شیڈول کے اعلان کے بغیر ہی آئی سی سی چیمپئنز ٹرافی پاکستان پہنچ گئی

بھارت کے انکار کی وجہ سے آئی سی سی چیمپئنز ٹرافی کے شیڈول کا اعلان تو نہ کیا جا سکا لیکن انٹرنیشنل کرکٹ کونسل نے چیمپئنز ٹرافی دبئی سے اسلام اباد پہنچادی۔تفصیلات کے مطابق تاریخ میں پہلی مرتبہ چیمپینز ٹرافی کے شیڈول کے اعلان کے بغیر ہی ٹرافی ٹور کا آغاز ہو گیا، 2025 کی چیمپئن ٹرافی دبئی سے اسلام آباد پہنچ گئی ہے۔میڈیارپورٹس کے مطابق آئی سی سی چیمپئنز ٹرافی کے شیڈول کا اعلان تو نہیں کیا جا سکا لیکن انٹرنیشنل کرکٹ کونسل نے ایونٹ کی ٹرافی دبئی سے اسلام آباد پہنچا دی، اب اس ٹرافی ٹور کا آغاز ہفتے کو ہوگا۔آئی سی سی کے شیڈول کے مطابق 16 نومبر سے چیمپئنز ٹرافی ٹور کا آغاز ہوگا اور ٹور 24 نومبر تک جاری رہے گا، ٹرافی ٹور کا آغاز اسکردو سے ہوگا، اسکردو کے بعد چیمپئنز ٹرافی کو کے ٹو بیس کیمپ لے جایا جائے گا، ٹرافی ٹور میں وہ شہر بھی کور ہوں گے جہاں چیمپئنز ٹرافی کے میچز ہونا ہیں۔خیال رہے کہ یہ پہلا موقع ہے کہ چیمپئنز ٹرافی کے شیڈول کے اعلان کے بغیر ہی ٹرافی ٹور شروع ہو گا، آئی سی سی ٹورنامنٹ کے آغاز سے 4 ماہ پہلے شیڈول کا اعلان کرتا ہے۔مینز ٹی20 ورلڈ کپ 2024 کے شیڈول کا اعلان 4 ماہ پہلے جنوری میں کیا گیا تھا، مینز ون ڈے ورلڈ کپ 2023 کے شیڈول کا اعلان 3 ماہ پہلے جون میں ہوا تھا۔واضح رہے کہ چیمپئنز ٹرافی 19 فروری سے 9 مارچ تک پاکستان میں شیڈول ہے، جس کے مکمل شیڈول کا اعلان 11 نومبر کو لاہور میں کرنے کا فیصلہ کیا گیا تھا اوربھارت کے تمام میچز لاہور میں شیڈول تھے۔بھارتی بورڈ کی جانب سے انکار کے باعث آئی سی سی ٹرافی کے شیڈول کا اعلان نہیں کر پا رہا ہے جبکہ پاکستان کرکٹ بورڈ (پی سی بی) نے بھارتی کرکٹ بورڈ (بی سی سی آئی) کی ہٹ دھرمی پر اپنا واضح اور دو ٹوک مؤقف دیا ہے۔