ون ڈے کے بعدٹی ٹوئنٹی سیریز میں بھی آسٹریلیا کو واش آؤٹ کرینگے،محمد رضوان

پاکستان وائٹ بال کرکٹ ٹیم کے کپتان محمد رضوان نے عزم ظاہر کیا ہے کہ ٹی 20 میں آسٹریلیا کو واش آؤٹ کر کے پاکستان ٹیم نئی تاریخ بنائے گی۔تفصیلات کے مطابق پاکستان وائٹ بال کرکٹ ٹیم کے کپتان محمد رضوان نے آسٹریلیا کے خلاف ٹی20 سیریز سے قبل کہا ہے کہ ہم ون ڈے میں فتح کے بعد ٹی20 سیریز میں وائٹ واش کے لیے پرعزم ہیں۔پاکستان کرکٹ بورڈ ( پی سی بی ) نے آسٹریلیا سے سیریز جیتنے پر ڈریسنگ روم کی ویڈیو جاری کردی ہے جس میں ہیڈ کوچ جیس گلیسپی ، اسسٹ کوچ اظہر محمود اور کپتان محمد رضوان کو گفتگو کرتے دیکھا جاسکتا ہے۔قومی کرکٹ ٹیم کے کپتان نے ڈریسنگ روم میں کھلاڑیوں سے گفتگو کرتے ہوئے کہاکہ ٹیم نے ایک روزہ سیریز میں متحد ہوکر کھیلا جس کا نتیجہ سامنے ہے، اب ہم ٹی20 سیریز میں بھی آسٹریلیا کو وائٹ واش کریں گے۔انہوں نے کہاکہ ہوم گراؤنڈ پر آسٹریلیا کو ہرانے کی ٹیم سے امید نہیں کررہا تھا، مجھے امید ہے کہ دنیا کی ٹیموں نے ہم سے ضرور سیکھا ہوگا۔محمد رضوان نے کہاکہ آسٹریلیا سے ایک روزہ سیریز جیتنے کے بعد سیکھنے کا عمل شروع ہوا، ضروری ہے کہ ہمارے اہداف اور گولز بڑے ہوں، ہمیں چیمپیئنز ٹرافی، ورلڈ کپ اور اولمپکس جیسے ٹائٹل جیتنے ہیں، جس ملک میں بھی جائیں گے تاریخ رقم کریں گے۔قومی کپتان نے کہاکہ اب ہم ماضی کو بھول کر کرکٹ میں جیت کی نئی تاریخ رقم کریں گے، پوری دنیا کو نظر آنا چاہیے کہ ہم ایک ساتھ ہیں، متحد ہوکر ایک جذبے کے تحت کھیلیں گے۔انہوں نے کہاکہ ون ڈے سیریز میں جیت پر ضروری ہے کہ نماز شکرانہ ادا کی جائے، آپ جیت کی خوشیاں ضرور منائیں لیکن ستارے کا خیال رکھیں، کہیں خوشی میں کوئی ایسا کام نہ ہوجائے کہ ہمارا ستارا اثر انداز ہو۔یاد رہے کہ پاکستان اور آسٹریلیا کے درمیان ٹی20 سیریز کا پہلا میچ 14 نومبر کو برسبین میں کھیلا جائے گا۔