سپر اسٹار الو ارجن کی سپر ہٹ فلم ’پشپا 2‘ کا سنسنی خیز ٹریلر ریلیز کردیا گیا

ساؤتھ انڈین فلم انڈسٹری کے سپراسٹار الو ارجن کی سپرہٹ فلم ’’پشپا 2 ‘‘کا ٹریلر ریلیز کر دیا گیا۔پشپا ٹو دی رول کایوٹیوب پر ٹریلر تیلگو، ہندی اور تامل زبانوں میں جاری کیا گیا ہے جسے ایک ہی دن میں کروڑوں مرتبہ دیکھا جا چکا ہے۔2021 میں ریلیز ہونے والی الو ارجن اور اداکارہ رشمیکا مندانا کی تیلگو فلم پشپا، دی رائز نے نہ صرف بھارتی بلکہ دنیابھر میں شاندار کامیابی حاصل کی تھی، فلم باکس آفس پر کئی ریکارڈ توڑتے ہوئے 2021 کی سب سے زیادہ کمائی کرنے والی بھارتی فلموں میں شامل تھی،جس کے بعد سے ساؤتھ اور بالی ووڈ فلم شائقین پشپا کے دوسرے حصے کی ریلیز کا بےصبری سے انتظار کر رہے تھے۔ بھارتی میڈیا رپورٹس کے مطابق الوارجن نےپشپا 2 کے لیے پہلی فلم کے مقابلے میں دوگنا معاوضہ لیا ہے جو تقریباً 100 کروڑ بھارتی روپے ہے۔پشپا 2،دی رول کے ٹریلر میں الو ارجن ایک منفرد اور مضبوط کردار میں نظر آ رہے ہیں،پہلی فلم کی طرح یہ پارٹ بھی ایکشن اور تھرل سے بھرپور ہے جس میں رومانس کا تڑکہ بھی شامل ہے۔ واضح رہے کہ پشپا 2 دی رول 5 دسمبر 2024 کو سنیما گھروں کی زینت بنے گی جسے بھارت سمیت دنیا بھر کے کئی ممالک میں ریلیز کیا جارہا ہے۔