحدہ کے انسانی حقوق کے ورکنگ گروپ نے پی ٹی آئی کے بانی عمران خان کی فوری رہائی کا مطالبہ کردیا تفصیلات کے مطابق اقوام متحدہ کے ورکنگ گروپ کا کہناتھا کہ پاکستان تحریک انصاف(پی ٹی آئی) کے بانی عمران خان کی پہلے توشہ خانہ کیس میں حراست اور مقدمے کے ساتھ ساتھ ان کے خلاف سائفر کیسز کی کوئی قانونی حیثیت نہیں جو انہیں سیاسی میدان میں مقابلے سے باز رکھنے کے لیے سیاسی طور پر بنائے گئے۔ برطانوی خبر رساں ادارے کے مطابق اقوام متحدہ کے انسانی حقوق کے لیے کام کرنے والے گروپ ’’یو این ورکنگ گروپ آن آربٹریری ڈیٹینشن‘‘ نے اپنے بیان میں کہا ہے کہ پاکستان کے سابق وزیر اعظم عمران خان کو بین الاقوامی قوانین کی خلاف ورزی کرتے ہوئے قید میں رکھا گیا ہے۔ اس لئے انہیں فوری طور پر رہا کیا جائے اور غیر قانونی قید میں رکھنے پر ہرجانہ ادا کیا جائے۔اقوام متحدہ کے انسانی حقوق کے ورکنگ گروپ کا مزید کہنا تھا کہ وہ اس نتیجے پر پہنچا ہے کہ ان کی حراست کی کوئی قانونی بنیاد نہیں تھی اور ایسا لگتا ہے کہ اس کا مقصد انہیں سیاسی عہدے کے لیے نااہل قرار دینا تھا۔ اقوام متحدہ کے ورکنگ گروپ نے اپنی رائے میں مزید کہا ہے کہ عمران خان کے خلاف کارروائیاں شروع سے ہی قانون کی بنیاد پر نہیں تھیں اور مبینہ طور پر ان کارروائیوں کو سیاسی مقصد کے لیے استعمال کیا گیا تھا۔اقوام متحدہ ورکنگ گروپ رپورٹ میں یہ بھی کہا گیا کہ بانی پی ٹی آئی کی قانونی پریشانیاں، اُن کے اور تحریک انصاف کے خلاف جبر و زیادتی کی وسیع تر مہم کا حصہ ہے۔ رپورٹ کے مطابق 2024 کے عام انتخابات سے پہلے عمران خان کی پارٹی کے لوگوں کو گرفتار کیا گیا، تشدد کا نشانہ بنایا گیا اور اُن کی سیاسی ریلیوں کو روکا گیا۔رپورٹ میں مزید کہا گیا کہ الیکشن میں بڑے پیمانے میں فراڈ ہوا اور درجنوں پارلیمانی نشستیں چوری کی گئیں۔یواین ورکنگ گروپ کی رپورٹ کے مطابق عمران خان کے الیکشن لڑنے پر پابندی، الیکشن میں ان کی پارٹی کی منصفانہ شرکت کو روکنے اور حکومت کی طرف سے کسی ردعمل کی عدم موجودگی جیسے عوامل کے پیش نظر ورکنگ گروپ اس نتیجے پر پہنچا ہے عمران خان کی گرفتاری، نظر بندی اور پہلے توشہ خانہ کیس اور سائفر کیس میں مقدمہ چلانے کی کوئی قانونی وجہ نہیں تھی اور ایسا لگتا تھا کہ انہیں الیکشن لڑنے سے روکنے کے لیے یہ کیا گیا۔اقوام متحدہ کے انسانی حقوق ورکنگ گروپ نے بانی پی ٹی آئی کے خلاف مقدموں میں کئی قانونی بے قاعدگیوں اور بے ضابطگیوں کا حوالہ دیا۔خیال رہے کہ عمران خان سائفر کیس اور توشہ خان کیس کے علاوہ دوران عدت نکاح سے متعلق کیسز میں کئی برس کی سزا کاٹ رہے ہیں۔ اس کے علاوہ بھی ان کے خلاف مختلف نوعیت کے دیگر کیسز کی سماعت کا سلسلہ جاری ہے۔واضح رہے کہ اپریل 2022 میں وزیر اعظم کے عہدے سے ہٹائے جانے کے بعد سے 71 سالہ عمران خان 200 سے زیادہ مقدمات میں الجھے ہوئے ہیں اور گزشتہ سال اگست سے جیل میں ہیں۔ وہ ان مقدمات کو انہیں اقتدار سے دور رکھنے کے لیے اپنے سیاسی دشمنوں کی جانب سے اپنے خلاف سیاسی انتقام قرار دیتے ہیں۔

عمران خان کی حراست عالمی قوانین کی خلاف ورزی ہے،اقوام متحدہ ورکنگ گروپ

عمران خان کے خلاف کیسز سیاسی بنیادوں پر بنائے گئے،مقصد انہیں انتخابات لڑنے سے روکنے کیلئے نااہل قرار دینا تھا

سیکیورٹی فورسز نے خیبرپختونخوا میں دہشت گردوں کے خلاف 2 مختلف کارروائیاں کی ہیں، اور اس دوران 2 انتہائی مطلوب دہشتگردوں سمیت 9 دہشت گرد ہلاک ہوگئے ہیں۔ پاک فوج کے شعبہ تعلقات عامہ (آئی ایس پی آر) نے بتایا ہے کہ وادی تیراہ کے علاقے میں خفیہ اطلاعات کی بنیاد پر آپریشن کیا گیا جس کے نتیجے میں 7 دہشت گرد ہلاک ہوئے۔ہلاک دہشت گردوں میں کمانڈر نجیب عرف عبدالرحمان اور کمانڈر اشفاق عرف معاویہ شامل ہیں۔آئی ایس پی آر کے مطابق ضلع لکی مروت میں آپریشن کے دوران دو دہشت گردوں کو ہلاک کیا گیا، ہلاک ہونے والے دہشت گرد قانون نافذ کرنے والے اداروں کے اہلکاروں پر حملوں میں ملوث تھے، ہلاک دہشت گردوں کے قبضے سے اسلحہ اور بارود بھی قبضے میں لیا گیا ہے۔پاک فوج کے شعبہ تعلقات عامہ کے مطابق علاقے میں کسی دوسرے دہشت گرد کے خاتمے کیلئے سینی ٹائزیشن آپریشن بھی کیا گیا، پاکستان کی سکیورٹی فورسز ملک سے دہشت گردی کے خاتمے کیلئے پُرعزم ہیں۔

خیبرپختونخوا،سیکیورٹی فورسز کی 2 مختلف کارروائیوں میں 9 دہشت گرد ہلاک

وادی تیرہ میں 7 جبکہ لکی مروت میں 2 دہشت گرد ہلاک ہوئے، دہشت گردوں کے قبضے سے اسلحہ اور بارود بھی قبضے میں لیا گیا

پی ٹی آئی کور کمیٹی اجلاس میں 3 قراردادیں متفقہ طور پر منظور کرلی گئیں۔اجلاس کا اعلامیہ بھی جاری کردیا گیا جس کے مطابق عمر ایوب کا بطور سیکریٹری جنرل استعفیٰ منظور نہ کرنے کی سفارش کو بھی قرارداد کا حصہ بنایا گیا۔ تفصیلات کے مطابق پاکستان تحریک انصاف کی کورکمیٹی کا اہم ترین اجلاس ہوا،کور کمیٹی اجلاس میں تین اہم قراردادیں متفقہ طور پر منظور کر لی گئیں، عمر ایوب خان کا بطور سیکرٹری جنرل استعفیٰ منظور نہ کرنے کی سفارش بھی قرارداد کا حصہ ہے۔ قراردادکے متن میں کہا گیاہے کہ کور کمیٹی سیکرٹری جنرل عمر ایوب کی جانب سے انتہائی کٹھن اور آزمائشی حالات کے دوران پارٹی کیلئے پیش کی گئی قابل تحسین خدمات کی معترف ہے،سیکرٹری جنرل عمر ایوب سے پارٹی عہدے سے اپنا استعفیٰ واپس لینے کی درخواست کرتے ہیں، قراردادمیں مزید کہا گیا ہے کہ عمر ایوب کی بطور پارٹی سیکرٹری جنرل خدمات موجودہ حالات کے تناظر میں پارٹی پالیسیوں کے تسلسل کیلئے نہایت اہمیت کی حامل ہیں، کور کمیٹی تاحیات اور بانی چیئرمین عمران خان سے عمر ایوب خان کا استعفیٰ منظور نہ کرنے کی درخواست کرتی ہے۔ قرارداد میں کہا گیا ہے کہ کور کمیٹی نہایت حساس اور اہم ترین موڑ پر پارٹی سے راہیں جدا کرنے والے افراد کی شدید مذمت کرتی ہے،مشکل وقت میں پارٹی چھوڑ جانے والوں کے پاس باہر بیٹھ کر پارٹی معاملات پر تبصرہ آرائی کرنے کا کوئی اخلاقی جواز یا اختیار نہیں،پارٹی کا ایسے تمام افراد سے کوئی سروکار ہے نہ ہی ان کے بیانات کسی طور پارٹی معاملات پر اثرانداز ہو سکتے ہیں،مشکل وقت میں راہیں جدا کرنے والے لوگ پارٹی کیلئے پھر سے کبھی قابلِ قبول نہیں ہوں گے،وہ تمام افراد جنہیں اپنے کئے پر افسوس ہے ان کے متعلق فیصلہ تاحیات اور بانی چئیرمین عمران خان کی صوابدید ہے۔ قرارداد میں کہا گیا ہے کہ پارٹی اس امر کی توثیق کرتی ہے کہ ہر حال میں پارٹی صفوں میں سخت نظم و ضبط کا نفاذ کیا جائے گا،مستقبل میں پارٹی نظم و ضبط کی خلاف ورزی کے تمام معاملات سے فوری طور پر نہایت سختی سے نمٹا جائے گا، پارٹی نظم و ضبط کی خلاف ورزی کرنے والوں کو بنیادی رکنیت کی معطلی سمیت دیگر تادیبی اقدامات کا سامنا کرنا ہو گا، جن افراد کو ڈسپلن کی خلاف ورزی پر نوٹسز دیئے جا چکے ان کے معاملات سات روز میں نمٹائے جائیں گے ۔

مشکل وقت میں راہیں جدا کرنے والے پارٹی کیلئےقابلِ قبول نہیں، پی ٹی آئی

پی ٹی آئی کور کمیٹی اجلاس،عمر ایوب کابطور سیکرٹری جنرل  استعفیٰ منظور نہ کرنے کی سفارش

پاکستان اور بھارت کے درمیان قیدیوں کی فہرستوں کا تبادلہ ہوا ہے، پاکستان اور بھارت نے اسلام آباد اور نئی دہلی میں سفارتی چینل کے ذریعے ایک دوسرے کی تحویل میں موجود قیدیوں کی فہرستوں کا تبادلہ کیا۔ہر سال یکم جنوری اور یکم جولائی کو 2008 کے قونصلر رسائی کے معاہدے کے تحت ان فہرستوں کا ایک ساتھ تبادلہ کیا جاتا ہے۔پاکستانی جیلوں میں قید 254  بھارتی شہری قیدیوں اور ماہی گیروں کی فہرست بھارت کے حوالے کی جبکہ بھارت نے قید 452 پاکستانی یا مبینہ پاکستانی شہریوں اور ماہی گیروں کی فہرست فراہم کی۔اکستان کی جانب سے لاپتہ 38 پاکستانی دفاعی اہلکاروں کی فہرست بھی دی گئی، جن کے بارے میں خیال کیا جاتا ہے کہ وہ 1965 اور 1971 کی جنگوں کے بعد سے بھارت کی تحویل میں ہیں۔حکومت پاکستان نے ہندوستان میں اپنی سزا پوری کرنے والے تمام پاکستانی قیدیوں کی فوری رہائی اور وطن واپسی کا مطالبہ کیا۔ جسمانی اور ذہنی طور پر معذور قیدیوں سمیت پاکستانی مانے جانے والے متعدد قیدیوں تک خصوصی قونصلر رسائی کی درخواست کی گئی ہے اور ان کی قومی حیثیت کی فوری تصدیق کے لیے درخواست کی گئی ہے۔حکومت پاکستان نے ہندوستان پر بھی زور دیا ہے کہ وہ تمام پاکستانی قیدیوں کی رہائی اور وطن واپسی کے منتظر ہے، ان کی حفاظت، سلامتی اور بہبود کو یقینی بنائے۔خیال رہے کہ متنازع سمندری حدود اور چھوٹے ماہی گیروں کے پاس اچھے آلات کی کمی کی وجہ سے دونوں ممالک کے ماہی گیروں میں سمندری حدود تجاوز کرنا عام ہے۔سمندری حدود کی خلاف ورزی کرنے والے ماہی گیروں کی گرفتاری عام ہے لیکن دونوں ممالک کے درمیان کشیدہ تعلقات کی وجہ سے ان کی رہائی پیچیدہ عمل ہے۔

پاکستان اور بھارت کا ایک دوسرے سے قیدیوں کی فہرستوں کا تبادلہ

پاکستان کی جیلوں میں بھارت کے 254قیدی ہیں ، بھارت کی جیلوں میں 452پاکستانی قیدی ہیں

امیر جماعت اسلامی حافظ نعیم الرحمن نے کہا ہے کہ بجلی و پیٹرول کی قیمت میں اضافے کے خلاف 12 جولائی کو اسلام آباد میں عظیم الشان دھرنا دیں گے۔ تفصیلات کے مطابق جماعت اسلامی نے بھاری ٹیکسز اور مہنگی بجلی و گیس کے خلاف اسلام آباد میں دھرنا دینے کا اعلان کردیا۔امیر جماعت اسلامی حافظ نعیم الرحمن نے منصورہ لاہور میں پریس کانفرنس میں کہا کہ ملک میں اس وقت شدید بحران ہے۔ بجلی کے بلوں نے سب کو تڑپنے پر مجبور کردیا ہے۔لوگ اپنے زیورات بیچ کر بجلی کے بل ادا کررہے ہیں۔کل گیس اور پیٹرول کی قیمت میں اضافہ کیا گیا ہے۔ قوم کو اس وقت تنہا نہیں چھوڑ سکتے۔حافظ نعیم الرحمٰن نے مزید کہا کہ 12 جولائی کو مہنگائی اور بھاری ٹیکسز کے خلاف اسلام آباد میں دھرنا دیں گے۔ ملک گیر ہڑتال پر غور کررہے ہیں۔ حکومت کو ظالمانہ ٹیکس ختم کرنے پر مجبور کردیں گے۔ پیٹرول و گیس کی قیمت میں اضافہ کیا پھر آئی ایم ایف کے ٹیکسز لائے جا رہے ہیں۔امیر جماعت اسلامی نے کہا کہ فری پیٹرول و بجلی لینے والے جرنیل فوجی افسران ججز کہتے کہ ہم مراعات نہیں لیں گے۔ محدود طبقہ ترقی کررہا ہے اور مڈل کلاس فارغ ہوگئی ہے۔  دو، تین لاکھ روپے والا تنخواہ دار طبقہ سخت پریشان ہے اگر اس کا ٹیکس کٹے گا تو وہ کیسے پورا کرے گا۔ یہ عوام کو مزید ٹیکسوں کے نیچے دبانا چاہتے ہیں۔انہوں نے مزید کہا کہ جاگیر داروں سے کوئی ٹیکس نہیں لیا جا رہا۔ بڑے لوگ مزے کررہے ہیں۔ بجلی کے بلوں میں جو ٹیکس ہے پیٹرول پر جو لیوی لگی ان کا پیٹ بھریں گے جو پہلے ہی اربوں روپے کھا گئے ہیں۔ حکومت کوکوئی شرمندگی ہے۔ وزیراعظم فخر سے کہتے ہیں آئی ایم ایف سے مل کر بجٹ بنایا ہے۔حکومت ذہنی پسماندگی اور غلامی میں مبتلا ہو چکی ہے۔

جماعت اسلامی نے 12 جولائی کو اسلام آباد میں دھرنا دینے کا اعلان کردیا

ملک میں اس وقت شدید بحران ہے،بجلی کے بلوں نے سب کو تڑپنے پر مجبور کردیا ہے، حافظ نعیم الرحمن

پاکستان تحریک انصاف (پی ٹی آئی) کے چیئرمین بیرسٹر گوہر خان نے کہا ہے کہ سپریم کورٹ نے الیکشن کمیشن آف پاکستان سے مخصوص نشستوں سے متعلق دونوں فارمولے طلب کرلیے ہیں، ججز نے جو ریمارکس دیے ہیں ان سے پُرامید ہیں کہ مخصوص نشستیں ہمیں ہی ملیں گی۔بیرسٹر گوہر کا کہنا تھا کہ پی ٹی آئی میں کوئی فارورڈ بلاک نہیں صرف بانی پی ٹی آئی کا بلاک ہے۔چیئرمین پی ٹی آئی بیرسٹر گوہر نے سپریم کورٹ کے باہرمیڈیا سے گفتگو میں کہا کہ اختلاف رائے سب کا ہوتا ہے۔ ہم بانی پی ٹی آئی کے مشورے سے چیزیں آگے لے کر جا رہے ہیں۔ پی ٹی آئی کا کوئی فارورڈ بلاک نہیں صرف عمران خان بلاک ہے۔بیرسٹر گوہر نے مزید کہا کہ اختلاف سب کرتے ہیں اور اختلاف کرنا ہر شخص کا حق ہے۔ عمر ایوب واقعے کو شیر افضل مروت کے حوالے سے غلط رپورٹ کیا جا رہا ہے۔ فواد چوہدری کے ساتھ اچھا وقت گزرا ہے۔اچھے لوگ اچھے الفاظ کا چناؤ کرتے ہیں۔ان کا کہنا تھا کہ سیکریٹری جنرل عمر ایوب نے استعفی دیا ہے، کل خان صاحب سے ملاقات ہوگی اس معاملے پر، اس کے علاوہ پارلیمانی پارٹی نے اجلاس میں فیصلہ کیا کہ اس استعفے کو منظور نہ کیا جائے، کور کمیٹی کی میٹنگ میں بھی اس حوالے سے بات کی جائے گی اور کل عمران خان سے بھی اس حوالے سے مشاورت کی جائے گی۔ ان کا کہنا تھا کہ ہمارے دور میں کورونا کے باوجود ملک ترقی کررہا تھا ،آج جو پٹرول اور ڈالر کی قیمت ہے ، ہمارے دور میں سو گنا کم قیمتیں تھیں، لوگوں سے سوال کریں کہ مہنگائی میں کیسے گزارا ہورہا ان کا۔ آج مہنگائی کا جو عالم ہے ، عوام اس صورتحال میں اعتماد نہیں کررہی ۔8 فروری کو عوام نے بانی پی ٹی آئی کو ووٹ دیے،عوام بانی پی ٹی آئی پر اعتماد کرتے ہیں،عوام جس کو ووٹ دے ادھر جانے دیا جائے ،مخصوص نشستوں میں بھی ان کا حق بنتا ہے جن کو ووٹ دیا گیا۔موجودہ حکومت پر عوام کا اعتماد نہیں ہے ، حکومت چھوڑ دینی چاہیے،اکنامکس منجمنٹ یہ ہے امیر پر ٹیکس عائد کیا جائے۔ امید ہے مخصوص نشستیں پی ٹی آئی یا سنی اتحاد کونسل کو ملیں گی۔

پی ٹی آئی میں کوئی فارورڈ بلاک نہیں، صرف عمران خان کا بلاک ہے، بیرسٹر گوہر

عمر ایوب کے استعفے پر کل بانی پی ٹی آئی سے مشاوت کی جائیگی ،چیئرمین پی ٹی آئی کی میڈیا سے گفتگو

معروف پاکستانی وی جے، ماڈل، میزبان اور اداکارہ انوشے اشرف رشتہ ازدواج میں منسلک ہو گئیں۔ماڈل و ٹی وی میزبان انوشے اشرف نے آن لائن نکاح کرکے نئی زندگی کا آغاز کردیا۔ فوٹو اینڈ ویڈیو شیئرنگ پلیٹ فارم انسٹاگرام پر انہوں نے نکاح کی تصاویر شیئر کرنے کے ساتھ ساتھ معنی خیز کیپشن بھی تحریر کیا۔اداکارہ نے نکاح کی تصاویر شیئر کرتے ہوئے مزاحیہ انداز میں لکھا کہ ان سے ہر کوئی پوچھتا ہے کہ بیٹا شادی کب کرو گی؟ لو، اب کرلی۔اداکارہ کی جانب سے شیئر کی گئی تصاویر میں انہیں لیپ ٹاپ پر نکاح کی مزید رسومات ادا کرتے ہوئے دیکھا جا سکتا ہے۔بعد ازاں انوشے اشرف نے انسٹاگرام اسٹوریز میں شوہر کی تصاویر شیئر کرتے ہوئے مداحوں کو اپنے شوہر کا نام بھی بتایاان کا نکاح شہاب رضا مرزا نامی شخص کے ساتھ ہوا ہے۔پوسٹ کے کیپشن میں اداکارہ نے شادی سے متعلق بار بار سوال پوچھنے والوں کو مخاطب کرتے ہوئے لکھا کہ بیٹا آپ نے اب تک شادی کیوں نہیں کی؟ لو جی اب کرلی۔دوسری جانب اس خوشی کی خبر سامنے آتے ہی سوشل میڈیا پر مداحوں کی جانب سے اداکارہ کو نکاح پرمبارکباد موصول ہونے کا نہ تھمنے والا سلسلہ شروع ہو گیا۔

انوشے اشرف رشتہ ازدواج میں منسلک، تصاویر سوشل میڈیا پر وائرل

انوشے اشرف نے اپنے نکاح کی تصاویر شیئر کرتے ہوئے مداحوں کو بتایا کہ انہوں نے شادی کرلی

سپریم کورٹ نے الیکشن کمیشن کو حکم دیا ہے کہ 2018  اور  2024  میں مخصوص نشستیں کیسے الاٹ ہوئیں؟ فارمولا اور دستاویزات کل پیش کیے جائیں، دوران سماعت چیف جسٹس قاضی فائز عیسیٰ نے ریمارکس دیے کہ ثابت کریں الیکشن کمیشن نے غیر آئینی اقدام کیا ہم اڑا دیں گے، یہ دکھانا ہوگا الیکشن کمیشن نے غیر آئینی کام کیا ہے پھر ہم اس میں مداخلت کریںگے،کیس کی مزید سماعت کل تک ملتوی کر دی گئی ہے۔چیف جسٹس پاکستان قاضی فائز عیسیٰ کی سربراہی میں 13 رکنی فل کورٹ نے کیس کی سماعت کی، جسٹس سید منصور علی شاہ، جسٹس منیب اختر، جسٹس یحییٰ آفریدی، جسٹس امین الدین خان، جسٹس جمال خان مندوخیل، جسٹس محمد علی مظہر، جسٹس عائشہ ملک، جسٹس اطہر من اللہ، جسٹس سید حسن اظہر رضوی، جسٹس شاہد وحید، جسٹس عرفان سعادت خان اور جسٹس نعیم اختر افغان فل کورٹ کا حصہ ہیں۔دوران سماعت سنی اتحاد کونسل اور الیکشن کمیشن کے وکلا نے دلائل دیئے۔سماعت کے دوران الیکشن کمیشن کے وکیل سکندر بشیر مہمند نے عدالت کو بتایا کہ میں 4 قانونی نکات عدالت کے سامنے رکھوں گا، پارٹی سرٹیفکیٹس جمع کرانے کے وقت پی ٹی آئی کا کوئی تنظیمی ڈھانچہ نہیں تھا، الیکشن میں سرٹیفکیٹ گوہر علی خان کے دستخط سے جمع کرائے گئے، پی ٹی آئی نے اس وقت انٹرا پارٹی الیکشن قانون کے مطابق نہیں کرائے تھے، فارم 66 جمع کراتے وقت پی ٹی آئی کا کوئی ڈھانچہ نہیں تھا۔جسٹس جمال مندوخیل نے وکیل الیکشن کمیشن سکندر بشیر سے استفسار کیا کہ بتائیں غلطی کہاں اور کس نے کی؟وکیل نے بتایا کہ کاغذات نامزدگی میں بلینک کا مطلب آزاد امیدوار ہے، پی ٹی آئی نے فارم 66 بائیس دسمبر اور پارٹی سے وابستگی سرٹیفکیٹ 13 جنوری کو جاری کئے، پی ٹی آئی کو پارٹی سے وابستگی سرٹیفکیٹ تو کاغذات نامزدگی کے ساتھ لگانا چاہیے تھے۔اس پر جسٹس جمال مندوخیل نے کہا کہ بتا دیں پی ٹی آئی کے کاغذات نامزدگی میں لکھا ہے کہ سرٹیفکیٹ منسلک ہیں، وکیل سکندر بشیر نے کہا کہ الیکشن کمیشن نے 23 دسمبر کو فیصلہ کیا جو پہلے آیا، اس کے بعد پشاور ہائی کورٹ نے فیصلہ دیا۔جسٹس منیب اختر نے دریافت کیا کہ آپ کہہ رہے کہ سرٹیفکیٹ غلط ہیں کیونکہ تب تک چیئرمین تحریک انصاف کا انتخاب نہیں ہوا تھا؟وکیل سکندر بشیر نے کہا کہ سرٹیفکیٹ جمع کراتے وقت جب چیئرمین پی ٹی آئی منتخب نہیں ہوئےتو کاغذات نامزدگی درست نہیں، کاغذات نامزدگی میں حامد رضا نےسنی اتحاد کونسل سے وابستگی ظاہر کی، حامد رضا کو بطور چیئرمین سنی اتحاد کونسل اپنے آپ کو ٹکٹ جاری کرنا چاہیے تھا۔الیکشن کمیشن کے وکیل کا مزید کہنا تھا کہ حامد رضا نے 22 دسمبر کو کاغذات نامزدگی جمع کرائے اور خود کو سنی اتحاد کونسل کا امیدوار کہا، حامد رضا نے کاغذات نامزدگی میں بریکٹ میں لکھا کہ اتحاد تحریک انصاف سے ہے، حامد رضا نے پارٹی سے وابستگی 13 جنوری کو جمع کرائی۔جسٹس جمال مندوخیل نے ریمارکس دیئے کہ یعنی الیکشن کمیشن کی تاریخ سے قبل پارٹی سے ڈیکلریشن دینی چاہیے، نشان بعد کی بات ہے، وکیل سکندر بشیر نے بتایا کہ حامد رضا کا ہر دستاویز ان کے پچھلے دستاویز سے مختلف ہے۔جسٹس جمال مندوخیل نے کہا کہ کیا حامد رضا کو سنی اتحاد کونسل کا سرٹیفکیٹ دینا چاہیے تھا یا آزادامیدوار کا؟ جس پر وکیل نے کہا کہ حامد رضا کو سنی اتحاد کونسل کا سرٹیفکیٹ جمع کرانا چاہیے تھا۔جسٹس محمد علی مظہر کا کہنا تھا کہ ڈیکلریشن میں تو حامد رضا نے خود کو تحریک انصاف کا ظاہر کیا نہ کہ آزاد امیدوار۔وکیل نے مزید بتایا کہ الیکشن کمیشن کا فیصلہ 22 دسمبر کو آیا، 10 جنوری کو پشاور ہائی کورٹ کا فیصلہ آیا اور 13 جنوری کو سپریم کورٹ نے فیصلہ سنایا، 8 فروری کو تحریک انصاف نے انٹراپارٹی انتخابات کے حوالے سے الیکشن کمیشن کو بتایا، اگر 7 فروری کو بھی تحریک انصاف انٹراپارٹی انتخابات کا بتا دیتے تو کچھ ہو سکتا تھا۔اس پر جسٹس عائشہ ملک نے ریمارکس دیئے کہ اگر ایسا تحریک انصاف کرتی تو الیکشن کمیشن کا اپنا شیڈول متاثر ہو جاتا۔چیف جسٹس قاضی فائز عیسیٰ نے کہا کہ پی ٹی آئی انٹرا پارٹی انتخابات کا معاملہ تو کئی سال قبل سے آ رہا تھا، تحریک انصاف بار بار انٹرا پارٹی انتخابات کیلئے وقت مانگ رہی تھی، سپریم کورٹ پر مت ڈالیں، الیکشن کمیشن پہلے دیکھ سکتا تھا، فٹبال کی طرح ایکسٹرا ٹائم کو دیکھ رہے، اصل گیم 90 منٹ کی ہوتی ہے۔اس پر جسٹس منیب اختر نے کہا کہ سوال تھا انتخابات جائز ہوئے یا نہیں، 22 دسمبر کو جب نشان لے لیا تو مطلب انتخابات کیلئے پارٹی ہے۔چیف جسٹس نے ریمارکس دیئے کہ تسلیم شدہ بات ہے کہ تحریک انصاف سال کا وقت لینے کے باوجود انٹراپارٹی انتخابات نہیں کرا سکی، بطور وزیراعظم درخواست دی کہ انٹراپارٹی انتخابات کیلئے سال دے دو۔بعد ازاں جسٹس جمال مندوخیل نے کہا کہ امیدوار علی محمد خان نے سرٹیفکیٹ نہ ڈیکلریشن میں کچھ لکھا ہوا، ایسے بے شمار ہیں جو کاغذات نامزدگی میں بلینک ہیں۔وکیل الیکشن کمیشن نے عدالت کو بتایا کہ میری اردو کچھ کمزور ہے، صاحبزادہ کو شہزادہ کہہ دیتاہوں۔چیف جسٹس نے ریمارکس دیے کہ الیکشن کمیشن کی تقرری حکومت اور اپوزیشن مل کر کرتے ہیں، ابھی تک کسی فریق نے اس نکتے پر بات ہی نہیں کی، الیکشن کمیشن نے غیر آئینی اقدام کیا تو ثابت کریں، اتنی باریکیوں میں ہم ایسے جا رہے جیسے الیکشن کمیشن کے خلاف اپیل سن رہے ہوں، ہم مبینہ دھاندلی کے معاملے کو براہ راست نہیں دیکھ سکتے، ثابت کریں الیکشن کمیشن نے غیر آئینی اقدام کیا ہم اڑا دیں گے۔اٹارنی جنرل منصور عثمان اعوان نے کہا کہ اصل سوال یہ ہے کہ حق کس بنیاد پر ملے گا۔ چیف جسٹس پاکستان نے ریمارکس دیے کہ ہم نے یہ نہیں دیکھنا حق کس کا ہے، دیکھنا یہ ہے کہ آئین کیا کہتا ہے۔جسٹس منیب اختر نے سوال کی اکہ کیا آپ 2018 میں مخصوص نشستوں کی تقسیم رولز کی روشنی میں پیش کر سکتے ہیں؟ عدالت کے سامنے غیر متنازع حقائق ہوں گے جس سے سمجھنے میں آسانی ہوگی۔جسٹس یحییٰ آفریدی نے کہا کہ نشستوں کی جو تقسیم آپ ہمیں دیں گے وہ حکومت کی ہوگی، نشستوں کے تعین کا کام الیکشن کمیشن کا ہے حکومت کا نہیں۔ جسٹس منصور علی شاہ نے سوال کیا کہ کیا کل تک 2018 کی نشستوں اور سنی اتحاد کے ہوتے ہوئے نشستوں کا تعین کر سکتے ہیں؟ چیف جسٹس کے بقول آپ بہترین ادارہ ہیں آپ کے لیے کیا مسئلہ ہے؟جسٹس اطہر من اللہ نے کہا کہ بنیادی سوال بڑی سیاسی جماعت کو غلط تشریح کرکے انتخابات سے باہر کرنا ہے، نشستوں کی تقسیم بعد کی چیز ہے۔ چیف جسٹس نے ریمارکس دیے کہ مجھے تو سمجھ نہیں آ رہی الیکشن کمیشن سے مانگا کیا جا رہا ہے۔سپریم کورٹ نے آج کی سماعت کا حکم نامہ لکھواتے ہوئے الیکشن 2018 میں الاٹ کی گئی نشستوں کی تقسیم کی تفصیلات پیش کرنے کی ہدایت کر دی جبکہ آزاد امیدواروں کی سیاسی جماعتوں میں شمولیت سے پہلے اور بعد نشستوں کی تقسیم کی تفصیلات بھی طلب کر لی گئیں۔مخصوص نشستوں کے کیس کی سماعت کل ساڑھے11بجے تک ملتوی کر دی گئی۔ چیف جسٹس نے کہا کہ کل ڈیڑھ بجے تک سماعت کریں گے کیونکہ جوڈیشل کمیشن کا اجلاس ہے۔ اٹارنی جنرل نے کہا کہ کل دلائل مکمل کر لوں گا۔

مخصوص نشستوں کاکیس، ثابت کریں الیکشن کمیشن نے کچھ غیرآئینی کیا ہے تو اڑا دینگے، چیف جسٹس

سپریم کورٹ نے الیکشن 2018 اور2024 میں مخصوص نشستوں کی تقسیم کی تفصیلات طلب کرلیں

اشرافیہ کیلئے مراعات جبکہ تنخواہ دار اور کاروباری طبقے پر ٹیکسوں کی بھرمار سے بھرا نئے مالی سال 25-2024 کا بجٹ آج سے لاگو ہو گیا۔نئے مالی سال کے بجٹ میں بین الاقوامی مالیاتی ادارے ( آئی ایم ایف ) کے دباؤ پر ٹیکس ریونیو کا ہدف 12 ہزار 970 ارب روپے مقرر کیا گیا ہے جس میں 1700 ارب روپے سے زیادہ کے نئے ٹیکس شامل ہیں ۔نئے بجٹ کے آج یکم جولائی سے لاگو ہونے کے بعد سے شیرخوار بچوں کے ڈبہ بند دودھ ہی نہیں بلکہ دودھ کےعام پیکٹ پر بھی 18 فیصد جی ایس ٹی دینا پڑے گا ۔ اسی طرح موبائل فونز کی خریداری پر بھی 18 تا 25 فی صد تک جی ایس ٹی عائد کیا گیا ہے۔نئے بجٹ میں پیٹرول، ڈیزل اور ہائی اوکٹین پر پیٹرولیم لیوی میں 10 روپے لیٹر اضافہ ہو گا ۔ لبریکنٹ آئل پر بھی 5 فیصد فیڈرل ایکسائز ڈیوٹی لگا دی گئی۔ اسی طرح سیمنٹ پر فیڈرل ایکسائز ڈیوٹی 2 روپے سے بڑھا کر 4 روپے فی کلو کردی گئی ہے جب کہ بین الاقوامی سفر پر55 ارب کے اضافی ٹیکس لگائے گئے ہیں۔حکومت نے نئے مالی سال کے بجٹ میں تنخواہ دار اور کاروباری طبقے کی آمدن پر 10 فیصد اضافی سرچارج لگا دیا ہے۔ تنخواہ دار طبقے پر ٹیکسوں کی شرح 39 فیصد ، ماہانہ ایک لاکھ روپےآمدن پر پہلے سے دوگنا ٹیکس دینا ہوگا ۔ ایسوسی ایشن آف پرسنز کو 44 فیصد جب کہ کاروباری طبقے کو 50 فیصد تک انکم ٹیکس ادا کرنا پڑے گا ، تاہم حاضر سروس اور ریٹائرڈ سول و فوجی افسران کو پراپرٹی کی فروخت یا ٹرانسفر پر ٹیکس استثنا دے دیا گیا ہے۔مقامی تیار گاڑیوں پر ٹیکس ریٹ میں بھی اضافہ کر دیا گیا ہے، فکسڈ ٹیکس کی بجائے مالیت کے لحاظ سے ٹیکس عائد کیا گیا ہے۔850 سی سی تک گاڑی کی قیمت پر فکسڈ ٹیکس 10 ہزار کے بجائے اعشاریہ5 فیصد عائد ہو گا اور851 سےایک ہزار سی سی گاڑی کی قیمت پر فکسڈ ٹیکس20 ہزار روپے کے بجائےایک فیصد ٹیکس عائد ہو گا۔اسی طرح 1300سی سی گاڑی کی قیمت پر فکسڈ ٹیکس25 ہزار کے بجائے1.5 فیصد اور1600 سی سی گاڑی کی قیمت پر فکسڈ ٹیکس50 ہزار کے بجائے2 فیصد رکھا گیا ہے۔فنانس بل کے مطابق 1601 سے1800 سی سی گاڑی کی قیمت پر فکسڈ ٹیکس ایک لاکھ 50 ہزار کے بجائے3 فیصد عائد کر دیا گیا اور1801 سے2000 سی سی گاڑی کی قیمت پر فکسڈ ٹیکس2 لاکھ فکسڈ ٹیکس کے بجائے5 فیصد جبکہ 3000 سی سی سے بڑی گاڑی کی قیمت پر مزید2 فیصد ٹیکس بڑھا کر12 فیصد کر دیا گیا ہے۔ افغانستان سے پھل سبزیوں کی درآمد ، ٹریکٹرز ، میڈیکل کی تشخیصی کٹ پر 18 فیصد جی ایس ٹی نافذ کیا گیا جبکہ بلڈرز اور ڈویلپرز کو تعمیرات ، رہائشی اور کمرشل پراپرٹی کی فروخت پر 10 سے 15 فیصد ٹیکس دینا ہو گا۔نان ریذیڈنٹ پاکستانیوں کو مختلف ٹرانزیکشنز پر ٹیکس دینا ہو گا ۔نئی پنشن اسکیم کا بھی اطلاق ہوگیا جبکہ تاجر دوست اسکیم کے تحت تاجروں سے ٹیکس وصولی بھی آج سے شروع ہو جائے گی۔اسلام آباد میں 2 ہزار سے 4 ہزار مربع گز کے فارم ہاؤس پر 5 لاکھ اور اس سے اوپر 10 لاکھ ٹیکس دینا ہو گا ، 2 ہزار مربع گز کے گھر پر 10 لاکھ اور اس سے بڑھے گھر پر 15 لاکھ روپے ٹیکس عائد ہوگیا ۔پراپرٹی کی ٹریڈنگ ویلیو پر بھی 4 فیصد اسٹیمپ ڈیوٹی دینا ہوگی ۔نئے بجٹ میں اسٹیشنری پر ٹیکس چھوٹ برقرار رکھی گئی ہے۔نان فائلرز کو ٹیلی فون کالز پر اضافی 75فیصد ٹیکس نہیں دینا پڑے گا، آزاد کشمیر اور سابق فاٹا کیلئے ٹیکس چھوٹ برقرار ہے  ، فلاحی ہسپتالوں اور خیراتی اداروں کو بھی ٹیکس استثنیٰ ملتا رہے گا ۔ماہرین کے مطابق نئے بجٹ پر عمل درآمد سے مہنگائی میں اضافہ ہو گا ۔

فنانس بل کے تحت نئے ٹیکسز ، مالی سال 25-2024 کے بجٹ کا اطلاق آج سے ہوگیا

اشرافیہ کیلئے مراعات ، تنخواہ دار طبقے پر ٹیکسوں کی بھرمار، نئے مالی سال کا بجٹ آج سے لاگو ہو گیا

انٹرنیشنل کرکٹ کونسل (آئی سی سی) نے ٹی ٹوئنٹی ورلڈ کپ کی ٹیم آف دی ٹورنامنٹ کا اعلان کر دیا۔ٹی 20 ورلڈ کپ کی اعزازی ٹیم آف دی ٹورنامنٹ میں کوئی پاکستانی کھلاڑی شامل نہیں ہے جبکہ بھارت کے 6 کرکٹرز اعزازی ٹیم کا حصہ ہیں۔ٹیم آف دی ٹورنامنٹ کی فائنل الیون میں حیران کن طور پر فائنلسٹ جنوبی افریقا کا بھی کوئی پلیئر شامل نہیں ہے، فائنل الیون میں بھارت کے 6، افغانستان کے 3 جبکہ ویسٹ انڈیز اور آسٹریلیا کا ایک ایک پلیئر رکھا گیا ہے۔بھارت کے روہت شرما ورلڈکپ ٹیم آف دی ٹورنامنٹ کے کپتان مقرر کیے گئے ہیں، بھارت کے سوریا کمار یادو، ہاردک پانڈیا، اکشر  پٹیل، جسپریت بمرا اور ارشدیپ سنگھ بھی ٹیم میں شامل ہیں۔اس کے علاوہ افغانستان کے رحمان اللہ گرباز، راشد خان،فضل الحق فاروقی، ویسٹ انڈیز کے نکولز پورن اور آسٹریلیا کے مارکوس اسٹوئنس بھی ٹیم آف دی ٹورنامنٹ میں شامل ہیں جب کہ جنوبی افریقا کے اینرخ نورکیا کو ٹیم کا بارہواں کھلاڑی رکھا گیا ہے۔ ٹی 20 ورلڈ کپ کا سیمی فائنل کھیلنے والی انگلینڈ ٹیم کا بھی کوئی کھلاڑی ٹیم آف ٹورنامنٹ میں جگہ نہ بنا سکا جب کہ پاکستان، نیوزی لینڈ اور سری لنکا سے بھی کوئی جگہ نہیں بنا سکا ہے۔

ٹی ٹوئنٹی ورلڈکپ کی ٹیم آف دی ٹورنامنٹ کا اعلان، کوئی پاکستانی کھلاڑی شامل نہیں

ٹیم آف دی ٹورنامنٹ میں 6 بھارتی کھلاڑی شامل روہت شرما کو کپتان مقرر کیا گیا ہے

مینار پاکستان پر ٹک ٹاکر خاتون سے بدسلوکی کے مقدمے میں بڑی پیشرفت سامنے آئی ہے۔ٹک ٹاکر عائشہ اکرم نے سیشن عدالت لاہور میں اپنا بیان حلفی پیش کیا، جس میں انہوں نے کہا کہ میں نے اللہ اور اس کے رسول ﷺ کی رضا کی خاطر تمام ملزمان کو معاف کر دیا ہے، مجھے ملزمان کے بری ہونے پر کوئی اعتراض نہیں ہے۔ ایڈیشنل سیشن جج گل عباس نے مینار پاکستان پر ٹک ٹاکر خاتون سے بدسلوکی کے کیس پر سماعت کی، متاثرہ خاتون ٹک ٹاکر عائشہ اکرم نے مقدمے کی پیروی نہ کرنے کا بیان قلمبند کراتے ہوئے بیانِ حلفی عدالت میں پیش کر دیا،ٹک ٹاکر عائشہ اکرم نے اپنے بیان میں کہا کہ میں نے اللہ اور اس کے رسولؐ کی رضا کی خاطر تمام ملزموں کو معاف کر دیا ہے۔ ٹک ٹاکر عائشہ کا کہنا تھا کہ مجھے ملزموں کے بری ہونے پر کوئی اعتراض نہیں ہے، میں آزادانہ رضامندی اور بغیر کسی خوف کے اپنا بیان عدالت میں قلمبند کرا رہی ہوں۔ متاثرہ خاتون کے بیان کے بعد مقدمہ میں نامزد ملزم عامر سہیل عرف ریمبو سمیت دیگر 12 ملزموں نے بریت کی درخواستیں دائر کر دیں۔ عدالت نے وکلاء کو ملزمان کی بریت کی درخواستوں اور مدعیہ کے بیان پر دلائل کیلئے 26 اگست کو طلب کر لیا۔یاد رہے کہ خاتون ٹک ٹاکر عائشہ اکرم کو ہجوم کی جانب سے ہراساں کیے جانے کا واقعہ اگست 2021 میں ہوا تھا۔ سوشل میڈیا پر ویڈیوز وائرل ہونے پر وزیراعظم اور وزیراعلیٰ پنجاب نے نوٹس لیا تھا۔تھانہ لاری اڈا پولیس نے خاتوں کو ہراساں کیے جانے کے خلاف مقدمہ درج کر رکھا ہے۔

مینار پاکستان واقعہ، ٹک ٹاکر عائشہ کا ملزموں کو معاف کرنے کا اعلان

میں نے اللہ اور اس کے رسولؐ کی رضا کی خاطر تمام ملزموں کو معاف کر دیا ،ٹک ٹاکرعائشہ اکرم

وفاقی حکومت نے نئے بیل آؤٹ پیکج کیلئے بین الاقوامی مالیاتی فنڈ ( آئی ایم ایف ) کی ایک اور پیشگی شرط پوری کرتے ہوئے ٹیکسٹائل سمیت جنرل انڈسٹری یا کیپٹیو پاور پلانٹس کیلئے گیس مہنگی کردی۔وفاقی وزیر خزانہ کی زیر صدارت گزشتہ روز کا بینہ کی اقتصادی رابطہ کمیٹی کا اجلاس ہوا جس میں ای سی سی نے پیٹرولیم ڈویژن کی پیش کی گئی سمری منظور کرلی۔نجی ٹی وی کے مطابق وفاقی حکومت نے گیس کی قیمتوں میں کمی نہ کرنے کا فیصلہ کرتے ہوئے اوگرا کی سفارشات مسترد کردیں۔اوگرا کی جانب سے گیس کی قیمتوں میں 10 فیصد کمی کے فیصلے کی موجودگی میں یکم جولائی سے گیس کی قیمتوں میں کمی نہ کرنے کا فیصلہ کرلیا۔اس حوالے سے گیس کی قیمتوں میں کمی کی اوگرا کی سفارشات مسترد کردی گئیں، ای سی سی نے گھریلو صارفین کیلئے گیس قیمت برقرار رکھنے کی منظوری دے دی۔ گیس کی نئی قیمتوں کا اطلاق یکم جولائی 2024 سے ہوگا۔کیپٹو کے سوا باقی انڈسٹری کے لیے بھی گیس قیمت برقرار رکھنے کا فیصلہ کیا گیا ہے۔ ای سی سی کا کیپٹو پاور کےلیے گیس ٹیرف 250 روپے فی ایم ایم بی ٹو بڑھانے کی منظوری دی ہے۔ کیپٹو کے لیے گیس ٹیرف 2750 سے بڑھاکر3 ہزار روپے فی ایم ایم بی ٹی یو کرنے کی منظوری دی گئی ہے۔میڈیارپورٹس کے مطابق ٹیکسٹائل سمیت جنرل انڈسٹری یا کیپٹیو پاور پلانٹس کیلئے گیس ٹیرف 2750 روپے سے بڑھا کر 3000 فی ایم ایم بی ٹی یو کر نے کی منظوری دی گئی ہے۔سوئی سدرن اور سوئی ناردرن گیس کمپنیز کو سالانہ 92 ارب روپے اضافی ریونیو ملے گا۔ آئی ایم ایف کے مطالبے پر جنرل انڈسٹری کیلئے جنوری 2025 میں گیس مزید مہنگی کرنے کا بھی پلان زیر غور ہے۔دونوں کمپنیوں کا مجموعی ریونیو 898 ارب ہدف کے مقابلے 1029 ارب تک پہنچ جائے گا جبکہ دو بار گیس کی قیمتیں بڑھانے سے مجموعی طور پر 132 ارب سے زیادہ اضافی ریونیو ملے گا۔جنرل انڈسٹری کے علاوہ دیگر صارفین کے موجودہ گیس ریٹس برقرار رہیں گے۔

آئی ایم ایف کی ایک اور شرط پوری، حکومت نے صنعتوں کیلئے گیس مہنگی کردی

اقتصادی رابطہ کمیٹی (ای سی سی)نے گھریلو صارفین کیلئے گیس کی قیمت برقرار رکھنے کی منظوری دے دی

جمرود میں نامعلوم دہشت گردوں نے چیک پوسٹ پر بھاری ہتھیاروں سے حملہ کر دیا، حملے میں دو جوان شہید ہو گئے ہیں۔تفصیلات کے مطابق دہشت گردوں کی جانب سے راکٹ لانچرز اور بھاری ہتھیاروں سے حملہ خیبر کے علاقے جمرود میں تختہ بیگ میں واقع پولیس اور ایف سی کی مشترکہ چیک پوسٹ پر کیا گیا۔چیک پوسٹ پر موجود پولیس اور ایف سی کے شیردل جوانوں نے بروقت کارروائی کرتے ہوئے دہشت گردوں کا حملہ پسپا کر دیا، فائرنگ کے نتیجے میں پولیس اور ایف سی کے 2 جوان شدید زخمی ہو گئے جنہیں اسپتال منتقل کر دیا۔حملے کے بعد سکیورٹی اہلکاروں کی بڑی تعداد موقع پر پہنچ گئی، اہلکاروں نے علاقے کو گھیرے میں لے کر فرار ہونے والے دہشت گردوں کی گرفتاری کیلئے سرچ آپریشن شروع کر دیا۔ڈی پی او خیبر کے مطابق حملے میں ایک پولیس اہلکار اور ایک ایف سی کے جوان نے جام شہادت نوش کیا ہے، پولیس کی بروقت اور بھرپور جوابی کارروائی کے بعد دہشت گرد فرار ہو گئے۔

جمرود، دہشت گردوں کا چیک پوسٹ پر بھاری ہتھیاروں سے حملہ، 2 جوان شہید

پولیس اور ایف سی کی جوابی کارروائی پر دہشت گرد فرار ، گرفتاری کیلئے سرچ آپریشن شروع کردیاگیا

مہنگائی سے پریشان عوام کیلیے بریُ خبر ہے کہ حکومت نے پیٹرولیم مصنوعات کی قیمتوں میں بڑا اضافہ کر دیا۔حکومت نے 15 جولائی تک کے لیے پیٹرولیم مصنوعات کی قیمتوں کا اعلان کر دیا جس میں عوام پر مزید بوجھ ڈالا گیا ہے۔وزارت خزانہ کی جانب سے جاری نوٹیفکیشن کے مطابق پٹرول کی قیمت میں 7 روپے 45 پیسے فی لٹر جبکہ ڈیزل کی قیمت میں 9 روپے 56 پیسے کا اضافہ کیا گیا ہے۔قیمتوں میں اضافے کے باعث پٹرول کی نئی قیمت 265 روپے 61 پیسے جبکہ ڈیزل کی نئی قیمت 277 روپے 45 پیسے ہوگئی۔نوٹیفکیشن کے مطابق لائٹ ڈیزل کی قیمت میں 9 روپے 88 پیسے مٹی کے تیل کی قیمت میں 10 روپے 5 پیسے فی لیٹر کا اضافہ کیا گیا ہے۔وزیراعظم نے پیٹرولیم مصنوعات کی قیمتوں میں اضافے کی منظوری دے دی ہے، نئی قیمتوں کا اطلاق 12 بجے سے ہوگا۔

مہنگائی کے ستائے عوام کیلئے بری خبر! پیٹرولیم مصنوعات کی قیمتوں میں بڑا اضافہ

حکومت کی جانب سےفی لیٹر پیٹرول 7 روپے 45 پیسے اور ڈیزل 9 روپے 56 پیسے مہنگا کردیا گیا

جمعیت علمائے اسلام کے سربراہ مولانا فضل الرحمان نے ایک بارپھر ملک میں انتخابات دوبارہ منعقد کروانے کا مطالبہ کرتے ہوئےکہا ہے کہ ملک میں نئے انتخابات کرائے جائیں جو اسٹیبلشمنٹ کی مداخلت سے پاک ہوں۔ سیاسی معاملات میں مداخلت فوج کے اپنے حلف کی نفی ہے، اس مداخلت کو ہم تسلیم نہیں کرسکتے۔ فضل الرحمان نے یہ بھی بتایا کہ مرکزی مجلس شوریٰ نے کسی باضابطہ اتحاد میں جانے کا انتظار کیے بغیر اپنے پلیٹ فارم سے جدوجہد جاری رکھنے کا فیصلہ کیا ہے۔جے یو آئی کے سربراہ مولانا فضل الرحمان نے پریس کانفرنس کرتے ہوئے کہا کہ مجلسِ شوریٰ کے گزشتہ اجلاس میں 8 فروری کے انتخابات کے نتائج مسترد کردیے گئے تھے اور شوری نے بھی عاملہ کے فیصلے کی توثیق کی ہے۔انہوں نے کہا کہ انتخابات میں اسٹیبلشمنٹ کی مداخلت کے خلاف تحریک آگے بڑھائیں گے، غیر جانب دارانہ، صاف شفاف انتخابات منعقد کروائے جائیں، انتخابات کے عمل میں افواج اور خفیہ ادارے مداخلت نہ کریں۔ان کا کہنا تھا کہ حکومت سے ہوئے رابطوں کے بارے میں شوری نے طے کیا ہے کہ حکومت میں اتنا دم خم نہیں کہ وہ ہماری اور تمام سیاسی جماعتوں کے تحفظات دور کرسکے، جب تک اصولی اتفاق نہیں ہوجاتا منانے اور راضی کرنے کے کیا معنی ہیں۔مولانا فضل الرحمان کا کہنا تھا کہ جمعیت علمائے اسلام کی مجلس شوریٰ نے سیاسی جماعتوں کے ساتھ رابطوں کا جائزہ لیا ہے۔ پی ٹی آئی کی جانب سے ابھی تک مذاکراتی ٹیم کا اعلان نہیں کیا گیا، پی ٹی آئی قیادت میں یکسوئی کا فقدان ہے، سنی اتحاد کونسل کے سربراہ نے بیان دیا جے یو آئی کیساتھ مذاکرات نہیں ہوسکتے۔انہوں نے مزید کہا کہ شفاف انتخابات کی ضمانت تک منانے اور راضی کرنے کے الفاظ کے کیا معنی ہیں، پی ٹی آئی کے خلاف مؤقف اور تحفظات بہت سنجیدہ ہیں۔مولانا فضل الرحمان نے کہا کہ بہتر سیاسی ماحول ترتیب دینے میں کوئی ہچکچاہٹ نہیں، سیاسی جماعت مسئلے کے حل اور مذاکرات کا کبھی انکار نہیں کرتی، ہمارا مطالبہ ہے کہ قوم کو ووٹ کا حق لوٹایا جائے، تمام ادارے اپنے دائرہ کار سے وابستہ ہوجائیں۔سربراہ جے یو آئی نے کہا کہ حکومت میں اتنا دم خم نہیں ہماری شکایات کا ازالہ کر سکے، پاک افغان بارڈر پر جو کچھ ہو رہا ہے وہ بیرونی آقا کے کہنے پر ہو رہا ہے، پاکستان کی خارجہ پالیسی کہاں کھڑی ہے کیا یہ سفارتی ناکامی نہیں؟، ریاست کو بھی اپنے رویوں پر غور کرنا ہوگا۔ان کا کہنا تھا کہ چین کے ساتھ تعلقات کا دوام چاہتے ہیں، ابھی تک چین کا اعتماد سرمایہ کاری کے لیے بحال نہیں ہوسکا ہے، امریکی ایوان نمائندگان نے 8 فروری کے الیکشن کو مشکوک قرار دیا ہے، جمعیت علمائے اسلام کی رائے ہے کہ امریکا پاکستان کے معاملات سے دور رہے۔انہوں نے کہا کہ شوریٰ نے کسی باضابطہ اتحاد میں جانے کا انتظار کیے بغیر اپنے پلیٹ فارم سے جدوجہد  کا فیصلہ کیا ہے، اگر سیاسی جماعتوں کے درمیان باہمی تعاون کا ماحول پیدا ہوا تو ہم اسے قابل عمل بنائیں گے۔فضل الرحمٰن نے آپریشن عزم استحکام کی مخالفت کرتے ہوئے کہا ہے کہ 2001 میں میزان آپریشن سے لے کر ردوالفساد تک ہونے والے آپریشن کے بعد الٹا دہشت گردی میں 10گنا اضافہ ہوا ہے، ملکی دفاع میں فوج کے شانہ بشانہ کھڑے ہیں لیکن سیاسی مداخلت خود ان کے اپنے حلف کی بھی نفی کرتی ہے لہٰذا فوج سمیت تمام ادارے اپنے آئینی دائرہ کار سے وابستہ ہو جائیں۔ پاک چین تعلقات کی مکمل حمایت کا اعلان کرتے ہیں،آپریشن عزم استحکام کی طرف اشارہ کرتے ہوئے انہوں نے کہا کہ آج کہا جا رہا ہے کہ افغانستان میں کارروائی کریں گے، پاکستان کے اندر دہشت گردی روکنے میں ناکامی پر پردہ ڈالنے کے لیے افغانستان پر حملہ کرنا چاہتے ہو، کیا یہ حقیقت نہیں کہ ترقیاتی فنڈز کا 10 فیصد خیبرپختونخوا میں دہشت گردوں کو نہیں دیا جاتا، کیا آپ دہشت گردوں کے سامنے بے بس ہیں۔ان کا کہنا تھا کہ بہت سے ایسے سوالات ہیں جو اٹھا کر ریاست کے لیے مشکلات پیدا نہیں کرنا چاہتے، اگر کچھ کسی کا مفاد ہے تو وہ غیر ملکی مفادات کا ہے، امریکیوں کو اڈے دے کر 20 سال آپ بمباری نہیں کراتے رہے۔

فضل الرحمان کا ایک بار پھر ملک میں نئے انتخابات کرانے کا مطالبہ

سیاسی معاملات میں مداخلت فوج کے اپنے حلف کی نفی ہے، مولانا فضل الرحمان

بھارتی کرکٹ ٹیم نے دوسری بار آئی سی سی ٹی ٹوئنٹی ورلڈکپ جیت لیا اور ساتھ ہی کروڑوں روپے کی انعامی رقم بھی حاصل کرلی۔بھارتی کرکٹ ٹیم نے 2007 کے بعد دوسری بار ٹی ٹوئنٹی ورلڈکپ کی ٹرافی اٹھائی اور اس کے ساتھ ٹورنامنٹ کی تاریخ کی سب سے بڑی انعامی رقم بھی حاصل کرلی۔ٹی20 ورلڈکپ 2024 کی فاتح بھارتی ٹیم کو 24 لاکھ 50 ہزار ڈالرز انعامی رقم ملی جو پاکستانی 68 کروڑ 28 لاکھ 75 ہزار روپے بنتے ہیں۔اس کے علاوہ ٹی ٹوئنٹی ورلڈ کپ کی رنر اپ ٹیم جنوبی افریقا کو  12 لاکھ 80 ہزارڈالرز یعنی 35 کروڑ روپے سے زائد ملے۔اس کے علاوہ ٹورنامنٹ میں شامل دیگر ٹیموں پر بھی ڈالرز کی برسات کی گئی ہے۔آئی سی سی کے مطابق سیمی فائنلز تک پہنچنے والی دونوں ٹیموں افغانستان اور انگلینڈ کو بالترتیب 7 لاکھ 87 ہزار 5 سو امریکی ڈالرز دیے گئے ہیں۔ سُپر8 مرحلے سے سیمی فائنل کے لیےکوالیفائی نہ کرنے والی 4 ٹیموں کو 3 لاکھ 82 ہزار 5 سو ڈالرز دیے گئے ہیں۔اسی طرح میچ جیتنے والی ہر ٹیم کو 31 ہزار ایک سو 54 ڈالرز جب کہ 9ویں سے 12 ویں پوزیشن حاصل کرنے والی ٹیموں کو 2 لاکھ 47 ہزار 5 سو ڈالرز اور 13 ویں سے 20 ویں پوزیشن حاصل کرنے والی ٹیموں کو 2 لاکھ 25 ہزار ڈالرز دیے گئے ہیں۔

ٹی ٹوئنٹی ورلڈ کپ فاتح بھارت پر ڈالرز کی برسات، ہارنے والی ٹیم بھی مالامال

بھارتی ٹیم کو 24 لاکھ 50 ہزار ڈالرز انعامی رقم ملی جو پاکستانی 68 کروڑ 28 لاکھ 75 ہزار روپے بنتے ہیں

وفاقی وزیر خزانہ محمد اورنگزیب نے کہا ہے کہ نان فائلر کی اختراع سمجھ نہیں آتی، اسے ختم کریں گے۔ محمد اورنگزیب کاکہناتھاکہ ایم ایف سے نئے پروگرام کے لیے بڑی مثبت بات چیت چل رہی ہے، بہت جلد آئی ایم ایف سے یہ پروگرام طے ہوجائے گا جو کہ ایک بڑا فنڈنگ پروگرام ہوگا۔وزیر خزانہ محمد اورنگزیب نے اسلام آباد میں پریس کانفرنس کرتے ہوئے کہا کہ زرمبادلہ کے ذخائر نو ارب ڈالر ہیں، مہنگائی 38فیصد سے کم ہوکر بارہ فیصد پر آگئی ہے، عالمی کمپنیوں کے ڈویڈنڈ کی واپسی مکمل ہوچکی ہے، یہ براہ راست غیر ملکی سرمایہ کاری کیلئے بہت اہم ہے۔انہوں نے کہا کہ عالمی بینک نے داسو کے لئے ایک ارب ڈالر کی منظوری دی ہے، انٹرنیشنل فنانس کارپوریشن (آئی ایف سی) نے پی ٹی سی ایل کیلئے 400 ملین ڈالر کی منظوری دیدی، یہ رقم اگلے مالی سال آجائے گی، ایف بی آر نے 9.3 ٹریلین روپے کی ٹیکس وصولیاں کرلیں، جن میں گروتھ تیس فیصد ہے۔ان کا کہنا تھا کہ یہ سب میکرو استحکام کے فوائد ہیں، اور میکرو استحکام کو کیسے آگے لے کر جانا ہے یہی چیلنج ہے، میکرو استحکام لڑکھڑا گیا تو پھر باقی چیزیں کرنا مشکل ہوگا، ایف بی آر کی مکمل ڈیجیٹائزیشن کی جارہی ہے جتنی ڈیجیٹائزیشن ہوگی اتنی بہتری آئے گی۔انہوں نے کہا کہ چوری میں ایف بی آرحکام اور ٹیکس پیئرز دونوں ملوث ہیں، تالی دونوں ہاتھوں سے بنتی ہے اگر سرکار کی طرف سے کوئی کرپشن کرتا ہے تو دوسری طرف سے بھی تو کوئی کرتا ہے، اس رجحان کو روکنا ہے جس کیلئے ٹیکنالوجی کو فروغ دیا جائے گا، سیلز ٹیکس میں 750 ارب روپے کی کرپشن سامنے آئی ہے، ایف بی آر میں جتنا انسانی عمل دخل کم ہو گا کرپشن بھی کم ہو گی۔وزیر خزانہ نے کہا کہ ملک میں اگر لیکیج نہ ہورہی ہو تو کرنے کو بہت کچھ مل جائیگا، ایف بی آر کے لیکیجز، کرپشن، چوری کو بند کرنا ہوگا۔ انہوں نے بتایا کہ ٹیکس دہندگان کے تیس جون2024 تک کے تمام ریفنڈز اگلے دو سے تین دن میں جاری کردیے جائیں گے جن کی رقم پچاس ارب روپے سے زائد بنتی ہے، اسی طرح ٹیکس دہندگان کے ڈی ایل ٹی ایل کے ریفنڈز بھی جلد ادا کردیے جائیں گے۔محمد اورنگزیب نے کہا کہ 2022میں مفتاح اسماعیل کے دور میں ریٹیلرز پر ٹیکس عائد کرنے کی کوشش کی گئی تھی، اسی وقت اسے عائد کردینا چاہیے تھا، اگر ٹیکس لگا ہوتا تو آج اس مد میں اچھی خاصی رقم جمع ہوجاتی، اب تک 42ہزار ریٹیلرز رجسٹرڈ ہوچکے ہیں جن پر یکم جولائی سے ٹیکس لاگو ہوگا، پارلیمنٹ میں بھی کہا کہ نان فائلر کی اختراع مجھے سمجھ نہیں آتی اس اختراع کو ملک سے ختم کریں گے۔انہوں نے مزید کہا کہ پنشن بجٹ کا حصہ نہیں تھا مگر ای سی سی اجلاس میں فیصلہ کیا ہے ، سول ملازمین پر نئے پنشن سسٹم کا اطلاق کل سے ہو جائے گا جبکہ مسلح افواج کیلئے اگلے سال سے شروع ہوگا، آرمڈ فورسز کو ایک سال کے لیے اس لیے استثنیٰ دیا ہے کیونکہ انہوں نے اپنے ادارے کے ڈھانچے کو دیکھنا ہے۔انہوں نے کہا کہ نئے ٹیکسز کی وجہ سے لوگ دباؤ محسوس کر رہے ہیں، اس میں کوئی شک نہیں کہ تنخواہ دار طبقے پر بوجھ بڑھا ہے، جیسے ہی کوئی مالی گنجائش ہوئی تنخواہ دار طبقے کو ریلیف دیں گے، پیٹرولیم ڈیولپمنٹ لیوی کل سے نہیں بڑھا رہے، 70روپے پی ڈی ایل کا فوری اطلاق نہیں ہورہا۔وزیر خزانہ محمد اورنگزیب نے کہا کہ آئی ایم ایف کے ساتھ جولائی کے دوران معاہدہ متوقع ہے، 2018 میں بطور صدر ایچ بی ایل پاکستان آگیا تھا، ایسا نہیں ہے کہ کہیں سے اٹھ کرآیا ہوں کل کہیں چلا جاؤں گا، دوسرے ملک کی شہریت چھوڑچکا ہوں، ادھر ہی رہنا ہے جیسے دوسرے پاکستانی ویزہ لے کر جاتے ہیں ہم بھی جائیں گے۔ان کا کہنا تھا کہ امریکی کانگریس میں پاکستان کے بارے میں پیش ہونے والی قرار داد کا آئی ایم ایف کے پروگرام کے ساتھ کوئی تعلق نہیں ہے، آئم ایم ایف حکام اور دورہ امریکہ کے دوران ملاقاتوں میں ہونیوالی گفتگو تسلی بخش ہے، یہ آخری آئی ایم ایف پروگرام ہوگا جو تین سال کا ہوگا اسکے حجم پر بات چیت جاری ہے، جو چھ سے آٹھ ارب ڈالر کے درمیان ہی ہوگا۔وزیر خزانہ نے کہا کہ صوبوں سے ریونیو اور اخراجات پر مشاورت شروع کی ہے، صوبوں کو کہہ رہے ہیں کہ اپنے اخراجات خود اٹھائیں، ایسے منصوبے جو صرف صوبوں کے ہیں وہ صوبے ہی اپنے سالانہ پلان میں لیکر آئیں، ہم نے پبلک سیکٹر ڈویلپمنٹ پروگرام (پی ایس ڈی پی) میں کٹوتی کی ہے ،پی ایس ڈی پی کے بجائے پبلک پرائیویٹ پارٹنرشپ پرجائیں گے۔

ہم اپنے اقدامات سے نان فائلر کی اختراع ہی ختم کر دینگے، وزیر خزانہ محمداورنگزیب

امریکی قرارداد کا آئی ایم ایف پروگرام سے کوئی تعلق نہیں،آئی ایم ایف سے نیا پروگرام طے ہوجائیگا، وزیرخزانہ

آئی ایم ایف نے بجٹ کی منظوری کو ناکافی قرار دے دیا ہے، اور بجلی اور گیس کی قیمتوں پر ڈو مور کا مطالبہ کیا ہے۔نجی ٹی وی کے مطابق بجٹ کی منظوری کے بعد آئی ایم ایف نے ڈو مور کا مطالبہ کر دیا ہے، آئی ایم ایف بجلی اور گیس کے ریٹ میں اضافہ چاہتا ہے، اور کہا ہے کہ حکومت پاکستان یکم جولائی سے بجلی کے ریٹ میں اضافہ کرے۔آئی ایم ایف کا مطالبہ ہے کہ بجلی مہنگی کرنے کے لیے نیپرا کے فیصلے پر فوری عمل درآمد کیا جائے، اور نئے مالی سال میں گیس کے ریٹ بڑھا کر سبسڈی کنٹرول کی جائے۔نجی ٹی وی نے ذرائع وزارت خزانہ کےحوالے سے بتایا کہ آئی ایم ایف 10 جولائی سے قبل بجلی اور گیس کی قیمتوں میں اضافہ چاہتا ہے اور عالمی مالیاتی فنڈ کی جانب سے مطالبہ کیا گیا ہے کہ یکم جولائی سے پیشگی اقدامات کے تحت نرخوں میں اضافے پر عملدرآمد کیا جائے۔آئی ایم ایف نے مطالبہ کیا ہے کہ بجلی مہنگی کرنے کیلئے نیپرا کے فیصلے پر فوری عملدرآمد کیا جائے، نئے مالی سال میں گیس کے ریٹ بڑھا کر سبسڈی کنٹرول کی جائے اور نئے قرض پروگرام کیلئے آئی ایم ایف کی پیشگی شرائط پر عملدرآمد کیا جائے۔ذرائع کا مزید کہنا ہے کہ آئی ایم ایف کے وفد کاجولائی کے دوسرے ہفتے میں پاکستان آنے کا امکان ہے، آئی ایم ایف نے بجٹ میں سخت معاشی فیصلوں کو سراہا ہے اور مشکل معاشی فیصلے معیشت کیلئے ضروری قرار دیئے ہیں۔آئی ایم ایف نے وفاقی بجٹ میں ٹیکس کی چھوٹ اور رعایتیں ختم کرنے کے فیصلے کی بھی تعریف کی ہے۔

آئی ایم ایف کا 10 جولائی سے قبل بجلی و گیس کی قیمتوں میں اضافے کا مطالبہ

آئی ایم ایف نے بجٹ کی منظوری ناکافی قرار دے دی

صدر مملکت آصف علی زرداری نے فنانس ترمیمی بل 2024 کی منظوری دیدی۔صدر مملکت آصف زرداری نے آئندہ مالی سال کے بجٹ پر دستخط کر دیئے، فنانس بل کی دستخط شدہ کاپی پارلیمنٹ کو بھجوا دی گئی۔ایوان صدر کی طرف سے جاری کیے جانے والے اعلامیے کے مطابق صدر مملکت نے وزیراعظم کی ایڈوائس پر آرٹیکل 75 کے تحت فنانس بل کی منظوری دی، فنانس بل یکم جولائی 2024 سے نافذ العمل ہو گا۔یاد رہے کہ وفاقی بجٹ کا مجموعی حجم 18 ہزار ارب روپے سے زائد ہے، فنانس بل کے تحت مختلف ٹیکسوں اور ڈیوٹیز میں ردوبدل کیا گیا ہے، نیا وفاقی بجٹ کل سے نافذالعمل ہوگا، 200 ارب روپے سے زائد کے ٹیکسز لاگو ہوں گے۔

صدر آصف علی زرداری نے بجٹ 2024-2025 کی منظوری دے دی

صدر مملکت نے وزیراعظم کی ایڈوائس پر فنانس بل کی منظوری دی، آئندہ مالی سال کا بجٹ کل سے نافذ العمل ہوگا

<p>South Africa vs India live streaming of the T20 World Cup 2024 final shouldn&rsquo;t be missed. The only two sides that have remained unbeaten throughout the tournament will take on each other in the T20 World Cup&rsquo;s biggest clash on 29th June 2024.&nbsp;</p>

<p>This will be South Africa&rsquo;s first time playing the final of a T20 World Cup and they will be ready to take the trophy home.&nbsp;</p>

<p>India won the first edition of the mighty Twenty20 tournament back in 2007. Since then, they have qualified for the T20 World Cup final once only in 2014 and that match was won by Sri Lanka.&nbsp;</p>

<p>Both teams are in their absolute best form and will be looking to lift the shiny World Cup trophy at the Kensington Oval in Barbados.&nbsp;</p>

<h3>When will the South Africa vs India, T20 World Cup final match be played?</h3>

<p>The South Africa vs India, T20 World Cup final match will be played on Saturday, 29th June.&nbsp;</p>

<h3>Where will the South Africa vs India, T20 World Cup final match be played?</h3>

<p>The South Africa vs India, T20 World Cup final match will be played at the Kensington Oval Stadium in Barbados.&nbsp;</p>

<h3>What time will the South Africa vs India, T20 World Cup final match start?</h3>

<p>The South Africa vs India, T20 World Cup final match will start at 7:30 PM (PST).</p>

<h3>Which TV channels will telecast the South Africa vs India, T20 World Cup final match?</h3>

<p>The South Africa vs India T20 World Cup final live telecast will be available at PTV Sports and <a href="https://www.tapmad.com/play/tensports/9461">Ten Sports</a> in Pakistan.&nbsp;</p>

<h3>Where to follow the live streaming of the South Africa vs India, T20 World Cup final match?</h3>

<p>Cricket fans in Pakistan can enjoy the South Africa vs India, T20 World Cup final <a href="https://www.tapmad.com/play/watch-live-ind-vs-eng-t20-world-cup/11131">live</a> streaming online in HD and ad-free on tapmad.&nbsp;</p>

South Africa vs India Live Streaming T20 World Cup 2024 Final Live Telecast: Where To Watch Match Live

When will the South Africa vs India, T20 World Cup final match be played?

Where will the South Africa vs India, T20 World Cup final match be played?

What time will the South Africa vs India, T20 World Cup final match start?

Which TV channels will telecast the South Africa vs India, T20 World Cup final match?

Where to follow the live streaming of the South Africa vs India, T20 World Cup final match?

Related Post

IND (w) vs SA (w) Test Squad, History, Venue

Bangladesh Tour Of India 2024 Schedule, Venue

Lanka Premier League 2024 Schedule & Squads

How To Watch UFC Fights Live In Pakistan

IND (w) vs SA (w) Test Squad, History, Venue

Bangladesh Tour Of India 2024 Schedule, Venue

Lanka Premier League 2024 Schedule & Squads

What to watch

Tensports

UEFA EURO Cup 2024 Live - Watch Free

UEFA EURO 2024 Live - Slovakia vs Romania