نرگس فخری کی بہن عالیہ فخری سابقہ بوائے فرینڈ کے قتل کے الزام میں گرفتار

بالی ووڈ کی مشہور زمانہ فلم ’راک اسٹار‘ سے شہرت حاصل کرنے والی اداکارہ نرگس فخری کی بہن عالیہ کو قتل کے الزام میں گرفتار کر لیا گیا۔بھارتی میڈیارپورٹس کے مطابق بالی ووڈ اداکارہ نرگس فخری کی بہن عالیہ کو مبینہ طور پر نیویارک میں دو افراد کے قتل کے الزام میں گرفتار کرلیا گیا ہے۔عالیہ فخری کو نیویارک کے شہر کوئنز میں ان کے سابق بوائے فرینڈ ایڈوڈز جیکبز اور ان کی دوست ایناستاسیا ایڈین کو قتل کرنے کے الزام میں حراست میں لیا گیا۔میڈیا کی رپورٹس کے مطابق 43 سالہ عالیہ نے مبینہ طور پر ایک دو منزلہ مکان کو آگ لگا دی، جس کے نتیجے میں 35 سالہ ایڈورڈز جیکبز اور ان کی دوست 33 سالہ ایناستاسیا ایڈین دم گھٹنے کی وجہ سے ہلاک ہو گئے۔ڈسٹرکٹ اٹارنی نے بتایا ہے کہ عینی شاہد کا کہنا ہے کہ عالیہ فخری 2 نومبر کو علی الصبح مذکورہ مکان پر پہنچیں تو انہوں نے اوپر کی منزل پر رہنے والے جیکب پر چیخ کر کہا کہ آپ سب آج مرنے والے ہیں، وہ (عینی شاہد) عالیہ فخری کی آواز سن کر باہر آیا تو اس نے دیکھا کہ مکان میں آگ لگی ہوئی ہے۔ڈسٹرکٹ اٹارنی کے مطابق عالیہ فخری نے حسد کی وجہ سے انتہائی قدم اٹھایا ہے، اگر ان پر الزامات ثابت ہو گئے تو انہیں عمر قید کی سزا سنائی جائے گی۔ادھر بالی ووڈ اداکارہ کی بہن کو کوئنز کرمنل کورٹ میں پیش کیا گیا ہے، جہاں ان کی ضمانت بھی مسترد کر دی گئی ہے جبکہ ان کی اگلی پیشی 9 دسمبر کو مقرر ہے۔نرگس فخری کی والدہ کا کہنا ہے کہ مجھے نہیں لگتا کہ عالیہ کسی کو قتل کر سکتی ہے، وہ ایک ایسی شخصیت تھی جو سب کا خیال رکھتی تھی، اس نے ہر ایک کی مدد کرنے کی کوشش کی۔دوسری جانب قتل کے الزام میں بہن کی گرفتاری پر نرگس فخری کا ردعمل سامنے آگیا بھارتی میڈیا کے مطابق اس حوالے سے جب انہوں نے نرگس فخری سے سوال کیا تو اداکارہ نے بتایا کہ ان کا بہن کے ساتھ گزشتہ 20 برس سے کوئی رابطہ یا تعلق نہیں ہے اس لئے وہ نہیں جانتی کہ عالیہ کی زندگی میں کیا ہورہا ہے اور نہ ہی ان کا اس سب سے کوئی تعلق ہے۔