یحییٰ السنوار اسرائیلی فوج سے جھڑپ میں شہید ہوگئے،حماس نے تصدیق کردی

فلسطین کی مزاحمتی تحریک حماس نے اسرائیلی حملے میں یحییٰ سنوار کی شہادت کی تصدیق کردی ہے۔الجزیرہ نیوز کے مطابق غزہ میں حماس کے سربراہ خلیل حیا نے اپنی براہ راست نشر کی گئی تقریر میں کہا کہ ہماری آزادی اور خود مختاری کیلئے یحییٰ السنوار نے اپنی جان قربان کردی۔خلیل حیا نے یحییٰ السنوار کو خراج تحسین پیش کرتے ہوئے کہا کہ وہ بہادری اور دلیری کے ساتھ اسرائیلی فوج کے سامنے آخری سانس تک ساتھ ڈٹے رہے یہاں تک کہ اپنی جان اللہ کی راہ میں قربان کردی۔حماس کے ترجمان نے بتایا کہ یحییٰ السنوار نے لڑائی کے آخری لمحے تک ہتھیار نہیں ڈالے۔ اپنا سر اونچا رکھا اور تمام زندگی زندگی جدوجہد آزادیٔ فلسطین میں گزار دی۔غزہ میں حماس کے سربراہ خلیل حیا نے اس عزم کا اظہار کیا کہ مزاحمت کی تحریک مزید تقویت کے ساتھ یحییٰ السنوار کے مشن کو جاری رکھے گی اور مقصد حاصل کیے بغیر چین سے نہیں بیٹھیں گے۔خلیل حیا نے السنوار کے قتل کا انتقام لینے کا وعدہ کرتے ہوئے کہا کہ کا اسرائیلی یرغمالیوں کو اُس وقت رہا نہیں کریں گے جب تک اسرائیل غزہ پر حملے بند نہیں کر دیتا اور اپنی افواج کو واپس نہیں بلوالیتا۔غزہ میں حماس کے سربراہ نے مغفرت کی دعا کرتے ہوئے کہا کہ یقیناً یحییٰ السنوار اپنے دوست اور قریبی تحریکی ساتھی اسماعیل ہنیہ کے ساتھ جنت الفردوس میں اللہ کی شاندار میزبانی سے لطف اندوز ہوں گے۔خیال رہے گزشتہ روز اسرائیل کی جانب سے دعوی کیا گیا تھا کہ انہوں نے غزہ میں ایک کارروائی کے دوران حماس کے نئے سربراہ یحییٰ سنوار کو شہید کر دیا ہے تا ہم اب حماس کے ذرائع نے اپنے جاری کیے گئے بیان میں ان کی شہادت کی تصدیق کر دی ہے۔واضح رہے کہ حماس نے اسماعیل ہانیہ کی ایران میں شہادت کے بعد یحییٰ سنوار کو اگست میں حماس کا نیا سربراہ منتخب کیا تھا۔