میلبرن ٹیسٹ، آ سٹریلیا نے بھارت کو 184 رنز سے ہرا کرسیریز میں برتری حاصل کرلی

آسٹریلیا نے بارڈر گواسکر ٹرافی سیریز کے چوتھے ٹیسٹ میچ میں بھارت کو 184 رنز سے شکست دے کر 5 میچوں کی سیریز میں 1-2 کی برتری حاصل کرلی۔میلبرن کرکٹ گراؤنڈ میں کھیلے گئے میچ میں بھارتی ٹیم 340 رنز کے ہدف کے تعاقب میں 155 رنز پر پویلین لوٹ گئی۔بھارتی ٹیم کے 9 کھلاڑی ڈبل فگر میں بھی داخل نہ ہوسکے، بھارتی کپتان روہت شرما 9 اور ویرات کوہلی 5 رنز ہی بنا سکے۔ آسٹریلیا کی جانب سے کپتان پیٹ کمنز اور اسکاٹ بولینڈ نے 3، 3 وکٹیں حاصل کیں۔چوتھے ٹیسٹ کی پہلی اننگز میں آسٹریلیا نے 474 رنز بنائے تھے جبکہ بھارتی ٹیم 369 رنز بنا کر آؤٹ ہو گئی تھی، میزبان ٹیم نے 105 رنز کی برتری حاصل کر لی تھی۔آسٹریلیا کی ٹیم دوسری اننگز میں 234 رنز بنا سکی تھی اور بھارت کو جیت کے لیے 340 رنز کا ہدف دیا تھا۔واضح رہے کہ آسٹریلیا اور بھارت کے درمیان 5 ٹیسٹ میچز کی سیریز میں آسٹریلیا نے 2 اور بھارت نے ایک میچ جیتا ہے جبکہ ایک میچ بغیر کسی نتیجے کے ختم ہو گیا تھا۔ دونوں ٹیموں کے درمیان پانچواں اور فیصلہ کن ٹیسٹ میچ 3 سے 7 جنوری 2025 تک سڈنی میں کھیلا جائے گا۔