”بارہویں فیل “کے اداکاروکرانت میسی نےفلموں سے ریٹائرمنٹ کا اعلان کر دیا

بالی ووڈ کی حال ہی میں ریلیز ہونے والی بلاک بسٹر فلم ’بارہویں فیل‘ کے اداکار وکرانت میسی نے اداکاری سے ریٹائرمنٹ کا اعلان کر کے مداحوں کو حیران کر دیا۔تفصیلات کے مطابق وکرانت میسی ایک باصلاحیت بھارتی اداکار ہیں جو اپنے منفرد انداز اور مختلف کرداروں کی بدولت بھارتی انٹرٹینمنٹ انڈسٹری میں نمایاں مقام حاصل کر چکے ہیں۔ انہوں نے حال ہی میں ریٹائرمنٹ کا اعلان کر دیا۔ 37 سالہ وکرانت نے انسٹاگرام پر ایک پوسٹ کے ذریعے یہ خبر شیئر کی، جس میں انہوں نے بتایا کہ وہ 2025ء میں اپنے مداحوں سے آخری بار ملیں گے۔وکرانت میسی نے لکھا ہے کہ وہ جیسے جیسے اپنی زندگی میں آگے بڑھ رہے ہیں انہیں احساس ہو رہا ہے کہ بطور شوہر، والد، بیٹے اور اداکار بھی انہیں اپنی کچھ ذمہ داریاں نبھانی ہیں جو وہ پہلے نہیں نبھا سکے۔اداکار نے اپنے مداحوں کا شکریہ ادا کرتے ہوئے لکھا ہے کہ آنے والے سال 2025ء میں ہم ایک دوسرے سے آخری بار ملیں گے، اس وقت تک کے لیے جب تک مناسب وقت نہیں آ جاتا۔ انہوں نے کہا کہ آخری 2 فلمیں اور کئی سالوں کی یادیں ساتھ ہیں جس کے لیے وہ مداحوں کا شکریہ ادا کرنا چاہتے ہیں اور اس پیار کے ہمیشہ مقروض رہیں گے۔بھارتی میڈیا کے مطابق وکرانت میسی ان دنوں اپنی دو فلموں ’یار جگری‘ اور ’آنکھوں کی گستاخیاں‘ کی شوٹنگ میں مصروف ہیں جو 2025 میں سنیما گھروں کی زینت بنیں گی۔واضح رہے کہ وکرانت نے بالی وڈ میں قدم سال 2013 میں فلم ’رابر‘ سے رکھا اور ’ہاف گرل فرینڈ‘ ، ’حسین دلرُبا‘ ، ’لَو ہوسٹل‘ ، ’ 14 پھیرے‘ اور ’بارہویں فیل‘ جیسی سپر ہٹ فلموں میں کردار نبھاتے نظر آئے۔وکرانت میسی کے ریٹائرمنٹ کے اعلان پر جہاں کئی مداح افسردہ ہیں وہیں کئی صارفین کا خیال ہے کہ وکرانت اداکاری سے صرف چند سالوں کا بریک لے رہے ہیں اور جلد ہی اسکرین پر واپسی کریں گے۔