پاکستان اور آسٹریلیا کے درمیان ٹی ٹوئنٹی سیریز کا پہلا میچ آج کھیلا جائے گا

پاکستان اور آسٹریلیا کے درمیان ٹی ٹوئنٹی سیریز کا پہلا میچ آج کھیلا جائے گا۔ میچ پاکستانی وقت کے مطابق دوپہر ایک بجے شروع ہوگا۔پہلے ٹی ٹوئنٹی انٹرنیشنل کیلئے دونوں ٹیموں کی تیاریاں مکمل ہیں،کپتان محمد رضوان آسٹریلیا کے خلاف ٹی ٹوئنٹی سیریز میں بھی جیت کے لیے پرعزم دکھائی دے رہے ہیں۔ ان کی قیادت میں پاکستان ٹیم آج برسبین میں تین میچوں کی سیریز کا پہلا ٹی ٹوئنٹی انٹرنیشنل کھیلے گی۔ بقیہ دو میچز سولہ اور اٹھارہ نومبر کو سڈنی اور ہوبارٹ میں کھیلے جائیں گے ۔ محمد رضوان ٹی ٹوئنٹی انٹرنیشنل میں پاکستان ٹیم کی قیادت کرنے والے 12 ویں کپتان ہونگے ۔دوسری جانب میچ سے قبل شائقین کے لیے بری خبر یہ ہے کہ برسبین میں بارش سے میچ متاثر ہونے کا خدشہ ہے۔آسٹریلوی محکمہ موسمیات کے مطابق دوپہر ایک بجے بارش کا امکان ہے، جس کے باعث برسبین میں پاکستان اور آسٹریلیا کا ٹی ٹوئنٹی میچ متاثر ہونے کا خدشہ ہے۔پاکستان اور آسٹریلیا کے ٹی 20 ریکارڈ پر نظر ڈالی جائے تو قومی ٹیم کا پلڑا بھاری دکھائی دیتا ہے، دونوں ٹیموں کے درمیان اب تک 25 میچز کھیلے جا چکے ہیں جس میں گرین شرٹس نے 13 اور کینگروز نے 11 میں کامیابی اپنے نام کی جبکہ ایک میچ بغیر نتیجہ رہا تھا۔یاد رہے کہ قومی ٹیم ون ڈے سیریز میں میزبان آسٹریلیا کو دو ایک سے شکست دے کر سیریز اپنے نام کر چکا ہے۔خیال رہے پاکستان اورآسٹریلیا کے درمیان سیریز کے تمام میچز اشتہارات کے بغیرایچ ڈی کوالٹی میں براہ راست ٹیپمیڈ پردکھائے جارہے ہیں۔