پاکستان کی گلوکارہ حدیقہ کیانی دنیا کی 100 متاثر کن خواتین کی فہرست میں شامل

بی بی سی نے اپنی سالانہ 100 خواتین 2024 کی فہرست جاری کی ہے، جس میں پاکستان کی مشہور گلوکارہ حدیقہ کیانی بھی شامل ہیں۔حدیقہ کیانی، جو 1990 کی دہائی سے موسیقی کی دنیا پر راج کر رہی ہیں، نہ صرف اپنی جاندار گلوکاری کے لیے مشہور ہیں بلکہ ان کی انسانیت کے لیے خدمات بھی بے مثال ہیں۔پاکستانی میوزیکل آئیکون حدیقہ کیانی اپنی ورسٹائل آواز اور انسانی ہمدردی کے کاموں میں بڑھ چڑھ کر حصہ لینے کے لیے جانی جاتی ہیں۔خیال رہے کہ حدیقہ کیانی اقوامِ متحدہ کے ترقیاتی پروگرام کی خیر سگالی سفیر بھی ہیں۔ انہوں نے پاکستان میں 2022ء کے تباہ کن سیلاب سے متاثر ہونے والوں کے لیے وسیلۂ راہ منصوبہ شروع کیا تھا جو بلوچستان اور جنوبی پنجاب کے علاقوں میں متاثرین کی امداد کے لیے وقف ہے۔ انہوں نے عوام پر زور دیا ہے کہ وہ بے گھر خاندانوں کی مدد کریں، گزشتہ سال انہوں نے اس منصوبے کے تحت متاثرہ علاقوں میں 370 گھر اور دیگر سہولتیں تعمیر کروائیں۔بی بی سی کے مطابق حدیقہ کیانی جنوبی ایشیائی پاپ موسیقی میں خواتین کے عزم اور طاقت کی علامت ہیں، وہ اقوام متحدہ کی ترقیاتی پروگرام کی خیرسگالی سفیر کے طور پر بھی خدمات انجام دے رہی ہیں۔