بھارتی کھلاڑیوں کو چیمپئنز ٹرافی کیلئے پاکستان آنے پرویلکم کریںگے، محمد رضوان

قومی ٹیم کے کپتان محمد رضوان نے کہا ہے کہ بھارتی ٹیم آئے گی تو انہیں ویلکم کریں گے۔ محمد رضوان کاکہناتھا کہ آسٹریلیا کی کنڈیشن اتنی آسان نہیں ہوگی کیا بہتر کرسکتے ہیں اس پر کام کر رہے ہیں، پلیئنگ الیون پر مشاورت مکمل ہوگئی اور ابھی نام ظاہر نہیں کرنا چاہتے لیکن ٹی 20 سیریز میں بیسٹ الیون ہی میدان میں اتاریں گے، پہلی ترجیح ہماری آسٹریلیا کے خلاف سیریز جیتنا ہے۔آسٹریلیا کیخلاف ٹی ٹوئنٹی سیریزسےقبل میڈیا سے گفتگو میں کپتان محمد رضوان نےکہا انٹرنیشنل کرکٹ میں چیلنجز کا سامنا کرنا پڑتا ہے،آسٹریلیا کے خلاف کھیلنا یا آسٹریلیا میں کھیلنا ہمیشہ ایک چیلنج ہوتا ہے۔محمدرضوان کا کہناتھا کہ پلیئنگ الیون پربات ہوئی مگر اس کو خفیہ رکھنا چاہتے ہیں،بطور کپتان دوسروں کےساتھ مشورہ کروں گا، جیسن گلیسپی کو ہماری جیت کاکریڈٹ جاتا ہےوہ ایک بہترین کوچ ہیں، میری کپتانی میں ہیڈ کوچ سے نوجوان کھلاڑی تک سب سے مشورہ کرتا ہوں۔ایک سوال کے جواب میں قومی ٹیم کے کپتان کا کہنا تھا فخر زمان، افتخار احمد، محمد عامر اور شاداب خان بڑے کھلاڑی ہیں اور انہوں نے کافی عرصے تک پاکستان کے لیے خدمات انجام دی ہیں، ان کی کمی آسانی سے پوری نہیں ہو سکتی۔چیمپئنز ٹرافی میں بھارتی ٹیم کے آنے سے متعلق سوال پر محمد رضوان کا کہنا تھا بھارتی ٹیم آئے گی تو انہیں ویلکم کریں گے تاہم یہ بورڈز کے فیصلے ہیں کہ کیا کرنا ہے اور کیا نہیں، ہمیں امید ہے کہ بھارتی ٹیم پاکستان آئے گی۔